2 Minwiinzannu 18 - Kazambale lé Sebe Sauunu 1979

Juda nwiinzan blɛn Ézékia

¹ Izraɛl nwiinzan blɛn Éla be Ozé plale mi nwiin lɛɛ yaazan nya Judanu nwiinzan blɛn Akaz be Ézékia pla munu nwiin.

² É kɛlɛ minwiinzan nya aan wo, ’té a lɛɛ a yɔ do wɔlɛ soru, yé é pla munu nwiin lɛɛ yɔ do wɔlɛ sɔraziɛn Jérusalɛm. Wa bu laama Zakari lu Abi.

³ We lé ke é drɔle Gakelebale yuɛ gi, yee lé é a kɛlɛ, a tra David a kɛlɛ fɛan zo, a zo ’kyɛ.

⁴ É gɔ nwiin yobannanu sɛrɛ, yé é miyilinu yéli yé é yo ’wuo ’wii, yé zénéméné lé Moizi a kɛlɛ é ’bɛ yéli télétéléné, naa, Izraɛl lé nénu éé lasikɔrɔ kyɛ blé a lɛ yifaama; wa laama Néusitan.

⁵ A bli vo Gakelebale, Izraɛl lé Bale lɛ; Juda nwiinzannu lé wo da a zuo, é valé wonu lé wo ke a ’lɛ é vinin, a pamazan ’ka lo.

⁶ É yere Gakelebale ma, yé é ’ka diéra lɛ a zuo lo, yé bélidɔwenu lé Gakelebale a fe Moizi lɛ, é wo kɛlɛ.

⁷ Yé Gakelebale kɛlɛ Ézékia va, yé we faa lé é a pélisia, é a ’wuo pla. É nwa Asiri nwiinzan blɛn ma, yé é ’ka pla lɛ a wuo é dɛrɛ lo.

⁸ É Filisitinu gyɛ fɔɔ Gaza yé é wolé tɛrɛ ’wii, é sia flataginizannu lé kɔn torole ma fɔɔ yé é bɔ fla plɛplɛnu ma.

⁹ Ézékia lɛɛ ziɛnzan lé ke Izraɛl nwiinzan Éla be Ozé lɛɛ sɔrafiézan nya, Asiri nwiinzan blɛn Salmanazaa nwa Samari ma yé é a mabɛn.

¹⁰ É a si lɛɛ yaa nyaale zuo, Ézékia lɛɛ suiɛdozan nya, Izraɛl nwiinzan Ozé lɛɛ sɔraziɛnzan nya; yé wo Samari si.

¹¹ Asiri nwiinzan blɛn go Izraɛl nya luu gi Asiri tɛrɛ la, yé é wo nyana Salaki koo, Sabɔɔ yuu lé ke Gozan tɛrɛ la, a gɔ la koo, Mɛdenu lé flanu koo, wona;

¹² wo ’ka tɔné dɔ lɛ Gakelebale, wolé Bale dére lɛ lo, yé wo alé gipawe sɛrɛ, yé we lé Gakelebale wuozan Moizi wo béli dɔ a nya, wo ’ka ’wo tɔné dɔ lɛ a lɛ lo, yé wo ’ka tawo lɛ a ta lo, azama.

Asirinu Jérusalɛm mabɛn

¹³ Minwiinzan blɛn Ézékia plale mi nwiin lɛɛ vu ta ziɛnzan nya, Asiri nwiinzan blɛn Sansérib nwa Juda lé fla plɛplɛnu ma, yé é wo faa si

¹⁴ Juda nwiinzan Ézékia we pa Asiri nwiinzan lɛ zia Lakis léé: An saan. ’I si an ma baa. Dé i ban dɔ an nwiin maa dan a wo lɛ. Yé Asiri nwiinzan blɛn gɔɔlifu talan wuru do yɔ soru valé kyan talan yɔ do wɔlɛ vu ban dɔ Juda nwiinzan Ézékia nwiin.

¹⁵ Gɔɔlifu lé ke Gakelebale lé kɔn gi valé yee lé ke fɛwezannu va minwiinzan blɛn lé kɔn gi, Ézékia a faa nɔ.

¹⁶ Kyan lé Juda nwiinzan Ézékia Gakelebale lé kɔn duoli valé a duoli yili ma sɔɔla a nya, é a si wo ma sin, yé é a nɔ Asiri nwiinzan blɛn lɛ.

¹⁷ Taatan koo, Rab‐Saris koo, Rabasaké koo, gulidansunya plɛplɛnu koo, Asiri nwiinzan blɛn wo pa zia léé, ’wo si Lakis yé ’wo go minwiinzan blɛn Ézékia va Jérusalɛm. Wo nwa yé wo go Jérusalɛm. Wo bɔ aan wo, wo dɔ ’yidoo lé ke loru, a yoro sɔnɔ, ’té ’bɛ a sɔgibɔzan lé féi zi ’léé.

¹⁸ Wo minwiinzan blɛn laa; yé minwiinzan blɛn lé kɔn nwiinzan Ilkija be Éliakim koo, sɛbɛgyɛzan Sɛbina koo, sɛbɛtadɔzan Azafa be Joak koo, wo go wo va.

¹⁹ Rabasaké lé wo lɛ léma: ’Ka fe Ézékia lɛ léma: Minwiinzan blɛn, Asiri mununwiinzan blɛn léma: Mɛ fɛ ta lé i ke é palee?

