2 Minwiinzannu 15 - Kazambale lé Sebe Sauunu 1979

Juda nwiinzan Azaria Izraɛl nwiinzannu: Zakari, Salum, Ménaɛm, Pékasia, Pékas

¹ Izraɛl nwiinzan blɛn Jéroboam lɛɛ yɔ do wɔlɛ sɔrafiézan nya, Juda nwiinzan blɛn Amasia be Azaria pla munu nwiin.

² É kɛlɛ minwiinzan nya bléyian va, ’té a lɛɛ a vu ta suiɛdo, yé é pla munu nwiin lɛɛ yɔ fié wɔlɛ vu ta fié Jérusalɛm. A bu a Jérusalɛm le lé, wa laama Jékolia, a nya.

³ We lé ke é drɔle Gakelebale yuɛ gi, yee lé é a kɛlɛ, a ti Amasia a kɛlɛ fɛan zo, a zo.

⁴ Naa, we do ana, é ’ka gɔ nwiin yobannanu yi ga lɛ lo; munu éé sarakanu boo, ’té woo lasikɔrɔ no gɔ nwiin yobannanu ta.

⁵ Gakelebale minwiinzan blɛn bla yé é kɛlɛ pantɛngyɛzan nya fɔɔ yé é ga, ’té éé nyanaan kɔn do gi é yɛrama. ’Té minwiinzan be Jotan ɛ ke a bɛgizan nya, ’té é ana tɛrɛ la munu lé we blé.

⁶ Azaria kɛlɛwe pɔnénu koo, we faa lé é a kɛlɛ koo, wa é gyɛle Juda nwiinzan blɛnnu lé we zuo fe sɛbɛ gi.

⁷ Azaria yi gyɛ é tranu va yé wa pa é tranu va David lé fla. Yé a be Jotan pla munu nwiin a pa gi.

⁸ Juda nwiinzan blɛn Azaria lɛɛ yɔ do wɔlɛ vu ta sɔraazan nya, Jéroboam be Zakari pla Izraɛl nwiin Samari. É pla wo nwiin moné suiɛdo.

⁹ We lé ke é naané Gakelebale yuɛ gi, yee lé é a kɛlɛ, a tinu a kɛlɛ fɛan zo, a zo; Nébat be Jéroboam lé é Izraɛl kɛlɛ wenyané kɛlɛzannu nya, é ’ka é yara si lɛ ’bɛ lé wenyané kɛlɛle ta lo.

¹⁰ Jabɛs be Salum a ma we ble, é a bla munu faa yuɛ va, yé é a gyɛ yé é ga; yé é pla munu nwiin a pa gi.

¹¹ Zakari kɛlɛwe pɔnénu a é gyɛle Izraɛl nwiinzan blɛnnu lé we zuo fe sɛbɛ gi.

¹² ’Bɛ zo lé dére lé Gakelebale a fe Jéu lɛ, a lɛ sɔɔ; é léé: I benu é dan nyana lɛ Izraɛl lé webleblin ta fɔɔ yé é bɔ i kulu ziɛnzan ma.

¹³ Jabɛs be Salum pla munu nwiin Juda nwiinzan blɛn Ozias lɛɛ yɔ do wɔlɛ vu ta sɔraziɛnzan nya. É pla munu nwiin moné do Samari.

¹⁴ Gadi be Ménaɛm si Tiisa yé é da Samari, yé é Jabɛs be Salum gyɛ Samari, yé é ga; yé é pla munu nwiin a pa gi.

¹⁵ Salum kɛlɛwe pɔnénu valé mi ma we lé é a ble, wa é gyɛle Izraɛl nwiinzan blɛnnu lé we zuo fe sɛbɛ gi.

¹⁶ Tifasak valé a ta munu koo, alé tɛrɛ faa, é sia Tiisa, ’bɛ koo, Ménaɛm wo gyɛ; wo ’ka flagɔrɔ lɛnu so lɛ a lɛ lo, amalé é wo gyɛ, yé é bɔnlomu faa bɔn gi bo.

¹⁷ Juda nwiinzan blɛn Azaria lɛɛ yɔ do wɔlɛ vu ta sɔraziɛnzan nya, Gadi be Ménaɛm pla Izraɛl nwiin. É pla wo nwiin lɛɛ vu Samari.

¹⁸ We lé ke é naané Gakelebale yuɛ gi, yee lé é a kɛlɛ. Nébat be Jéroboam lé é Izraɛl kɛlɛ wenyané kɛlɛzannu nya, é ’ka é yara si lɛ ’bɛlé wenyanénu ta élé tɛrɛla faa gi lo.

¹⁹ Asiri nwiinzan blɛn Pul da ana tɛrɛ la; yé Ménaɛm gɔɔlifu talan wuru soru nɔ Pul lɛ, ’bɛ bɔle a va we gi yé alé plale munu nwiin ’é dɔ gligli.

