2 Minwiinzannu 1 - Kazambale lé Sebe Sauunu 1979

Éli valé Izraɛl nwiinzan Akazia lé we

¹ Akab gale zuo, Moab nwa Izraɛl ma.

² Akazia a ’élé kɔn nwiin kɔn gi Samari yé é dia fɛnɛti ta, yé é gyɛ kɛlɛ. É munu nwunvɔ yé é lé wo lɛ léé: ’Ka go, ’ka we laa Ékrɔn lé bale Baal‐Zébub lee, a gi dɔɔle we gi léé, dé an dan nwa lɛ gyɛ ’ko gii?

³ Naa, Gakelebale lé lanje lé Tisibi mi Éli lɛ léé: ’I nwa, ’ka go kee Samari minwiinzan lé nwunvɔzannu nya yé bé fe wo lɛ léé: Bale ’ka Izraɛl tɛrɛ la lo, bɛwemalé ka go we laa lɛ Ékrɔn lé bale Baal‐Zébub lee?

⁴ Bɛwemalé Gakelebale léma: Yialafɛ lé i vɔ a ta bɛ, i ’ka dan zun lɛ a ta lo, naa, i dan ga lɛ. Yé Éli go.

⁵ Nwunvɔzannu nɔla Akazia va. Yé é lé wo lɛ léé: Mɛmalé ka diéraa?

⁶ Wa zi pa a lɛ léé: Mi do da ko ’lɛ yé é lé ko lɛ léé: ’Ka nɔla, ’ka go minwiinzan lé é ka pa zia, a va, yé ’ka fe a lɛ léma: Gakelebale léma: Bale ’ka Izraɛl lo, amalé i munu nwunvɔ we laana Ékrɔn lé bale Baal‐Zébub lee? Bɛwemalé yialafɛ lé i vɔ a ta bɛ, i ’ka dan zun lɛ a ta lo, naa, i dan ga lɛ.

⁷ Akazia lé wo lɛ léé: Mi lé ka kee wo nya yé é dére ’konu fe ka lɛ, mi kaa léé?

⁸ Wo lé a lɛ léé: Wikyɛɛ a a ta sɔ nya yé wikɔlɛ kyɛsidi a a gyɛn. Yé Akazia léé: Tisibi mi Éli lé.

⁹ É mi yɔ fié wɔlɛ vu valé ’wo nwiinzan nwunvɔ Éli va. Wo nwiinzan ’ko go Éli va, ’té ’bɛ a é nyanale gɔ nwiin, yé é lé Éli lɛ léé: Bale lé mi, minwiinzan léé, ’i zun.

¹⁰ Éli a zi pa mi yɔ fié wɔlɛ vu nwiinzan lɛ léé: Dé maa a Bale lé mi nya, kyɛ ’é si la gi yé ’é bii valé ilé mi yɔ fié wɔlɛ vu ble. Yé kyɛ si la gi yé é yee valé élé mi yɔ fié wɔlɛ vu ble.

¹¹ Akazia mi yɔ fié wɔlɛ vu valé ’wo nwiinzan bɛnu nwunvɔ Éli va é ziin. Minwiinzan ’ko lé Éli lɛ léé: Bale lé mi, minwiinzan léé, ’i zun fiéfié.

¹² Éli a zi pa wo lɛ léé: Dé maa a Bale lé mi nya, kyɛ ’é si la gi yé ’é bii valé ilé mi yɔ fié wɔlɛ vu ble. Yé Bale lé kyɛ si la gi yé é yee valé élé mi yɔ fié wɔlɛ vu ble.

¹³ Akazia mi yɔ fié wɔlɛ vu valé ’wo nwiinzan bɛnu nwunvɔ é ziin a gɔnɔ yaazan nya. Minwiinzan yaazan ’ko go; é bɔ tɔɔn yé é powuo zun Éli ’lɛ yé é zanté vɔ a lɛ léé: Bale lé mi, ilé zanté, anlé tɛrɛla valé i wuozannu yɔ fié wɔlɛ vu ’ko, wolé tɛrɛla ’é kɛlɛ fɛwezan nya i yuɛ gi ma.

¹⁴ Bé ye, kyɛ si la gi yé é mi yɔ fié wɔlɛ vu nwiinzannu fié vininnu valé wolé mi yɔ fié wɔlɛ vunu ble; naa, sin, anlé tɛrɛla ’é kɛlɛ fɛwezan nya i yuɛ gi ma.

¹⁵ Gakelebale lé lanje lé Éli lɛ léé: ’I go a va, té i kana do kpen wo a lee lo. Éli nwa yé é zun a va yé wo go minwiinzan va.

¹⁶ É lé ’bɛ lɛ léé: Gakelebale léma: I munu nwunvɔ we laale Ékrɔn lé bale Baal‐Zébub lee we gi, bélé fɛan zo lé Bale lé wo bɔa we laale lɛ a lee é ’ka Izraɛl tɛrɛ la lo, a zo, amalé yialafɛ lé i vɔ a ta bɛ, i ’ka dan zun lɛ a ta lo, naa, i dan ga lɛ.

¹⁷ Akazia ga, dére lé Gakelebale a fe Éli lɔlu nya, a yɛrama. Yé Juda nwiinzan Jozafat be Joram plale munu nwiin lɛɛ fiézan nya, Joram pla Izraɛl nwiin Akazia pa gi; Akazia be ’ka lo, azama.

¹⁸ Akazia kɛlɛwe pɔnénu valé we lé é a kɛlɛ, ’bɛ a é gyɛle Izraɛl minwiinzannu lé we zuo fesɛbɛ gi.