2 Korɛnt Munu 9 - Kazambale lé Sebe Sauunu 1979

Bɔ Krétiɛnnu va gɔɔli

¹ É ’ka lé maa sɛbɛ gyɛ ka lɛ blɛ kɛlɛle Kazambale lé munu lɛ we ma lo.

² Maa ka bli drɔɔ dɔɔ, yé maa anbo ze vɔ ka tɔ gi Masédɔane munu lɛ ’bɛ we ma, léé, é sia lɛɛ vinin nya Akai ma a é ’lɛrɛle, yé ka fuu lé é ke ka ta é mi kiɛre nyunu.

³ Maa bwenu nwunvɔ ka va, léé, dére zinnu lé an wo fe kalé we ma, té é kɛlɛ fɛ pla nya we ’ko gi lo. É a lé ’ka ma’lɛrɛ, fɛan zo lé maa fe léé, ka ma a é ’lɛrɛle, a yɛrama; dé ’bɛ kaan lo, ka tɔ zin lé maa fe é dan nɔla lɛ kaa ma yaragyɛwe nya.

⁴ Dé ko valé Masédɔane munu bɔ ka va, ’té ka ma ’ka é ’lɛrɛle lo, ’bɛ éé maa gya yara nya, maa ’ka kazé fena lo, yé maa ’ka ’bɛ va lo.

⁵ Amalé é dɔ an gi léé, é a é zima léé, maa bwenu ’ko pa zia ka va an ’lɛ, yé blɛ lé ka a nɔle fe yé ka a ma’lɛrɛle lɛ sɔɔ, yé dé an da, ’ka a nɔ an lɛ blidrɔɔblɛ bozen nya, ’té é ’ka kɛla bélé fɛan zo lé maa a si ka lee gla nya, a zo lo.

⁶ ’Ka we ’ko ’ma ma. Mian éé fɛ vɔa kiéné, é dan fɛ kiéné gyɛ lɛ, yé mian éé fɛ vɔa kiɛre, é dan fɛ kiɛre gyɛ lɛ.

⁷ Naa, mi ’é fɛ nɔ fɛan zo lé é dɔ a bli gi, a zo ma. Té é fɛ nɔ é bli zuo valé é bli kyɛ nya lo ma. Naa, mian éé fɛ no gi nanale nya, ’bɛzan ɛ sɔa Kazambale lɛ.

⁸ Kazambale é bɔalɛ é wezin gɔnɔ faa kɛlɛ ka lɛ, yé dé ka nyaa ka mawenu faa kɛlɛle nya faa, ’bɛ zuo fɛ éé voo ka lee kiɛre yé ka bɔalɛ ka wezin kiɛre kɛlɛ mi bɛnu lɛ.

⁹ Kazambale lé sɛbɛ léé: Kazambale éé fɛ nwɛɛn‐an, yé Kazambale éé fɛ no nyanégyɛmunu lɛ; A kɛlɛwe tegele éé voo yifaama.

¹⁰ Kazambale lé éé Fɛwɔlɛ no fɛvɔzan lɛ, Yé éé buru no a blefɛ nya, é dan fɛwɔlɛ nɔ lɛ ka lɛ, yé é dan a poro baa lɛ di, yé é dan ka kɛlɛle tegele ma tɔnɔ taa pa lɛ.

¹¹ Ka dan fua ble lɛ bɛ faa ma, ’té ka bɔa fɛ kiɛre nɔle lɛ mi bɛnu lɛ, yé ’bɛ zuowe é dan kɛlɛ lɛ Kazambale bɔ vɔle nya.

¹² Blɛ ’ko zo kɛlɛle éé we sié ka bɔlu Krétiɛnnu ma weboen nya, naa, ’bɛ saa kaan lo, é kɛlɛ mi kiɛre lé Kazambale bɔvɔwe nya é ziin.

¹³ Kalé blɛ ’ko kɛlɛle a nagɔɔn léé, ka a Krist lé Wenéné lɛdɔna a ma, ’té ka fé, bɛwemalé munu éé Kazambale tɔ bɔa, yé blɛnu lé ka kɛla wo lɛ, é valé mi faa lɛ, woo Kazambale tɔ bɔa wolé we ma é ziin.

¹⁴ Munu é dan a gi dɔɔ lɛ léé, Kazambale zin kiɛre kɛlɛ ka lɛ, yé ka lɔrɔ é dan wo gyɛ lɛ yé wo dan bazoro lɛ kalé we ma.

¹⁵ ’Wo Kazambale bɔ vɔ, blɛ lé é a kɛlɛ kaa lɛ, ’té a gifedére ’ka bɛ lo, alé we ma.