2 Minwiinzannu 11 - Kazambale lé Sebe Sauunu 1979

Juda munu nwiin le Ataali lé we

¹ Akazia bu Ataali a ye aan wo léé, é be ga, é nwa yé é plaminwiinmunu gɔnɔlazannu faa gyɛ.

² Naa, Akazia buru, minwiinzan Joram lu Joséba, é Akazia be Joas si kyeen gi, minwiinzan benu lé wo wo gyɛ, wo méléna; yé é a nɔ é pazan lɛ yé wo yɔɔ yialafɛ tadɔkɔn gi. ’Bɛ zo léé, wa yɔɔ Ataali lee, yé wo ’ka a gyɛ lɛ lo.

³ É vo é yɔɔle Joséba va Gakelebale lé kɔn gi lɛɛ suiɛdo. ’Té Ataali ɛ ke é plale tɛrɛ nwiin.

⁴ A lɛɛ sɔrafiézan nya, Jéojada mi nwunvɔ Kérétimunu lé mi yɔ soru soru nwiinzannu valé vlanburuzannu laana léé, ’wo da ’é va Gakelebale lé kɔn gi. É gi pa do wo va yé é léé, ’wo Bale ’nyɔɔn ’é lɛ Gakelebale lé kɔn gi, yé é minwiinzan blɛn be gɔɔn wo lɛ.

⁵ ’Bɛ zuo é wo béli dɔ léé: We lé ka dan a kɛlɛ lɛ, yee lo. Ka vamunu lé wo nyanama pale pélisia flinyi nya, ’ka ka gi bɔi yaa; ka lɛ do é dan minwiinzan lé kɔn tabin lɛ;

⁶ ka lɛ do é dan dɔ lɛ kɔn ’léé lé é ke Sura zia, ana; kɔn ’léé lé ke vlanburuzannu zuo, ka lɛ do é dan ’bɛ tabin lɛ; ka dan kɔn tabin lɛ léé, té mi do kpen é wɔra ana lo.

⁷ Ka palu fié koɛnu lé ka si nyanama pana flinyi nya, ka dan Gakelebale lé kɔn tabin lɛ minwiinzan sɔnɔ;

⁸ ka dan minwiinzan zi lɛ faa sɔɔ lɛ, gulidanfɛnu nya ka lee, yé dé mian é wɔra ka méléna ’ka azan gyɛ; dé minwiinzan go fɛofɛana, ’té ka a a sɔnɔ.

⁹ We faa lé Balebanzan Jéojada wo béli dɔ a nya, mi yɔ soru soru nwiinzannu a kɛlɛ. Wo ’wolé munu si do do, wonu lé wo nyanama pale péli sia, é valé wonu lé wo si nyanama pana flinyi nya, wo nya, yé wo go Balebanzan Jéojada va.

¹⁰ David lé dinnu valé alé mibotakuunfɛnu lé ke Gakelebale lé kɔn gi, Balebanzan wo si yé é wo nɔ mi yɔ soru soru nwiinzannu lɛ.

¹¹ Vlanburumunu minwiinzan zi lɛ sɔɔ gulidanfɛnu nya wo lee, yé wo dɔ kɔn ’léé é bale nya, é sia bɛyila yé é zun bɛbola, balebanna valé kɔn méléna.

¹² Balebanzan da minwiinzan blɛn be nya, yé é tɔkoro wo a ’wuo ma yé é bélidɔwe pa a lee. Wa dɔ minwiinzan blɛn nya yé wo nyɔnɔ zén a nwiin yé wo ’wo bɛ gyɛ yé wo siaa plɛplɛ léé: Minwiinzan blɛn ’é vo é yuɛma!

¹³ Ataali vlanburumunu valé munu dére vun ’ma yé é da munu va Gakelebale lé kɔn ’léé. É a nagini.

¹⁴ Yé bé ye, minwiinzan blɛn a é dɔle kpala ta Izraɛlnu zé kɛlɛbɛ zo; sunyanu nwiinmunu valé bélinu a minwiinzan sɔnɔ; ana tɛrɛlamunu faa gi nana yé wo béli fɛn. Ataali élé sɔnu fia yé é siaa léé: Mi ma we blele lé! Mi ma we blele lé!

¹⁵ Yé mi yɔ soru soru nwiinzannu lé wo ke sunyanu nwiinzannu nya, Balebanzan Jéojada wo béli dɔ léé: ’Ka a si ka méléna, yé dé mian é dɔ a zuo ’ka azan gyɛ gwɔun nya. Naa, Balebanzan a fe kɔɔn léé, té wa gyɛ Gakelebale lé kɔn gi lo.

¹⁶ Wo zi nɔ a lɛ, yé é go minwiinzan blɛn lé kɔn gi, wisoonu wɔrana zi ta; ’bɛna lé wa gyɛ.

Jéojada wenu tavɔɔ we tegele nya

¹⁷ Gakelebale koo, minwiinzan blɛn koo, munu koo, Jéojada wo gi pa do; gi pale do lé éé munu kɛla Gakelebale lé munu nya, yee lé; yé é minwiinzan blɛn valé munu gi pa do é ziin.

¹⁸ Ana tɛrɛlamunu faa wɔra Baal lé kɔn gi, yé wa sɛrɛ; wo a bannanu valé alé miyilinu ’wii yé wo Baalbanzan Matan gyɛ é banna ’lɛ. Balebanzan Jéojada Gakelebale lé kɔn tabinzannu dɔ.

¹⁹ Mi yɔ soru soru nwiinzannu koo, Kérétimunu valé vlanburuzannu koo, ana tɛrɛlamunu faa koo, é go wo nya ’é va, yé wo minwiinzan blɛn si Gakelebale lé kɔn gi yé wo go a nya minwiinzan blɛn lé kɔn gi, vlanburuzannu lé kɔn ’léé zi ta. Yé Joas nyana minwiinzan blɛn lé webleblin ta.

²⁰ Ana tɛrɛlamunu faa gi nana yé fla vo drɔɔ. Wo Ataali gyɛ kɔɔn gwɔun nya minwiinzan blɛn lé kɔn gi.

²¹ Joas kinin minwiinzan blɛn nya bléyian va, ’té a lɛɛ a sɔrafié.