²⁰ Ménaɛm gɔɔli ban ’ko si Izraɛl munu faa lé gɔɔli ke wo lee kiɛre, wo lee, a nɔle Asiri nwiinzan blɛn lɛ we gi; é ban dɔ wo faa nwiin gɔɔlifu sikla yɔ fié wɔlɛ vu yé Asiri nwiinzan blɛn nɔla é va yé é ’ka mɔn lɛ tɛrɛ ’ko la lo.

²¹ Ménaɛm kɛlɛwe pɔnénu valé we faa lé é a kɛlɛ, wa é gyɛle Izraɛl nwiinzan blɛnnu lé we zuo fe sɛbɛ gi.

²² Ménaɛm yi gyɛ é tranu va. Yé a be Pékasia pla munu nwiin a pa gi.

²³ Juda nwiinzan blɛn Azaria lɛɛ yɔ fié wɔlɛ vuzan nya, Ménaɛm be Pékasia pla Izraɛl nwiin Samari. É pla wo nwiin lɛɛ fié.

²⁴ We lé ke é naané Gakelebale yuɛ gi, yee lé é a kɛlɛ; Nébat be Jéroboam lé é Izraɛl kɛlɛ wenyané kɛlɛzannu nya, é ’ka é yara si lɛ ’bɛlé wenyanénu ta lo.

²⁵ Alé sunyanu nwiinzan Rémalia be Pékas a ma we ble; ’bɛ a gyɛ Samari, minwiinzan blɛn lé kɔn gi, yé é Aagɔb valé Arié gyɛ ana é ziin; Galaad munu yɔ fié wɔlɛ vu a a va. ’Bɛ zo lé é Pékasia gyɛ, yé é pla munu nwiin a pa gi.

²⁶ Pékasia kɛlɛwe pɔnénu valé we faa lé é a kɛlɛ, wa é gyɛle Izraɛl nwiinzan blɛnnu lé we zuo fe sɛbɛ gi.

²⁷ Juda nwiinzan blɛn Azaria lɛɛ yɔ fié wɔlɛ vu ta fiézan nya, Rémalia be Pékas pla Izraɛl nwiin Samari. É pla wo nwiin lɛɛ yɔ do.

²⁸ We lé ke é naané Gakelebale yuɛ gi, yee lé é a kɛlɛ; Nébat be Jéroboam lé é Izraɛl kɛlɛ wenyané kɛlɛzannu nya, é ’ka é yara si lɛ ’bɛlé wenyanénu ta lo.

²⁹ Izraɛl nwiinzan blɛn Pékas bléyi va, Asiri nwiinzan blɛn Tiglat‐Pilézɛɛ da, yé Ijɔn koo, Abɛl‐Bɛt‐Maaka koo, Janoas koo, Kédɛs koo, Asɔɔ koo, Galaad koo, Galilé koo, Néfitali lé tɛrɛ faa koo, é wo si, yé é go ana munu nya luu gi Asiri tɛrɛ la.

³⁰ Éla be Ozé é Rémalia be Pékas ma we ble, é a gyɛ yé é ga; yé é pla munu nwiin a pa gi Ozias be Jotam lé plale munu nwiin lɛɛ yɔ dozan nya.

³¹ Pékas kɛlɛwe pɔnénu valé we faa lé é a kɛlɛ, wa é gyɛle Izraɛl nwiinzan blɛnnu lé we zuo fe sɛbɛ gi.

Juda nwiinzan blɛn Jotam

³² Izraɛl nwiinzan blɛn Rémalia be Pékas plale mi nwiin lɛɛ fiézan nya, Juda nwiinzan blɛn Ozias be Jotam pla munu nwiin.

³³ É kɛlɛ minwiinzan blɛn nya bléyian va, ’té a lɛɛ a yɔ do wɔlɛ soru, yé é pla munu nwiin Jérusalɛm lɛɛ vu ta suiɛdo. Wa bu laama Sadɔk lu Jérusa.

³⁴ We lé ke é drɔle Gakelebale yuɛ gi, yee lé é a kɛlɛ; é we kɛlɛ é ti Ozias kɛlɛwe zo ’kyɛ.

³⁵ Naa, we do ana, é ’ka gɔ nwiin yobannanu yi ga lɛ lo; munu éé sarakanu boo, ’té woo lasikɔrɔ no é ziin gɔ nwiin yobannanu ta. Jotam Gakelebale lé kɔn duoli loruzan vɔ.

³⁶ Jotam kɛlɛwe pɔnénu valé we faa lé é a kɛlɛ, wa é gyɛle Juda nwiinzan blɛnnu lé we zuo fe sɛbɛ gi.

³⁷ Bléyi ’ko va lé Gakelebale kun munu nwunvɔle ma Juda ma; Siri nwiinzan blɛn Rɛsɛn valé Rémalia be Pékas lé.

³⁸ Jotam yi gyɛ é tranu va yé wa pa é tranu va é tra David lé fla. Yé a be Akaz pla munu nwiin a pa gi.