2 Korɛnt Munu 8 - Kazambale lé Sebe Sauunu 1979

Blɛ kɛlɛle

¹ Bwenu, zin lé Kazambale a kɛlɛ Masédɔane léglizigimunu lɛ, é sɔ ko lɛ léé, ko a zuo fe ka lɛ.

² Nyanénu lé wa ble, é wo gi dan é baba; naa, duowo, wo gi nana yé é gié é glɛ la, ’té woo blɛ kɛla mi kiɛre lɛ dɔlé ’té nyané wobozen gyɛ.

³ Maa wo mawe zin fe ka lɛ léé, wo fɛ nɔ wolé fɛyebɛ yɛrama bli drɔɔ nya yé wa taa pa é ziin,

⁴ yé wo zanté vɔ ko lɛ gɔnɔ kiɛre nya léé, ’ko zi nɔ ’wo lɛ yé blɛ ’ko lé Krétiɛnnu a gona a kɛlɛna Kazambale lé munu lɛ, ’wo ’wozé pa a va.

⁵ Fɛ lé ko bli a wo lɛ léé, wo dan a nɔ lɛ, wa gié ’bɛ la, naa, wo ’wobozen nɔ Mizan lɛ é vinin, yé ’bɛ zuo wo ’wobozen nɔ ko lɛ, Kazambale lé blibɔmawe yɛrama.

⁶ Bɛwemalé, nyanama zima lé Tite a pale sia ka méléna, ko a lɛsɔɔle bɛ pa a lee.

⁷ Ka bli a é pale, ka Bale dére fé é zima, ka we dɔɔ, ka we kɛla ka fuu nya ka ta, ko va sɔlɛle a ka gi blɛn, amalé we kɛlɛle zin ’ko, é a lé ka tɔ é bɔ ’bɛ gi é ziin.

⁸ Maa ’ka ’bɛ fena bélidɔwe nya lo, naa, mi bɛnu lé wo fuu ke wo ta, maa dan kalé sɔlɛle gi dan lɛ wo nya, amalé maa fé.

⁹ Ka Kaazan Jézu Krist lé zin dɔɔ; yee lé ke fuablezan nya, é ’ébozen kɛlɛ nyanégyɛzan nya kalé we ma, léé, alé nyanégyɛle gi ka kɛlɛ fuablezannu nya.

¹⁰ We ’ko a é zima kazé nya, amalé maa a we ’ko plana ka lɛ é wo. A lɛɛ do lo, é dɔ ka gi léé, ’ka we zin ’ko kɛlɛ, yé ka a pélisia é vinin mi bɛnu ’lɛ.

¹¹ Amalé sin, ’ka a lɛ sɔɔ ma. Ka pélisia bli zin nya fɛan zo, ’ka a ’wuo pla a zo, fɛ lé ke ka lee, a yɛrama.

¹² Dé bli zin a mi gi Bale alé blɛ sié a leefɛ yɛrama. Dé fɛ ’ka mian lee lo, Bale ’ka a fe lɛ léé, ’bɛzan ’é fɛ nɔ lo.

¹³ É ’ka sɔ lɛ an lɛ léé, blɛ kɛlɛle mi bɛnu lɛ lé we ma ka kɛlɛ nyanégyɛzannu nya lo, naa, é sɔ an lɛ léé, kalé fɛnu é bɔ ékema.

¹⁴ Bléyi ’ko va, fɛ kiɛre a ka lee, amalé ’ka bɔ wo va yé wo we si ’wo ma a nya, yé yi bɛ nya dé fɛ kiɛre a wo lee, yé wo é bɔ ka va yé ka we si ka ma, yé ’bɛ zo lé kalé fɛnu éé bɔa ékema,

¹⁵ bélé fɛan zo lé wa gyɛ sɛbɛ gi, a zo. Wo léé: Mi lé é a sia kiɛre, éé a nyaan ’kyɛ, yé mi lé é a sia sɛ, éé kaan.

Tite valé é bɔluzannu

¹⁶ Maa Kazambale bɔ vɔ léé, we lé ke an gi ka vazia, Kazambale yee we duo dɔ Tite gi é ziin.

¹⁷ We lé maa a pla a lɛ, é a nyi si, yé é a gona ka va ébo ’wuoi, é fuu nya é ta.

¹⁸ Bwe do lé léglizigimunu faa a tɔ zin fé alé Wenéné fele we ma, ko a pana zia é ziin Tite va.

¹⁹ Léglizinu a si a va léé, ’é kɛlɛ ko bɔavazan nya wezin ’ko kɛlɛle we gi. Ko a we ’ko kɛlɛna Mizan bozen tɔbɔle we ma, é valé ko bli zin nagɔɔnle we ma.

²⁰ Ko a kɛlɛna a zo léé, té mi do é we dɔ ko nwiin, blɛ blɛn ’ko lé é ke ko lee, a we ma lo.

²¹ Ko a kwa kulina léé, we lé ke tegele Mizan valé munu yuɛ gi, ko ’bɛ kɛlɛ.

²² Ko bwe do lé, ko fuu ye a ta gɔnɔ kiɛre, ko a pana zia wo va, yé a fuu é dan kɛlɛ lɛ a ta we ’ko gi é ziin kaii, a bli a ka lɛ é baba, azama.

²³ Dé é a Tite nya, é a an bɔluzan valé anlé nyanamapa béé nya, kalé we ma. Dé é a ko bwenu nya, wa léglizinu lé nwunvɔzannu nya, yé wa Krist lé fua nya.

²⁴ Amalé ’ka a gɔɔn léglizigimunu lɛ léé, bwenu ’ko, wo sɔ ka lɛ, yé té kobo ze vɔle ka tɔ gi é kɛlɛ boawe nya lo ma.