2 Minwiinzannu 19 - Kazambale lé Sebe Sauunu 1979

Bale Sansérib lé sunyanu faa gyɛ

¹ Minwiinzan Ézékia we ’ko ’ma aan wo, ’élé sɔnu fia yé é bɔlɔ zén ’é ta, yé é go Gakelebale lé kɔn gi.

² Minwiinzan lé kɔnnwiinzan Éliakim koo, sɛbɛgyɛzan Sɛbina koo, Balebanmunu va mi segelenu koo, é wo nwunvɔ balelayezan Amosi be Ézai va, ’té bɔlɔ a é zénle wo ta sɔ nya.

³ Yé wo lé a lɛ léma: Ézékia léma: Yi ’ko a nyané blɛn bleyi nya; we lɛdɔ mi gi yi valé yaragyɛyi lé; naa, né yaa bléyi bɔ, yé a yaa plɛplɛ ’ka lo.

⁴ Dérenu lé Rabasaké a fe, ’té azan, Asirimunu nwiinzan a nwunvɔ Bale yuɛmale sɔnɔle we gi bɛ, dé Gakelebale, ilé Bale a ’maa? Dé Gakelebale ilé Bale é dan we lɛdɔ lɛ wo gi, dérenu lé é a ’ma, wo we maa? Bɛwemalé, ko pɔné kiéné lé ko vo ’ko, ’i bazoro ko tɔ ma.

⁵ Minwiinzan Ézékia wuozannu go Ézai va.

⁶ Yé Ézai lé wo lɛ léma: We lé ka dan a fe lɛ kazan lɛ, yee lé ke ’ko: Gakelebale léma: An sɔnɔdérenu lé Asirimunu nwiinzan lé nwunvɔzannu a fe, ’té ka a ’ma bɛ, té ’wo kana vɔ i gi lo.

⁷ Maa dan bli do vɔ lɛ a gi yé é dan we do ’ma lɛ yé é dan nɔla lɛ ébo lé tɛrɛ la; yé maa dan a gyɛ lɛ gwɔun nya élé tɛrɛ la.

⁸ Rabasaké a ’ma léé, ézan si Lakis, amalé é si Jérusalɛm yé é go a va, ’té ’bɛ a guli danna Libina va.

⁹ Yé Asiri munu nwiinzan we do ’ma Étiopi munu nwiinzan Tiiaka tawe nya; wo lé a lɛ léé: Bé ye, é zi sia guli danle we gi i va. Yé Asiri mununwiinzan munu nwunvɔ é ziin Ézékia va a fele nya léé:

¹⁰ ’Ka fe Juda mununwiinzan Ézékia lɛ léma: Ilé Bale lé i bli ke a lɛ bɛ, té é i saan a fele nya léé, wo ’ka dan Jérusalɛm pa lɛ Asirinu nwiinzan lee lo, lo.

¹¹ Bé ye, we lé Asiri mununwiinzannu a kɛlɛ tɛrɛnu faa lɛ, wo wo guru zana a gi fɛan zo, bé ’ma ’naan, ’té bii, i dan si lɛ we gii?

¹² Bɛnnu lé an tinu wo guru zana a gi, Gozan koo, Karan koo, Rɛsɛf koo, Édɛn benu lé ke Télasaa koo, wolé balenu wo si we gii?

¹³ Amat koo, Aapad koo, Séfaavaim valé Éna valé Iva koo, wo nwiinzannu a kyɛɛn?

¹⁴ Ézékia sɛbɛ si nwunvɔzannu lee yé é a ta fe. ’Bɛ zuo é go Gakelebale lé kɔn gi yé é a fuo Gakelebale ’lɛ,

¹⁵ yé é bazoro Bale lɛ ’ko zo léé: Gakelebale, Izraɛl lé Bale lé é ke é nyanale sérubɛnnu méléna, bii ɛ ke tɛrɛ la bɛnnu faa lé Bale nya, bii do kpen; bii ɛ ke lanu valé tɛrɛ kɛlɛzan nya.

¹⁶ Gakelebale, ’i an ban i tɔné nya, yé ’i tɔné dɔ an lɛ. Gakelebale, ’i yuɛ fuo yé bé nagini. Sansérib lé é Rabasaké nwunvɔ Bale yuɛmale sɔnɔle we gi, bé dére ’ma ma.

¹⁷ Oo Gakelebale, é a webozen nya léé, Asiri mununwiinzannu bɛnnu kulu ga yé wo wolé tɛrɛnu sɛrɛ

¹⁸ yé wo wolé balenu vuli kyɛ va; naa, wo ’ka balenu nya lo, mi bɛ panyanama lé wa kɛlɛ yili valé gɔlɛ nya, yee lé ke wo nya; yé wo wo kɛlɛ é boa.

¹⁹ Sin, Gakelebale, kolé Bale! ’I ko si Sansérib lee ma, yé tɛrɛ la bɛnnu faa a gi dɔɔ léé, bii do kpen ɛ ke Bale nya, oo Gakelebale!

²⁰ Yé Amosi be Ezai we pa Ézékia lɛ zia léé: Gakelebale, Izraɛl lé Bale léma: Ba lé bé zoro an lɛ Asiri mununwiinzan Sansérib lé we ma, maa ’ma.

