2 Minwiinzannu 17 - Kazambale lé Sebe Sauunu 1979

Izraɛl nwiinzan blɛn voélazan Ozé

¹ Juda nwiinzan Akaz plale mi nwiin lɛɛ vu ta fiézan nya, Éla be Ozé pla Izraɛl nwiin Samari. É pla munu nwiin lɛɛ sɔraziɛn.

² We lé ke é naané Gakelebale yuɛ gi, yee lé é a kɛlɛ, naa, é ’ka a kɛlɛ lɛ kiɛre bélé Izraɛl nwiinzannu lé ke a ’lɛ, wozé zo lo.

³ Asiri nwiinzan Salmanazaa nwa a ma. Ozé pla a wuo, yé é gɔɔli banwo a lɛ.

⁴ Naa, Asiri nwiinzan blɛn a ’ma léé, ’é ma we dɔ Ozé gi, yé Ozé munu nwunvɔ Éjipiti nwiinzan blɛn So va, yé é ’ka gɔɔli banwoo Asiri nwiinzan lɛ lɛɛ ma lɛɛ ma é dɛrɛ lo. Yé Asiri nwiinzan a kun yé é gɔgɔbale vɔ a ma bokɔn gi.

⁵ Yé Asiri nwiinzan gié ana tɛrɛ faa la yé é é go Samari yé é a mabɛn lɛɛ yaa.

⁶ Ozé lɛɛ sɔraziɛnzan nya Asiri nwiinzan blɛn Samari si yé é go Izraɛl nya luu gi Asiri tɛrɛ la. É wo nyana Salaki valé Sabɔɔ yuu lé ke Gozan tɛrɛ la, a gɔ la, é valé Mɛdenu lé flanu ta.

Wean ma lé Asirinu Samari si

⁷ Gakelebale, Izraɛl munu lé Bale, lé é wo si Éjipiti tɛrɛ la, Éjipiti nwiinzan blɛn Faraɔn lee, Izraɛl munu wenyané kɛlɛ a ma yé wo kana bale bɛnu lee, amalé we ’ko bɔ.

⁸ Bɛnnu lé Gakelebale wo bin Izraɛl munu ’lɛ, wo wolé gɔnɔlawe kɛlɛ, é valé gɔnɔlawe lé Izraɛl nwiinmunu a pélisia, wo nya.

⁹ Wenu lé wo ’ka é zima lo, Izraɛl lé nénu a kɛlɛ Gakelebale, wolé Bale ma, kyeen gi. Wo gɔ nwiin yobannanu kɛlɛ ’wolé fla faa ta, é sia fla taginizannu lé kɔn torole ma fɔɔ yé é bɔ fla plɛplɛnu ma.

¹⁰ Wo miyilinu valé yofotonu dɔ gɔ grɔgrɔ faa nwiin valé yili drɔɔdrɔɔ faa wuo.

¹¹ ’Bɛna lé woo lasikɔrɔ kyɛ blé gɔ nwiin yobannanu faa na, bɛnnu lé Gakelebale wo bin wo ’lɛ, wa kɛlɛ fɛan zo, a zo, yé wenaanénu kɛlɛle nya lé wo Gakelebale bli fli.

¹² Miyilinu lé Gakelebale wo ma we fe léé, té ’wo wo bɔ lo, wo wo bɔ.

¹³ Gakelebale we pla Izraɛl valé Juda lɛ élé balelayezannu faa valé fɛnayezannu faa lɔlu nya, yé é lé wo lɛ léé: ’Ka si kalé zi naané ta, ’ka tawo anlé bélidɔwe yɛrama, ’ka an déretawe kɛlɛ, yé bélidɔwe lé maa a fe ka tranu lɛ yé maa a pa ka lɛ zia an wuozannu balelayezannu nya, ’ka a faa kɛlɛ tegele.

¹⁴ Naa, wo ’ka ’wo tɔné dɔ lɛ lo, yé wo kɛlɛ tɔnégiplɛplɛzannu nya bélé wo tranu lé wo ’ka bli vo lɛ Gakelebale, wolé Bale lɛ lo, wo zo.

¹⁵ Wo sɔn vɔ alé bélidɔwe koo, gipawe lé é a kɛlɛ wo tinu va koo, wenu lé é a pla wo lɛ koo, wo ma. Wo go boafɛnu zuo yé wobozen kɛlɛ boazannu nya, yé bɛnnu lé ke wo zi, wo go wo zuo, dɔlé ’té Gakelebale a yi ga wo lee léé, té ’wo wo zuo sona lo.

¹⁶ Wo Gakelebale, wolé Bale lé bélidɔwenu faa vo, yé wo diriné serele fié kɛlɛ, wo Asataté miyilinu kɛlɛ, wo dia ’wo bli la lagi fɛnu faa ’lɛ, yé wo Baal bɔ.

¹⁷ Wo ’wo benu valé ’wo lunu vɔ kyɛ va yé wobo nɔ ’moné dɔle valé yo kɛlɛle lɛ, yé we lé ke é naané Gakelebale yuɛ gi, wo ’wobo dan a kɛlɛle we ma, Gakelebale bli flile we gi.

¹⁸ É ziin, Gakelebale bli fli wo ma é baba yé é wo si é yara baa. Juda bɛn do kpen ɛ vo.

¹⁹ Judanu bozen‐oo, wo ’ka tawo lɛ Gakelebale wolé Bale lé bélidɔwe ta lo, yé wo go Izraɛl lé gɔnɔlawe zuo.

²⁰ Gakelebale sɔn vɔ Izraɛl bɛn faa ma; é wo gyɛ yara nya yé é wo pa ’wiiéwotamunu lee, yé é a ’wuo pla wo binle nya é yara baa.

