2 Minwiinzannu 13 - Kazambale lé Sebe Sauunu 1979

Izraɛl nwiinzannu Joakaz valé Joas

¹ Juda nwiinzan Akazia be Joas lɛɛ yɔ do wɔlɛ yaazan nya, Jéu be Joakaz pla Izraɛl munu nwiin Samari. É pla munu nwiin lɛɛ vu ta sɔrafié.

² We lé ke é naané Gakelebale yuɛ gi, yee lé é a kɛlɛ. Wenyanénu lé Nébat be Jéroboam Izraɛl kɛlɛ wo kɛlɛzannu nya, yee wenyané duo lé é a kɛlɛ, yé é ’ka é yara si lɛ a ta lo.

³ Gakelebale bli fli Izraɛlnu ma, yé é wo pa Siri nwiinzan Azaɛl valé Azaɛl be Bɛn‐Adad lee, minwiinzan ’konu lé tɛrɛla faa gi.

⁴ Joakaz zanté vɔ Gakelebale lɛ. Gakelebale a ’ma, naa, nyané lé Siri nwiinzan ke a pana Izraɛl ta, é a ye,

⁵ yé Gakelebale wo siéwegizan nɔ Izraɛlnu lɛ. Izraɛl munu so Siri munu lee, yé wo nyana ’wolé sɔkɔn wuo bélé é vinin zo.

⁶ Naa, Jéroboam lé é Izraɛl kɛlɛ wenyané kɛlɛzannu nya, wo ’ka ’wo yara si lɛ ’bɛ lé munu lé wenyané kɛlɛle ta lo; wo wo kɛlɛ é ziin, yé Asataté miyili a é dɔle Samari.

⁷ Wisootazannu yɔ fié wɔlɛ vu koo, goro vu koo, gane la sunyanu baa soru koo, wo saa lé Gakelebale a vo Joakaz lee, munu faa lé wo ke a va é vinin, wo va munu nya; naa, Siri nwiinzan blɛn mi pɔnénu gyɛ, yé é wo kɛlɛ bélé vun lé mi a zɔn é gane nya, a zo.

⁸ Joakaz kɛlɛwe pɔnénu koo, we faa lé é a kɛlɛ koo, alé we blɛnblɛn kɛlɛle koo, wa é gyɛle Izraɛl nwiinzan blɛnnu lé we zuo fe sɛbɛ gi.

⁹ Joakaz yi gyɛ é tranu va, yé wa pa Samari. Yé a be Joas pla munu nwiin a pa gi.

¹⁰ Juda nwiinzan blɛn Joas lɛɛ yɔ do wɔlɛ vu ta sɔrafiézan nya Joakaz be Joas pla Izraɛl nwiin Samari. É pla wo nwiin lɛɛ vu ta suiɛdo.

¹¹ We lé ke é naané Gakelebale yuɛ gi, yee lé é a kɛlɛ. Wenyanénu lé Nébat be Jéroboam Izraɛl kɛlɛ wo kɛlɛzannu nya, é ’ka é yara si lɛ wo do kpen ta lo, yé ébo nɔ wo lɛ bélé yee zo.

¹² Joas kɛlɛwe pɔnénu koo, we faa lé é a kɛlɛ koo, alé we blɛnblɛn kɛlɛle koo, guli lé é a dan Juda nwiinzan blɛn Amasia va koo, wa é gyɛle Izraɛl nwiinzan blɛnnu lé we zuo fe sɛbɛ gi.

¹³ Joas yi gyɛ é tranu va. Yé Jéroboam nyana alé webleblin ta. Wo Joas pa Samari Izraɛl nwiinzan blɛnnu va.

Élizé gale Izraɛlnu valé Sirinu guli dan

¹⁴ Élizé gyɛgyɛ vɔ ’é ma, yé Izraɛl nwiinzan blɛn Joas go a va yé é wuvɔ a yara, yé é léé: An tioo, an ti. Izraɛl lé goro valé alé wisootazannu!

¹⁵ Élizé lé a lɛ léé: ’I sa do valé é wɔlɛnu si.

¹⁶ Yé é sa do valé é wɔlɛnu si. A zuo Élizé lé Izraɛl nwiinzan lɛ léé: ’I sa gana. É sa gana aan wo Élizé é bɛnu pla minwiinzan bɛnu ta, yé é léé:

¹⁷ ’I fɛnɛti lɛ so yirinwanazia. Yé é a lɛ so. Élizé léé: Bé vuli. Yé é a vuli. Élizé léé: Siwegi sawɔlɛ lé Gakelebale a vuli, yee lé. Sile Sirinu lee sawɔlɛ lé; i dan Siri munu gyɛ lɛ Afɛk fɔɔ yé wo kulu é ga.

¹⁸ Élizé lé é ziin léé: ’I sawɔlɛnu si. Yé é wo si. Élizé lé Izraɛl nwiinzan lɛ léé: Bé duun tɛrɛ lɛ. Yé é a duun gɔnɔ yaa yé é dɔ.

¹⁹ Bale lé mi bli fli a ma yé é léé: É a lé bé duun gɔnɔ soru, dé ’bɛ kaan lo, gɔnɔ suiɛdo; yé i Siri munu gyɛ kɔɔn fɔɔ yé wo kulu é ga; sin, i dan wo gyɛ lɛ gɔnɔ yaa.

²⁰ Élizé ga, yé wa pa. ’Bɛ zuo lɛɛ gi Moab munu lé sunyanu da tɛrɛ ’ko la.

²¹ Wa mi do pana tɔɔn yé wo palunu ’ko va palu do ye, yé wo mi gale vuli Élizé pana. Mi gale mane Élizé wɔlɛnu ma yé é nwa é yuɛma é ziin yé é dɔ loru.

²² Siri nwiinzan blɛn Azaɛl nyané pa Izraɛl ta Joakaz lé tɛrɛla faa gi.

²³ Naa, Gakelebale zin kɛlɛ wo lɛ yé a nyanai zén wo ta, yé é yara nɔla wo ta gipawe lé é a kɛlɛ Abraam koo, Izak koo, Jakɔb koo, wo va, a we ma. É ’ka a va léé, ’é wo kulu ga lo, yé fɔɔ kyɔ yi nya é ’ka sɔn vɔ lɛ wo ma lo.

²⁴ Siri nwiinzan blɛn Azaɛl ga yé a be Bɛn‐Adad pla munu nwiin a pa gi.

²⁵ Flanu lé Azaɛl a si Joas ti Joakaz lee, guli dan bléyi va, Joakaz be Joas a si é ziin Azaɛl be Bɛn‐Adad lee. Joas a gyɛ gɔnɔ yaa yé é Izraɛl lé flanu si a lee.