2 Korɛnt Munu 6 - Kazambale lé Sebe Sauunu 1979

¹ Ko a Kazambale va nyanamapa béénu nya, bɛwemalé ko we plaan ka lɛ léé, Kazambale lé zin lé ka ye, té é vo ka ma é pla lo.

² Naa, é léé: Bléyi zin nya maa i dére ’ma, Yé siéwegi yi nya an bɔ i va. Bé ye, bléyi zin lé é ke lao ’ko, yé siwegi yi zin lé é ke lao ’ko.

³ Ko ’ka misaanwe do kpen kɛla monomono lo, té wo we dɔ Bale va nyanama nwiin lo we gi.

^4-5 Ko kle ble, fɛ nyaan ko lee, ko nyané ble, wo ko bla, wo ko vɔ bokɔn gi, flamunu nwa ko ma, ko nyanama pa, ko vo é vuole é béli, ko lɔrɔ sɔn. We ’konu faa gi, ko bli kɛlɛ tiéé é baba yé kobo gɔɔn Kazambale wuomunu nya.

⁶ Kobo gɔɔn a nya é ziin, kɛlɛle sauun koo, wedɔɔle koo, bli tiéé koo, wezin kɛlɛle koo, Léli Sauun koo, lɔrɔpale bozen koo,

⁷ webozen dére koo, Kazambale lé plɛplɛ koo, we tegele lé é ke gulidanfɛnu valé mi botakuunfɛnu nya, ’bɛ koo, wo nya.

⁸ Dé wonɔ ko tɔ bɔa, ’té woo yaragyɛwe bɔa ko ma. Dé wonɔ ko tɔ zin fé, ’té woo ko tɔ sɛra; woo ko yé bélé dabli kɛlɛzannu zo, dɔlé ’té ko a wezin fezannu nya;

⁹ woo ko yé bélé wo ’ka ko dɔɔa lo, dɔlé ’té wo ko dɔɔ; woo ko yé bélé ko a gana, dɔlé ’té ko a é yuɛma; woo ko yé bélé ko a welɛdɔgizannu nya, dɔlé ’té wo ’ka tan ko gyɛ lɛ lo;

¹⁰ woo ko yé bélé ko a bligikyɛdɔzannu nya, dɔlé ’té ko gi a é nanale yifaama; woo ko yé bélé nyanégyɛzannu zo, dɔlé ’té ko fuafɛnu nɔ mi kiɛre lɛ; woo ko yé bélé fɛ do kpen ’ka ko lee lo, dɔlé ’té fɛ faa a ko lee.

¹¹ Korɛnt munu, ko we faa fé ka lɛ; ko bli a ka va do.

¹² Ka va sɔlɛle a ko gi blɛn; kabo bli gi lé ka ke é tunule.

¹³ Maa we fé ka lɛ bélé maa a we fena anlé nénu lɛ fɛan zo, a zo, kanu é ziin, ka bli ’ka kɛla ko va do loo?

Ka a Bale yuɛmale lé kɔn nya

¹⁴ Munu lé wo bli ’ka é pale lo, ka valé woonu ’ka é bɔle ékema lo. Yili lé ka valé mi ’ka é bɔle ékema a kɔné sina lo, té ka valé ’bɛzan é dɔ a wuo lo. We tegele valé weple éé sɔaa? Fɛna fu valé gunuti éé nanaan?

¹⁵ Krist valé Bélial dére éé sɔa doo? Mi lé a bli ’ka é pale lo, ’bɛ éé dɔa blipazan lé we gii?

¹⁶ Kazambale bangikɔn valé miyilinu, ’bɛnu éé nanaan? Naa, ko a Bale yuɛmale lé kɔn nya, bélé fɛan zo lé Kazambale a fe, a zo. É léé: Maa dan nyana lɛ wo va, yé maa dan tawo lɛ wo méléna; maa dan kɛlɛ lɛ wolé Bale nya, yé wo dan kɛlɛ lɛ anlé munu nya.

¹⁷ Bɛwemalé Mizambale léma: ’Ka si wo méléna; ’ka kini wo nya ékema, Fɛ lé é ’ka sauun lo, té ka mane a ma lo; Yé maa dan ka si lɛ.

¹⁸ Yé maa dan kɛlɛ lɛ ka Ti nya, Yé ka dan kɛlɛ lɛ an benu valé an lunu nya. Yee lé Mizambale Plɛplɛfaazan a fe.