2 Minwiinzannu 10 - Kazambale lé Sebe Sauunu 1979

Izraɛl minwiinzan blɛn Jéu lé we

¹ Akab benu yɔ yaa wɔlɛ wu a Samari. Jizréɛl nwiinzannu koo, mi segelenu koo, Akab lé né pazannu koo, Jéu sɛbɛnu gyɛ yé é wo pa wo lɛ zia. É lé a gi léé:

² Kazan benu koo, goronu valé wisoonu koo, fla plɛplɛ valé gulidanfɛnu koo, wa ka va, amalé sin, dé ka sɛbɛ ’ko ye,

³ kazan be lé ke é zima é mini é bɔlunu ta, ’té kɛlɛle minwiinzan nya a nyɛɛ bɛ, ’ka a si yé ’ka a nyana é ti lé webleblin ta yé ’ka kazan lé munu ma guli dan.

⁴ Wo kana é baba yé wo léé: Ka ye, minwiinzan fié ’ka bɔ lɛ dɔle lɛ a ma lo ’naan, ko kɛla kaa yé ko dɔ a maa?

⁵ Yé kɔn ’léézan koo, fla nwiinzan koo, mi segelenu koo, né pazannu koo, wo we pa Jéu lɛ zia léé: Ko a i wuozannu nya, yé we faa lé bé fé ko lɛ, ko dan a kɛlɛ lɛ; ko ’ka dan mi do kpen dɔ lɛ minwiinzan blɛn nya lo, dé wean dɔ i gi wezin nya, bé kɛlɛ.

⁶ Jéu sɛbɛ fiézan gyɛ wo lɛ yé é lé ’bɛ gi léé: Dé ka a an lee, yé dé ka an dére lɛdɔa a ma, munu ’ko, kazan benu, ’ka wo ’wuo kini yé ka wo si yé tɛlɛ, bléyi ’ko va, ’ka da an va Jizréɛl. Minwiinzan blɛn benu yɔ yaa wɔlɛ vu a fla, lɛamamunu lé wo wo pa, wolé kɔnnu gi nuu.

⁷ Sɛbɛ bɔ wo va aan wo, wo minwiinzan benu si yé wo mi yɔ yaa wɔlɛ vu ’ko bɔrɔ bo; a zuo wo wo ’wuonu pa kyɛɛnu gi yé wo wo pa Jéu lɛ zia, Jizréɛl.

⁸ Nwunvɔzan da a zuo fe lɛ a lɛ yé é léé: Wo da minwiinzan benu ’wuonu nya. Yé é léé: ’Ka wo zun dɔ fié flagɔrɔ ’léé fɔɔ yé tu é kini.

⁹ Bladi pa aan wo é bɔra yé é dɔ munu faa ’lɛ yé é léé: Ka a tegele. Ka ye, maa anzan ma we ble yé maa a gyɛ; naa, munu faa ’ko, de ɛ wo gyɛɛ?

¹⁰ Amalé ka gi dɔɔ léé, Gakelebale dére lé é a fe Akab lé munu mawe nya, a do kpen ’ka dan vo lɛ é pla lo; we lé Gakelebale a fe ’é wuozan Éli lɔlu nya, é dan a lɛ sɔɔ lɛ.

¹¹ Yé Akab lé munu lé wo vo Jizréɛl, Jéu wo faa gyɛ, alé mi segelenu koo, a dɔɔzannu koo, we pla a lɛzannu koo, wo nya, a do kpen ’ka so lɛ a ta lo.

¹² A zuo é nwa, yé é Samari zi sia. ’Blatabinzannu zén‐ékevakɔn lé ke zia, Jéu bɔ ’bɛna aan wo,

¹³ é Juda minwiinzan blɛn Akazia bwenu ye, yé é léé: De ɛ ke ka nyaa? Wa zi pa léé: Ko a Akazia bwenu nya, yé ko da we lɛ minwiinzan benu valé minwiinle benu va.

¹⁴ Jéu léé: ’Ka wo kun é yuɛma. Yé wo wo kun é yuɛma yé wo wo bɔrɔ bo mi yɔ fié wɔlɛ fié ’yiguru lé ke zén‐ékevakɔn sɔnɔ, a ma; Jéu ’ka a do kpen vo lɛ lo.

¹⁵ É si ’bɛna yé Rékab be Jonadab lé ke dana a ’lɛ mi, wo kee a nya. É we a va yé é lé a lɛ léé: I bli a tegele, bélé anzé a tegele i vazia fɛan zo, a zoo? Yé Jonadab a zi pa léé: Iin. Jéu léé: Dé é a ’bɛ zo, ’i bɛ pa an lee. Yé Jonadab é bɛ pa a lee. Yé Jéu a vɔ élé goro gi ’é va,

¹⁶ yé é léé: ’I da ko go, yé Gakelebale lé we a an bli gi blɛn fɛan zo, i dan a ye lɛ. ’Bɛ zo lé é go a nya élé goro gi.

