2 Minwiinzannu 14 - Kazambale lé Sebe Sauunu 1979

Juda nwiinzan blɛn Amasia

¹ Izraɛl nwiinzan blɛn Joakaz be Joas lɛɛ fiézan nya Juda nwiinzan blɛn Joas be Amasia pla munu nwiin.

² Bléyian va lé é kɛlɛ minwiinzan blɛn nya, ’té a lɛɛ a yɔ do wɔlɛ soru, yé é pla munu nwiin lɛɛ yɔ do wɔlɛ sɔraziɛn Jérusalɛm. A bu a Jérusalɛm le lé wa laama Joadan, a nya.

³ We lé ke tegele Gakelebale yuɛ gi, yee lé é a kɛlɛ, naa, é ’ka a kɛlɛ lɛ bélé é tra David zo lo; a ti Joas we kɛlɛ fɛan zo, é we kɛlɛ a zo ’kyɛ.

⁴ Naa, we do ana, é ’ka gɔ nwiin yobannanu yi ga lɛ lo; munu éé sarakanu boo ’té woo lasikɔrɔ no gɔ nwiin yobannanu ta.

⁵ Dé alé plale mi nwiin dɔ gligli, a wuozannu lé wa ti minwiinzan blɛn gyɛ, é wo gyɛ.

⁶ Naa, é ’ka wo benu gyɛ lɛ lo. We lé é ke é gyɛle Bale lé bélidɔwe gi, Moizi lé sɛbɛ gi, a yɛrama lé é we kɛlɛ. Sɛbɛ ’ko gi lé Gakelebale bélidɔwe nɔ, léé: Té wo né tinu gyɛ ’wolé nénu lé we ma lo, yé té wo nénu gyɛ ’wo tinu lé we ma lo. Naa, ’wo mi faa do do gyɛ ébo lé wenyané ma.

⁷ É Édom munu gyɛ mi baa soru wɛgɔ worona; bléyian va lé wa guli danna é Séla si yé é a tɔ nɔla Jokotɛl, yé tɔ ’ko vo a ma fɔɔ kyɔ.

⁸ Yé Amasia munu nwunvɔ Izraɛl nwiinzan blɛn Jéu be Joakaz be Joas va, a fele a lɛ we gi léé: ’I da, ko ko ke yara ye.

⁹ Yé Izraɛl nwiinzan blɛn Joas we pa Juda nwiinzan blɛn Amasia lɛ zia léé: Liban léliyili we pa Liban lé sɛdrɛyili lɛ zia léé: ’I i lu nɔ an be lɛ a na nya. Yé bwigiwinu lé ke Liban, wo gié yé wo léliyili yéli wo gane nya.

¹⁰ I Édom munu kele aan wo bɛ, amalé i ibo kɛlɛ blɛn ibo zevɔle nyaa? Sin, i gi ’é nana i tɔ gi yé ’i vo i va. Boawe lé é dan bii valé Juda munu sɛrɛ lɛ ’naan, mɛmalé i kun ’bɛ kɛlɛle maa?

¹¹ Naa, Amasia ’ka é tɔné dɔ lɛ a lɛ lo. Yé Izraɛl nwiinzan blɛn Joas nwa; yé yee valé Juda nwiinzan blɛn Amasia wo ke yara ye Bɛt‐Sémɛs lé ke Juda tɛrɛ la, ana.

¹² Izraɛlnu Judanu kele, yé wo vlanburu ’wolé sɔkɔn ’léé do do.

¹³ Izraɛl nwiinzan blɛn Joas Juda nwiinzan blɛn Akazia be Joas be Amasia kun Bɛt‐Sémɛs. É da Jérusalɛm, yé é Jérusalɛm flagɔrɔ zana mɛtrɛ wuru do, é sia flagɔrɔ ’léé lé wa laama Éfraim fɔɔ yé é bɔ flagɔrɔ ’léé lé ke a sun la, ana.

¹⁴ Gakelebale lé kɔn gi kyan valé gɔɔlifu valé kananu koo, yee lé ke minwiinzan blɛn lé kɔn gi fɛwezannu va koo, é a faa si; é ’ébo ta béli dɔ munu kun é ziin, yé é go Samari.

¹⁵ Joas kɛlɛwe pɔnénu koo, we lé é a kɛlɛ koo, alé we blɛnblɛn kɛlɛle koo, guli lé é a dan Juda nwiinzan blɛn Amasia va koo, wa é gyɛle Izraɛl nwiinzan blɛnnu lé we zuo fe sɛbɛ gi.

¹⁶ Joas yi gyɛ é tranu va yé wa pa Samari Izraɛl nwiinzan blɛnnu va. Yé a be Jéroboam pla munu nwiin a pa gi.

¹⁷ Juda nwiinzan blɛn Joas be Amasia vo é yuɛma Izraɛl nwiinzan blɛn Joakaz be Joas gale zuo lɛɛ vu ta soru.

¹⁸ Amasia kɛlɛwe pɔnénu a é gyɛle Juda nwiinzan blɛnnu lé we zuo fe sɛbɛ gi.

¹⁹ Wo a ma we ble Jérusalɛm, yé é vɔ fli gi yé é go Lakis; naa, wo go a zuo Lakis, ana lé wa gyɛ.

²⁰ Wo da a nya wisoonu punu yé wa pa Jérusalɛm é tranu va David lé fla.

²¹ Azaria lé a lɛɛ ke vu ta suiɛdo, munu faa a si yé wa dɔ minwiinzan blɛn nya é ti Amasia pa gi.

²² Amasia gale zuo, Azaria Élat pa é pa gi, yé é a pla Juda lé plɛplɛ wuo.

Izraɛl nwiinzan blɛn Jéroboam fiézan

²³ Juda nwiinzan blɛn Joas be Amasia lɛɛ vu ta soruzan nya, Izraɛl nwiinzan blɛn Joas be Jéroboam pla munu nwiin Samari. É pla munu nwiin lɛɛ yɔ fié wɔlɛ do.

²⁴ We lé ke é naané Gakelebale yuɛ gi, yee lé é a kɛlɛ; Nébat be Jéroboam lé é Izraɛl kɛlɛ wenyané kɛlɛzannu nya, é ’ka é yara si lɛ ’bɛ lé wenyané do kpen kɛlɛle ta lo.

²⁵ É Izraɛl glɛnu dɔ wo pa gi, é sia fɛana lé woo wɔraan Amat, ana, fɔɔ yé é bɔ fɛna pɛblɛɛna wɛyi ma, dére lé Gakelebale Izraɛl lé Bale a fe é wuozan balelayezan Amitai be Jonas lé é si Gat‐Éfɛɛ, a nya, a yɛrama.

²⁶ Nyané lé Izraɛl munu ke a blena, luunu valé minénu nya, yé é gié é glɛ la, ’té wo siéwegizan ’ka lo, Gakelebale a ye.

²⁷ Naa, é ’ka Gakelebale gi léé, é Izraɛl tɔ nyaa tɛrɛ la lo, amalé é wo si we gi Joas be Jéroboam nya.

²⁸ Jéroboam kɛlɛwe pɔnénu koo, we faa lé é a kɛlɛ koo, we blɛnblɛn lé é a kɛlɛ guli danna koo, Damas valé Amat lé ke é plale Juda wuo, é da wo nya é ziin Izraɛl wuo fɛan zo koo, wa é gyɛle Izraɛl nwiinzan blɛnnu lé we zuo fe sɛbɛ gi.

²⁹ Jéroboam yi gyɛ é tranu va, Izraɛl nwiinzan blɛnnu va. Yé a be Zakari pla munu nwiin a pa gi.