²¹ Naa, Izraɛl kan kini David lé munu ma, yé wo Nébat be Jéroboam dɔ ’wo nwiinzan blɛn nya, yé ’bɛ wo si Gakelebale zuo yé ’bɛ Izraɛl kɛlɛ wenyané blɛɛn kɛlɛzannu nya.

²² Wenyanénu faa lé Jéroboam a kɛlɛ, Izraɛl munu wobo nɔ a faa kɛlɛle lɛ; wo ’ka ’wo yara si lɛ wo ta lo,

²³ fɔɔ yé Gakelebale Izraɛl bin é yara baa, fɛan zo lé é a fe é wuozannu Balelayezannu faa lɔlu nya, a zo. Yé wo go Izraɛl munu nya luu gi wolé tɛrɛ ma baa, Asiri tɛrɛ la, ana lé wo vo fɔɔ kyɔ yi nya.

Asiri munu nyana Samari Izraɛl tɛrɛ la

²⁴ Babilɔn munu koo, Kuta munu koo, Ava munu koo, Amat munu koo, Séfaavaim munu koo, Asirinu nwiinzan da wo nya yé é wo nyana Samari lé flanu ta Izraɛlnu pa gi. Wo Samari tɛrɛ kɛlɛ ’wozé nya, yé wo nyana ana flanu ta.

²⁵ Wo nyana ana aan wo, wo ’ka kanaan Gakelebale lee lo, yé Gakelebale golizranu nwunvɔ wo ma, yé ’bɛnu wo gyɛ.

²⁶ Wo lé Asirinu nwiinzan blɛn lɛ léé: Bɛnnu lé i da wo nya yé i wo nyana Samari lé flanu ta bɛ, wo ’ka tɛrɛ ’ko lé Bale bɔbɛ dɔɔa lo, yé é golizranu nwunvɔ wo va, yé ’bɛnu wo gyɛ, wo ’ka tɛrɛ ’ko lé Bale bɔbɛ dɔɔa lo, azama.

²⁷ Asirinu nwiinzan blɛn léma: Balebanzannu lé wo wo kun Samari yé wo go wo nya luu gi, wo va mi do ’é go yé ’é nyana ana, yé ’é ana Bale bɔbɛ paa wo gi.

²⁸ Balebanzan do lé, wa si Samari yé wo goan luu gi, é da yé é nyana Bétɛl, yé é a lé wo kana Gakelebale lee fɛan zo, é a paa wo gi.

²⁹ Naa, bɛn faa ’wolé balenu kɛlɛ ’wo nyanafla ta do do, yé wo wo dɔ kɔnnu gi, gɔ nwiin yobannanu lé Samari munu a kɛlɛ, wona.

³⁰ Babilɔn munu Sukɔt‐Bénɔt kɛlɛ, Kuta munu Nɛɛgal kɛlɛ, Amat munu Asima kɛlɛ,

³¹ Ava munu Nibikaz valé Taatak kɛlɛ; Séfaavaim munu wolé nénu kyɛ ble, Séfaavaim lé balenu Adramélɛk valé Anamélɛk bɔle we gi.

³² Woo kanaan Gakelebale lee é ziin, yé wo munu si munu faa méléna yé wo wo dɔ balebanzannu nya gɔ nwiin yobannanu na; balebanmunu ’ko wolé sarakanu boo gɔ nwiin yobanna kɔnnu gi.

³³ ’Bɛ zo lé woo kanaan Gakelebale lee, ’té woo ’wolé balenu bɔa a bléyi duo nya, bɛnnu lé wo si wo va, wo kɛlɛwe yɛrama.

³⁴ We lé wa kɛlɛ é vinin, wa yee duo kɛlɛna tan kyɔ; wo ’ka kanaan Gakelebale lee lo; wolé bélidɔwe koo, wolé déretawenu koo, bélidɔwe valé é sɔnnénu lé Gakelebale a fe Jakɔb lé é a laa Izraɛl, alé nénu lɛ koo, wo ’ka tawoo a do kpen ta lo.

³⁵ Gakelebale é gi pa do wo va yé é a yi ga wo lee léé, Té ka kana bale bɛnu lee lo; té ka dia ka bli la wo ’lɛ lo, té ka wo bɔ lo, té ka saraka bo wo lɛ lo.

³⁶ Naa, Gakelebale lé é ka si Éjipiti tɛrɛ la plɛplɛ blɛn valé é bɛ soile nya, ’ka kana a lee; ’ka dia ka bli la yee ɛ ’lɛ; ’ka saraka bo yee ɛ lɛ.

³⁷ Alé weplalenu koo, a déretawenu koo, bélidɔwe valé a sɔnnénu koo, wo faa lé é a gyɛ ka lɛ bɛ, ’ka wo kɛlɛ yé ’ka tawo wo yɛrama yifaama, yé té ka kana bale bɛnu lee lo.

³⁸ Gipawe lé maa kɛlɛ ka va, té ka gi é san a ma lo, yé té ka kana bale bɛnu lee lo.

³⁹ Naa, ’ka kana Gakelebale, kalé Bale ɛ lee; yé é dan ka si lɛ ka nyanézannu faa lee.

⁴⁰ Yé wo ’ka a lɛdɔ lɛ a ma lo, yé we lé wa kɛlɛ é vinin, wo vo ’bɛ kɛlɛna.

⁴¹ Bɛnnu ’ko, woo kanaan Gakelebale lee, ’té woo ’wolé miyilinu bɔa; we lé wo tinu a kɛlɛ, yee lé wolé nénu valé wolé néné zi nénénu vo a kɛlɛna fɔɔ kyɔ.