2 Korɛnt Munu 5 - Kazambale lé Sebe Sauunu 1979

¹ Naa, ko a gi dɔɔ léé, sɔkɔn lé ko ke é nyanale a gi tɛrɛ la ’ko, dé é sɛrɛ, kolé kɔn do ana la gi. Mi ’ka kɔn ’ko dɔ lɛ lo, Kazambale ɛ dɔ ko lɛ, yé a guru ’ka dan zana lɛ a gi monomono lo.

² Ko dunnuan ko kɔlɛ ’ko gi. É sɔ ko lɛ léé, ko wɔra kolé la?-?gikɔn gi;

³ ko gi dɔɔ léé, dé ko wɔra ’bɛ gi, ’bɛ a bélé fɛan zo lé sɔ a ko ta yé ko ’ka é porole lo.

⁴ Bléyian va lé ko a sɔkɔn ’ko gi, ko dunnuan weboen nya. Kɔlɛ ’ko a ko ta bélé kɔné zo. É ’ka sɔ lɛ ko lɛ léé, ko vo é pla lo, naa, é sɔ ko lɛ léé, ko wɔra kɔlɛ dɛrɛ gi, yé bélifɛ ’é gafɛ mini.

⁵ Yé mian é kaa kɛlɛ we ’ko lé we ma, Kazambale lé; yee ɛ fɛ pla kaa ta é Léli nya.

⁶ Bɛwemalé, ko fuu a ko ta yifaama, yé ko a gi dɔɔ léé, dé ko a kɔlɛ ’ko gi, ’té ko a é sile Mizan ma baa.

⁷ Naa, ko a tawona blipale yɛrama, ko ’ka tawona fɛ lé ko yuɛnu a yé, ’bɛ yɛrama lo.

⁸ Ko fuu a ko ta yé é sɔ ko lɛ léé, ko si kɔlɛ ’ko gi yé ko go Mizan va.

⁹ Bɛwemalé, ko ke kwa kulina léé, dé ko a kɔlɛ ’ko gioo, dé ko si a gioo, ’ko kɛlɛ mi zinnu nya a yuɛ gi.

¹⁰ Naa, é a lé kaa faa é dɔ Krist lé webleblin ’lɛ, mi faa do do lé é ban yele we ma, dé a kɛlɛwe zin léé? dé a nyané léé? ’té é wo kɛlɛ bléyian va lé é a é kɔlɛ gi bɛ, a yɛrama.

Mi nanale Kazambale va

¹¹ Ko kanale Mizan lee gi dɔɔ, bɛwemalé ko a kwa kulina léé, ko munu bɔn gi kini; naa, Kazambale ko dɔɔ é zima, yé an bli a a lɛ léé, ka bli gi mi, ka ko dɔɔ é ziin.

¹² Ko ’ka kobo ma we zin fena é ziin ka va lo, naa, ko zi nɔ ka lɛ léé, kabo ze vɔ ko tɔ gi, yé ka bɔ we zi pale lɛ munu lé wa wobo ze vɔle naginina yuɛlawenu kɛlɛle nya, ’té wo ’ka a naginina wo bligiwenu nya lo, wo lɛ.

¹³ Naa, dé ko a gwegyɛzannu nya, ’té ko a a nya Kazambale lɛ; dé ko a ’wuoatazannu nya, ’té ko a a nya ka lɛ.

¹⁴ Ko sɔle Krist lɛ é ko tunu, amalé é dɔ ko gi léé, dé mi do kpen ga mi faa lé we ma, ’té mi faa ga;

¹⁵ yé é ga mi faa lé we ma léé, wo lé wo ke é yuɛma, té wo vo é yuɛma wobo zé nya é dɛrɛ lo, naa, ’wo vo é yuɛma mi lé é ga yé é nwa gamunu va wolé we ma bɛ, azé nya.

¹⁶ Bɛwemalé, é sia bléyi ’ko va, ko ’ka mi do kpen dɔɔa mi nya tɛrɛlamunu lé midɔɔbɛ nya lo, yé dé ko Krist dɔɔ tɛrɛlamunu lé midɔɔbɛ nya é kyɛn, lao ko ’ka a dɔɔa é dɛrɛ ’bɛ bɛ gi lo.

¹⁷ Dé mi a Krist gi, ’té é a mi dɛrɛ nya; we kyɛnnu faa gié yé wenu faa kinin we dɛrɛnu nya.

¹⁸ Yé ’bɛ faa éé sié Kazambale ɛ va, yee ɛ ko nana ’é va Krist lé we ma, yé é munu nanale ’é va lé nyanama nɔ ko lɛ.

¹⁹ Naa, Kazambale a Krist gi, tɛrɛlamunu nanale ebozen va we gi; é ’ka munu lé wesɛrɛ?-?lenu vo lɛ wo nwiin lo, yé é nanale ’é va dére bɛ pa ko lee, léé, ’ko fe.

²⁰ Bɛwemalé ko a Krist bɛgizannu nya, bélé fɛan zo lé Kazambale éé we plaan mi lɛ ko lɔlu nya, a zo; ’té ko zanté vɔa ka lɛ Krist tɔ gi léé, ’ka nana Kazambale va ma.

²¹ Krist lé é ’ka wenyané dɔɔ lɛ monomono lo, Bale a kinin wenyané nya kolé we ma, léé, Kazambale ’é ko kɛlɛ tegele bélé ’é zo Krist gi.