2 Korɛnt Munu 7 - Kazambale lé Sebe Sauunu 1979

¹ An sɔlɛzannu, blivolɛdére ’ko zonu a kaa lee, amalé kaa dɔbɛ kyɛn ma tiridɔfɛnu valé léli ma tiridɔfɛnu faa si kaa ma ma, kaa kɛlɛle sauun lɛsɔɔle we ma, kanale Kazambale lee nya.

Pɔl gi nana léglizigimunu bli nɔlale we ma

² ’Ka nyanana nɔ ko lɛ ka bli gi. Ko ’ka wenyané kɛlɛ lɛ mi do lɛ lo; ko ’ka mi do lé we sɛrɛ lɛ lo; ko ’ka mi table lɛ lo.

³ Maa ’ka ’bɛ fe lɛ we dɔle ka nwiin we ma lo, naa, maa a fe é kyɛn léé, kalé we a blɛn ko bli gi fɔɔ dé é a ka gale nyaoo, ko gaan ka va, dé é a ka vole é yuɛma nyaoo, ko voo é yuɛma ka va.

⁴ An bli a ka lɛ é baba; maa anbo ze vɔa ka tɔ gi bɛ faa ma, ka an tɔrɔ paa é baba, dé ko a nyané kiɛre blenaoo, an gi a é nanale, é gié é glɛ la.

⁵ Naa, é sia ko bɔbléyi va Masédɔane tɛrɛ la, ko ’ka flin do kpen wo lɛ lo; ko kle ble ’bɛ faa ma, guli a ko zi yé kana a ko gi.

⁶ Naa, Kazambale lé éé bligikyɛdɔzannu tɔrɔ paan, é ko tɔrɔ paa Tite dale nya;

⁷ é ’ka kɛlɛ lɛ léé, a dale saa ɛ ko tɔrɔ paa lo, ka yeebozen tɔrɔ paa fɛan zo, ’bɛ ko tɔrɔ paa é ziin. Ko sɔle ka lɛ koo, ka yuɛyi koo, ka péli a an va fɛan zo koo, Tite a zuo fe an lɛ, yé ’bɛ an gi nanale gi gyɛ.

⁸ Dé anlé sɛbɛ giwe so ka kɔlɛ zi, an bli kyɛ ’ka é dɔle ’bɛ we ma lo. Yé maa ye léé, anlé sɛbɛ giwe so ka kɔlɛ zi bléyi ke nya weboen nya, yé ’bɛ an bli kyɛ dɔ é vinin.

⁹ Naa, duowo, bléyi ’ko va an gi a é nanale. An gi ’ka é nanale we ’ko sole ka kɔlɛ zi we ma lo, an gi nana léé, we ’ko ka bli nɔla. Ka blikyɛdɔle si Kazambale va, amalé ko ’ka wenyané kɛlɛ lɛ ka lɛ lo.

¹⁰ Blikyɛdɔle lé éé sié Kazambale va, a tɔnɔ lé ke bli nɔlale lé éé goo mi nya silewegi va, a nya; ’té mi ’ka é gi bɔrɔan léé, ’é nɔla ’bɛ ma monomono lo. Naa, tɛrɛla blikyɛdɔle tɔnɔ a gale nya.

¹¹ Yé blikyɛdɔle ’ko lé éé sié Kazambale va, ka ’ka a ma tɔnɔ ye lɛ kiɛre loo? Ka ’ka kwa kuli lɛ léé, we é si ka nwiin loo? Ka bli ’ka nwa lɛ loo? Kana ’ka zén lɛ ka gi loo? An dale lɔrɔ ’ka ka gyɛ lɛ loo? Ka fuu ’ka dɔ lɛ ka ta loo? Ka ’ka we lɛdɔ lɛ mi ’ko gi loo? Ka ana gɔɔn bɛ faa ma léé, ka a tegele we ’ko gi.

¹² Bɛwemalé, an ’ka sɛbɛ gyɛ lɛ ka lɛ, mi lé é wenyané kɛlɛ, alé we ma lo; yé maa ’ka a gyɛ lɛ mi lé wo wenyané kɛlɛ a lɛ, ’bɛzan lé we ma lo; naa, maa a gyɛ léé, ka faa a ye wéiin Kazambale ’lɛ léé, ka gi bɔrɔan kolé we ma weboen nya,

¹³ yé ’bɛ ko tɔrɔ paa. Naa, ’bɛ ta loru, ko gi nana é baba Tite lé, ka faa a bli kɛlɛ drɔɔ, a gi nanale we ma.

¹⁴ Dé maa anbo ze vɔ sɛ ka tɔ gi Tite yuɛ va, yara ’ka an gyɛ lɛ ’bɛ we ma lo; naa, fɛan zo lé we faa lé ko a fe ka lɛ é a weboen nya, a zo duo lé, ka ma we lé ko fe Tite lɛ kobo ze vɔle nya, ’bɛ é ziin, Tite ’bɛ ye webozen nya.

¹⁵ Ka mi lɛdɔma fɛan zo bɛ, yé ka Tite si kalé bɛn nya kanale valé gligli nya ka gi fɛan zo bɛ, dé a sele dɔ Tite gi ka va sɔlɛle kɛlɛ a bli gi blɛn.

¹⁶ An bɔa an bli vole lɛ ka lɛ we faa gi, bɛwemalé an gi nana.