Wo Baal banzannu gyɛ

¹⁷ Jéu bɔ Samari aan wo, Akab lé munu lé wo vo Samari, é wo faa gyɛ yé é wo si tɛrɛ la tata, dére lé Gakelebale a fe Éli lɛ, a yɛrama.

¹⁸ A zuo é munu faa zén ékeva yé é lé wo lɛ léé: Akab Baal bɔ sɛ, Jéu é dan a bɔ lɛ é baba.

¹⁹ Sin, Baal lé balelayezannu koo, a wuozannu faa koo, a banzannu faa koo, ’ka wo laa, ’wo da an va, té a do kpen é vo zi zuo lo, naa, maa dan saraka blɛn bo lɛ Baal lɛ; dé mian ’ka da lɛ lo é ’ka dan vo lɛ é yuɛma lo. Jéu a we ’ko kɛlɛna gi kinile nya léé, ’é Baal wuozannu faa gyɛ.

²⁰ É léé: ’Ka Baal tɔ bɔ fɛti zana dɔɔ. Yé wa zana dɔɔ.

²¹ É munu nwunvɔ Izraɛl tɛrɛ faa la; yé Baal wuozannu faa da, a do kpen ’ka vo lɛ zi zuo lo, yé wo faa wɔra Baal lé kɔn gi, yé munu faa Baal lé kɔn fan.

²² Jéu lé sɔtadɔkɔn tabinzan lɛ léé: ’I Baal wuozannu lé sɔnu bɔra. Yé mi ’ko sɔ bɔra yé é a nɔ wo lɛ.

²³ Yé Jéu da Baal lé kɔn ’léé, Rékab be Jonadab nya é va yé é lé Baal wuozannu lɛ léé: ’Ka nagini yé ka ye, té Gakelebale wuozannu é kɛlɛ ’ko lo, naa, Baal wuozannu saa ɛ kɛlɛ ’ko.

²⁴ Yé wo wɔra saraka bole valé wi kyɛblele we gi. Jéu mi yɔ ziɛn dɔ béera kɔɔn, yé é lé wo lɛ léé: Munu ’ko lé maa wo pa ka lee, dé wo va mian so biian i lee, i gaan a pa gi.

²⁵ É nyaa winu kyɛblele nya aan wo, Jéu lé vlanburuzannu valé sunyanu nwiinzannu lɛ léé: ’Ka wɔra, ’ka wo gyɛ, té a do kpen é bɔra lo. Yé wo wo gyɛ gwɔun nya. Vlanburuzannu valé sunyanu nwiinzannu go wo gyɛle nya yé wo bɔ Baal lé kɔn wɔlɛ ma.

²⁶ Wo go Baal lé kɔn looné gi yé wo miyilinu bɔra béera yé wo wo kyɛ ble.

²⁷ Wo Baal miyili yara bua yé wo Baal lé kɔn guru zana a gi yé wa kɛlɛ wobogikɔn nya, yé é vo ana fɔɔ kyɔ.

²⁸ Jéu Baal si Izraɛl tɛrɛ la tata;

²⁹ naa, Nébat be Jéroboam lé é Izraɛl kɛlɛ wenyanékɛlɛzannu nya, é ’ka nɔla lɛ ’bɛlé wenyanénu ma lo; kyandirinénu lé ke Bétɛl valé Dan, é ’ka daan lɛ wo ma lo.

³⁰ Gakelebale lé Jéu lɛ léé: We lé ke tegele an yuɛ gi, bé kɛlɛ, yé i anlé blibɔmawe faa lɛ sɔɔ Akab lé munu vazia, amalé i benu é dan nyana lɛ Izraɛl lé webleblin ta fɔɔ yé é bɔ wo kulu ziɛnzan ma.

³¹ Naa, Jéu ’ka tawo lɛ Gakelebale, Izraɛl lé Bale, lé bélidɔwe ta é bli faa nya lo; wenyanénu lé Jéroboam Izraɛl kɛlɛ wo kɛlɛzannu nya, é ’ka daan lɛ wo kɛlɛle ma lo.

Jéu gale

³² Bléyi ’ko va, Gakelebale kun Izraɛl lé tɛrɛ ke so male ma; Azaɛl wo gyɛ Izraɛl lé tɛrɛ glɛnu faa la.

³³ É sia Juudɛn yuu ma yirinwanazia, é Galaad tɛrɛ la munu faa kele, Gadnu koo, Rubɛnnu koo, Manasénu koo, woo lé, é sia Aroɛɛ lé ke Aanɔn yuu gɔ la, ’bɛ gi léé, Galaad valé Bazan tɛrɛ faa lé.

³⁴ Jéu kɛlɛwe pɔnénu koo, we faa lé é a kɛlɛ koo, alé we blɛnblɛn kɛlɛle koo, wa é gyɛle Izraɛl minwiinzan blɛnnu lé we zuo fe sɛbɛ gi.

³⁵ Jéu yi gyɛ é tranu va yé wa pa Samari. Yé a be Joakaz pla munu nwiin a pa gi.

³⁶ Jéu pla Izraɛl nwiin lɛɛ yɔ do wɔlɛ sɔraa Samari.