2 Minwiinzannu 12 - Kazambale lé Sebe Sauunu 1979

Juda nwiinzan blɛn Joas

¹ Jéu lé lɛɛ vu ta sɔrafiézan nya, Joas kɛlɛ minwiinzan blɛn nya yé é pla munu nwiin lɛɛ yɔ fié Jérusalɛm. A bu a Bɛɛ‐Sééba le lé, wa laama Sibija, a nya.

² We lé ke tegele Gakelebale yuɛ gi, Joas a kɛlɛ bléyi faa lé é tawo Jéojada dére ta, a bléyinu va.

³ Naa, we do ana, é ’ka wolé gɔ nwiin yobannanu yi ga lɛ lo; munu éé sarakanu boo, ’té woo lasikɔrɔ no gɔ nwiin yobannanu ta.

⁴ Joas lé Balebanzannu lɛ léé: Gɔɔli faa lé wa pa é yɛrama Bale zé nya yé wo da a nya Gakelebale lé kɔn gi, ’bɛ gi léé, mi nɔnɔna gɔɔli koo, mi tabo gɔɔli lé Balebanzan a ’léé fe, ’bɛ koo, gɔɔli faa lé munu da a nya Gakelebale lé kɔn gi bli zin nya koo,

⁵ Balebanmunu a si yé wa nɔ ’wo dɔɔmunu lɛ, yé dé Bale lé kɔn sɛrɛ fɛana, yé ’wo ana ma’lɛrɛ a nya ma.

⁶ Naa, é kɛlɛ léé, minwiinzan blɛn Joas lɛɛ yɔ do wɔlɛ yaazan nya, Balebanzannu ’ka tan kɔn sɛrɛna ma’lɛrɛ lɛ lo.

⁷ Minwiinzan Joas Balebanzan Jéojada valé Balebanzannu koɛnu laa yé é lé wo lɛ léé: Kɔn sɛrɛna lé é a lé wa ma’lɛrɛ ’naan, mɛmalé ka ’ka a ma’lɛrɛ lɛ loo? Sin, ka ’ka dan gɔɔli si lɛ ka dɔɔzannu lee lo, ka dan a nɔ lɛ kɔn ma’lɛrɛzannu lɛ.

⁸ Yé Balebanzannu a nyi si léé, ’wo ’ka gɔɔli sié munu lee lo, yé kɔn ma’lɛrɛlɛ ’ka ’wozé nya lo.

⁹ Yé Balebanzan Jéojada kɛsu do si, yé é a lɛla fɔn yé é a dɔra balebanna bɛyilazia, fɛana lé woo wɔraan Gakelebale lé kɔn gi, ana. Gɔɔli faa lé munu éé dan a nya Gakelebale lé kɔn gi, kɔn ’léé tabin Balebanzannu a vɔa yee kɛsu gi.

¹⁰ Dé wa ye léé, gɔɔli kɛlɛ kiɛre kɛsu gi, minwiinzan lé sɛbɛgyɛzan valé Balebanmunu ’lɛzan éé dan yé gɔɔli lé ke Gakelebale lé kɔn gi yé wa nɔnɔ yé wa pa balanu gi.

¹¹ Gɔɔli lé wa nɔnɔ, wa paan munu lé wo Gakelebale lé kɔn ma’lɛrɛle lé we bɛ pa wo lee, wo lee. Yilinyaazannu koo, munu lé woo nyanama paan Gakelebale lé kɔn ma koo,

¹² kɔndɔmunu valé gɔlɛ ma nyaazannu koo, woo wo banwoo gɔɔli ’ko nya; yili valé gɔlɛ ma nyaale lé wo mawe ke wo gi Gakelebale lé kɔn ma’lɛrɛle we ma, wo wo lɔ gɔɔli ’ko nya, yé gɔɔli faa lé wa sɛrɛ kɔn sɛrɛna ma’lɛrɛle nya, gɔɔli ’ko nya lé wa kɛla.

¹³ Naa, gɔɔlifu kana koo, sɛnnénu koo, ’yiminifɛnu koo, bélinu koo, fɛofɛan wa kɛlɛ kyan valé gɔɔlifu nya, ’bɛ koo, wo ’ka wo kɛlɛ lɛ Gakelebale lé kɔngifɛ nya, gɔɔli lé woo dan a nya Gakelebale lé kɔn gi, a nya lo;

¹⁴ wa no nyanamapamunu lɛ, wolé Gakelebale lé kɔn sɛrɛna ma’lɛrɛle a nya we gi.

¹⁵ Munu lé wo gɔɔli bɛ pa wo lee léé, wa nɔ nyanamapamunu lɛ, wo ’ka a zuo laa lɛ wo lee lo; woo we kɛla tegele, azama.

¹⁶ We nyaa saraka ma gɔɔli valé wenyané ’yibo saraka ma gɔɔli, wo ’ka da lɛ ’bɛ nya Gakelebale lé kɔn gi lo; Balebanzannu zé bɛ.

¹⁷ Siri nwiinzan blɛn Azaɛl nwa yé é guli dan Gat munu va, yé é wo kele. É dɔ Azaɛl gi léé, é dan guli dan lɛ Jérusalɛm munu va.

¹⁸ Fɛnu faa lé wa pa é yɛrama Bale zé nya koo, fɛnu lé a tranu, Juda nwiinzannu, Jozafat valé Joram valé Akazia a pa é yɛrama Bale zé nya koo, fɛnu lé yeebozen a pa é yɛrama Bale zé nya koo, kyan faa lé ke fɛwezannu tadɔna Gakelebale lé kɔn valé minwiinzan blɛn lé kɔn gi koo, Juda nwiinzan Joas a faa si yé é a faa pa zia Siri nwiinzan Azaɛl lɛ, yé ’bɛ ’ka da lɛ guli dan lɛ Jérusalɛm munu va lo.

¹⁹ Joas kɛlɛwe pɔnénu valé we faa lé é a kɛlɛ, wa é gyɛle Juda nwiinzan blɛnnu lé we zuo fe sɛbɛ gi.

²⁰ A wuozannu nwa yé wo a ma we ble; wo Joas gyɛ Milo lé kɔn lé ke Siila lé gɔ zunna, a gi.

²¹ A wuozannu Siméat be Jozakaa valé Somɛɛ be Jozabad a gyɛ, yé é ga. Wa pa é tranu va David lé fla. Yé a be Amasia pla munu nwiin a pa gi.