²⁰ I léé: Dé mi léé, ’é guli dan, a mawe a plɛplɛ valé gikinile gi. Naa, i dérenu éé giéan an tɔné la bélé fu zo. I pale a mi kyɛn ɛ ta yé i léé, ’é nwa an maa?

²¹ Bé ye do, i pale a Éjipiti ta. Gyan yélile lé bé si i dɔgi plɛplɛ fɛ nya, ’té dé miomian é dɔ a ta, éé ’bɛ bɛ fɔn‐o; ’bɛ zo lé Éjipiti tɛrɛlamunu nwiinzan ke, munu faa lé wo pale ke a ta, wo lɛ.

²² Dé i dan a fe lɛ an lɛ léé, ’wo pale a Gakelebale ’wozé Bale ɛ taa? A bannanu valé alé gɔ nwiin yobannanu lé Ézékia a sɛrɛ ’té é a fé Judanu valé Jérusalɛm munu lɛ léé, ’wo dia ’wo bli la balebanna lé ke Jérusalɛm, yee do kpen ɛ ’lɛ, yee Bale kaan loo?

²³ Sin, ’i gi pa do anzan Asiri nwiinzan blɛn va, yé maa dan wisoo baa do nɔ lɛ i lɛ, ’té dé i bɔaléé, i wotazannu yee?

²⁴ Anzan lé sunya nwiinzannu lé wo ’ka mi blɛnnu nya lo, bé kɛla kaa yé i wo va mi do kpen biin? I pale a Éjipiti munu ta léé, wo dan gulidangoronu valé wisootazannu nɔ lɛ ka lɛ.

²⁵ É ziin, é ’ka Gakelebale lé blibɔmawe nya léé, an nwa fɛkona ma yé maa a sɛrɛ loo? Gakelebale lé an lɛ léé, ’an nwa tɛrɛ ’ko ma, ’maa sɛrɛ.

²⁶ Ilkija bi Éliakim koo, Sɛbina valé Joak koo, wo lé Rabasaké lɛ léé: ’I we fe ko, i wuozannu lɛ Aramé dére gi, naa, ko ’bɛ gi maan; té i we fe ko lɛ Juda dére gi lo, munu lé wo ke é dɔle flagɔrɔ ta, dé wo da ’ma.

²⁷ Rabasaké a zi vɔ léé: Anzan an nwunvɔ dére ’konu fele we gi ka valé izan lɛɛ? É ’ka an nwunvɔ lɛ munu lé wo ke é nyanale flagɔrɔ ta, ’té ka valé wonu é dan wo bo ble lɛ yé ka wo wo mini, wo va loo?

²⁸ ’Bɛ zuo, Rabasaké bié yé é we fe é dére plɛplɛ nya Juda dére gi léé: ’Ka tɔné dɔ minwiinzan blɛn, Asirinu nwiinzan blɛn dére lɛ.

²⁹ Minwiinzan blɛn léma: Té Ézékia é dabli kɛlɛ ka lɛ lo, naa, é ’ka bɔa ka sile lɛ we gi lo.

³⁰ Dé Ézékia a fe ka lɛ léé, Gakelebale é dan ka si lɛ a lee, Asirinu nwiinzan ’ka dan fla ’ko si lɛ lo, té ka bli é vo Gakelebale lɛ Ézékia dére ta lo.

³¹ Té ka tɔné dɔ Ézékia lɛ lo; naa, Asirinu nwiinzan léma: ’Ka yɔfalo fu nwa ’é lɛ, ’ka da ’é va, yé ka faa do do ka dan kalé dɔrɔporo valé bɔrɔyiliporo ble lɛ, yé ka dan ’yi mini lɛ kabo lé ’yiguru gi,

³² fɔɔ yé é da yé é go ka nya, tɛrɛ lé ke bélé kalé tɛrɛ zo, ’té ’sa valé dɔrɔ ana kiɛre, ’té fɛblele valé dɔrɔféinu koo, ɔliviyilinu valé zɔrɔnyɔnɔ koo, wo ana kiɛre, a ta, yé ka vo é yuɛma yé ka ’ka gaan lo. Té ka tɔné dɔ Ézékia lɛ lo; naa, é bɔalɛ léé, é ka saan a fele nya léé, Gakelebale é dan kaa si lɛ we gi.

³³ Bɛn bɛnu bɛ, wozé balenu wo so Asirinu nwiinzan lee?

³⁴ Amat munu valé Aapad munu lé balenu a kyɛɛn? Séfaavaim koo, Éna koo, Iva koo, ana munu lé balenu a kyɛɛn?

³⁵ Tɛrɛ ’konu lé balenu faa va, a kyɛn ɛ élé tɛrɛ si an lee? Yé Gakelebale é dan Jérusalɛm si lɛ an lee?

³⁶ Naa, wo nwiinzan a fe wo lɛ léé: Té ka we zi pa a lɛ lo, amalé munu tadɔ yé wo ’ka we do kpen si lɛ a ta a zi lo.

³⁷ Yé Ilkija be Éliakim lé ke minwiinzan lé kɔn nwiinzan nya, ’bɛ koo, sɛbɛgyɛzan Sɛbina koo, sɛbɛtadɔzan Azafa be Joak koo, wo go Ézékia va, ’té wo ’wolé sɔnu fia, yé wo Rabasaké dére fe a lɛ.