²¹ Dére lé Gakelebale a fe a mawe nya, yee lé ke ’ko: Blɛn lé é ’ka tan gɔné dɔɔ lɛ lo, Siɔn lu, Éé serele boo i ma, éé we nanaan i ma, Jérusalɛm lu Éé ’wuo nyɔɔn‐an i zuo.

²² Mi kyɛn lé bé sɔnɔ yé i bɔrɔ yéli a maa? Mi kyɛn ta lé i siaan? I yuɛ fuoan plɛplɛ Izraɛl lé Mi Sauun ma.

²³ I wuozannu dére nya lé i Mizan sɔnɔ Yé bii léé: Anlé goro kiɛre nya lé Maa gɔnu gié Yé an bɔ Liban gɔnu nwiin; Alé sɛdrɛyili grɔgrɔnu koo, Alé siprɛyili nɔnɔmi koo, maa dan wo vɔ lɛ, An dan bɔ lɛ a gɔ voélazan nwiin, An dan bɔ lɛ alé pɔrɔ wɔlɛ gi;

²⁴ Maa gurunu bo yé maa a gi ’yinu mini, Maa Éjipiti lé yuunu faa béli An gane nya.

²⁵ I ’ka a gi dɔɔa léé, maa we ’konu ma’lɛrɛ ana mɔn Yé maa wo dɔ an bli gi é kwakwa loo? Sin, an bɔngiwe lɛ sɔɔ Amalé i fla plɛplɛnu guru zana a gi.

²⁶ Plɛplɛ ’ka ana munu lee lo, Kana a wo gi yé wo gona ’ka lo. Wa bélé féifɛnu valé luyɛ drɔɔdrɔɔ zo, Wa bélé kɔn gwa la dinin Valé ’sa lé a ma yuru, ’té a turu ’ka lo, wo zo.

²⁷ Naa, dé i nyanaoo, dé i bɔraoo, dé i wɔraoo, maa a gi dɔɔ, Dé i bli fli an ma, maa a gi dɔɔ.

²⁸ I bli fli an ma, Yé maa ilé an naginile i yuɛ zuo ye, Amalé maa dan foliɛwɔlɛ vɔ lɛ i nyé gi, yé maa dan wisoo ’léé foliɛwɔlɛ wɔra lɛ i ’léé, Yé zi lé i da a ta, maa dan i nɔla lɛ yee zi duo ta.

²⁹ We ’ko é dan kɛlɛ lɛ tɔmase nya i lɛ: Lɛɛ ’ko gi, fɛwɔlɛ lé é dia yé é tin é boan, yee lé ka dan a ble lɛ; lɛɛ fiézan gi, fɛ lé éé tin‐é é boan, yee lé ka dan a ble lɛ; naa, lɛɛ yaazan gi, ka dan fɛwɔlɛ nwɛɛn lɛ, ka dan fɛ gyɛ lɛ, ka dan dɔrɔ suru lɛ yé ka dan a poro ble lɛ.

³⁰ Juda lé munu sɛ lé é dan si lɛ we gi bɛ, wo lé wo vo, wo suni é dan wɔra lɛ, yé wo dan fan lɛ di.

³¹ Naa, wo sɛné é dan vo lɛ Jérusalɛm, sowegizannu é dan kɛlɛ lɛ Siɔn gɔ ma. Lai sunyanu lé Gakelebale lé we kɛlɛle é sɔbɛla nya ma lé we ’ko é dan kɛlɛ lɛ.

³² Bɛwemalé Gakelebale we fe ’ko zo Asiri mununwiinzan ma we nya, léé: É ’ka dan wɔra lɛ fla ’ko ta lo, É ’ka dan sawɔlɛ vuli lɛ ana lo, É ’ka dan mibotakuunfɛ gɔɔn lɛ ana lo, Yé é ’ka dan tɛrɛ zun dɔ lɛ ana lo.

³³ Zi lé é da a ta, é dan diéra lɛ yee zi duo ta, É ’ka dan wɔra lɛ fla ’ko ta lo, Gakelebale ɛ fe.

³⁴ Ma dan fla ’ko takuun lɛ, a sile we gi we ma, Maa koo, an wuozan David koo, kolé we ma.

³⁵ ’Bɛ béli duo nya, Gakelebale lé lanje da yé é munu gyɛ Asirinu lé sɔkɔn dɔna mi baa yɔ ziɛn wɔlɛ vu ta fié, é ta lé mi wuru soru. Wo nwa bladi aan wo, bé ye, migalenu saa lé.

³⁶ Yé Asiri mununwiinzan Sansérib élé sɔkɔnnu zun yé é si ana yé é go é pa gi; yé é vo Ninive.

³⁷ Naa, bléyian va lé é ke é yiale é bli la élé bale Nisrɔk lé kɔn gi, a benu Adramélɛk valé Sarɛsɛɛ a gyɛ gwɔun nya yé wo vɔ fli gi Ararat tɛrɛ la. Yé a be Ézaa‐Adɔn pla munu nwiin a pa gi.