2 Minwiinzannu 2 - Kazambale lé Sebe Sauunu 1979

Wo go Éli nya la gi

¹ Bléyian va lé Gakelebale Éli sia barikoko nya yé é goan la gi, ’té Éli valé Élizé si Gilgal.

² Éli lé Élizé lɛ léé: ’I vo ’ko ma, naa, Gakelebale an nwunvɔ Bétɛl. Élizé lé a lɛ léé: Gakelebale a é yuɛma yé i léli a é yuɛma. An ’ka sié i zuo lo. Yé wo go Bétɛl.

³ Balelayezannu lé wo ke Bétɛl, wo da Élizé va yé wo lé a lɛ léé: Bé gi dɔɔ léé, Gakelebale é dan go lɛ kyɔ izan nya loruu? Yé é a zi pa léé: Maa a gi dɔɔ é ziin; ’ka tadɔ.

⁴ Éli lé a lɛ léé: Élizé, ’i vo ’ko ma, naa, Gakelebale an nwunvɔ Jériko. É lé a lɛ léé: Gakelebale a é yuɛma yé i léli a é yuɛma. Maa ’ka sié i zuo lo. Yé wo bɔ Jériko.

⁵ Balelayezannu lé wo ke Jériko, wo bié Élizé va yé wo lé a lɛ léé: Bé gi dɔɔ léé, Gakelebale é dan go lɛ kyɔ izan nya loruu? Yé é a zi pa léé: Maa a gi dɔɔ é ziin; ’ka tadɔ.

⁶ Éli lé a lɛ léé: ’I vo ’ko ma, naa, Gakelebale an nwunvɔ Juudɛn. É léé: Gakelebale a é yuɛma yé i léli a é yuɛma. Maa ’ka sié i zuo lo. Yé wo fiénu vo tawona.

⁷ Balelayezannu va mi yɔ fié wɔlɛ vu da yé wo dɔ Juudɛn ’lɛ baa sɛ, yé woo mi fié dɔ Juudɛn gɔɔn ma.

⁸ Yé Éli élé sɔ si yé é a plɛnnɛn gyɛ yé é a dia ’yi la yé ’yi kini ékema yé wo fiénu gié tɛrɛ gale ta.

⁹ Wo yuu kini aan wo, Éli lé Élizé lɛ léé: Mɛ fɛ sɔ i lɛ léé, maa kɛlɛ i lɛ wolé an sile i va ’lɛɛ? Élizé a zi pa léé: Léli lé ke bii ta, ’é kɛlɛ an ta gɔnɔ fié ma.

¹⁰ Éli léé: I we plɛplɛ ma laa. Naa, bléyian va lé wo an sié i va na, dé i an ye ’bɛ bléyi va, é dan kɛlɛ lɛ i lɛ a zo; dé ’bɛ kaan lo, é ’ka dan kɛlɛ lɛ lo.

¹¹ Wo vo tawona ’té woo glewoo tɔɔn, kyɛgoro valé kyɛwisoonu woo mi fiénu kini ékema yé barikoko go Éli nya la gi.

¹² Élizé a naginina, ’té éé siaan: An tioo, an ti! Izraɛl lé goro valé alé wisoonu! Yé é ’ka a ye lɛ é dɛrɛ lo. É kun élé sɔnu ma yé é wo fia fié,

¹³ yé Éli lé sɔ lé é a dia bɛ, é ’bɛ sia. A zuo é nɔla yé é dɔ Juudɛn yuu gɔɔn ma;

¹⁴ Éli lé sɔ lé é a dia, é a si yé é a dia ’yi la yé é léé: Gakelebale, Éli lé Bale, a kyɛɛn? Yé Élizé é ziin, é sɔ dia ’yi la yé é kini ékema yé é gié.

¹⁵ Balelayemunu lé ke Jériko yara, wa ye aan wo, wo léé: Éli léli vɔ Élizé ta. Yé wo go a si lɛ zia yé wo dia ’wo bli la a ’lɛ.

¹⁶ Wo lé a lɛ léé: Bé ye, i wuozannu méléna nyanazannu a yɔ fié wɔlɛ vu; é sɔ i lɛ léé, ’wo go izan ginii? Dé Gakelebale léli a sia yé é a dia gɔ do maa? taa, dé é a dia gɔ worona do naa? É a zi pa wo lɛ léé: Té ka wo nwunvɔ lo.

¹⁷ Naa, wo vo a tununa yé é léé: ’Ka wo nwunvɔ. Wo mi yɔ fié wɔlɛ vu nwunvɔ yé wo Éli gini yi yaa yé wo ’ka a ye lɛ lo.

¹⁸ Wo diéra Élizé va, ’té é a Jériko, aan wo, é lé wo lɛ léé: Maa ’ka a fe lɛ ka lɛ léé, té ka go lo loo?

Gyɛzorowenu lé Élizé a kɛlɛ

¹⁹ Flamunu lé Élizé lɛ léé: Bé ye, wo fla ’ko pa fɛna zima na, bé ye fɛan zo, a zo; naa, ana ’yi ’ka néné lo yé ana tɛrɛ ’ka fɛ dɔa lo.

²⁰ É léé: ’Ka da siɛti dɛrɛ nya an lɛ, yé ’ka wɛ zén a gi. Yé wo da a nya a lɛ.

²¹ É go ’yibɔna va yé é wɛ zén a va yé é léé: Gakelebale léma: Maa ’yi ’ko kɛlɛ é zima, yé fɛ do kpen ’ka dan ga lɛ ’yi ’ko lé we ma é dɛrɛ lo, yé ’yi ’ko ’ka dan fɛ dɔle yi ga lɛ é dɛrɛ lo.

²² Yé ’yinu kɛlɛ é zima fɔɔ kyɔ, dére lé Élizé a fe, a yɛrama.

²³ É si ’bɛna yé é go Bétɛl; é a giéna zia bléyian va, pɛniɛnu si fla yé wo we nana a ma, ’té wa fé léé: Palogyɛzan, ’i go loru, palogyɛzan, ’i go loru.

²⁴ É nɔla yé é wo nagini, yé é bale pa wo ma Gakelebale tɔ nya. Yé wi blɛn lé wa laama urisi, wo si pɔrɔ gi fié yé wo pɛniɛnu ’ko va mi yɔ fié wɔlɛ fié gyɛ.

²⁵ É si ’bɛna yé é go Kaamɛl gɔ ma, yé é si ’bɛna yé é go Samari tɛrɛ la.