2 Korɛnt Munu 3 - Kazambale lé Sebe Sauunu 1979

Ko a Kazambale va nyanama dɛrɛ pazannu nya

¹ Ka léé, ko nwa ko tɔbɔle nya é ziin? Taa, ko mawe a a gi léé, kobo tɔbɔsɛbɛ pa ka lɛ ziaa? Taa, ko mawe a a gi léé, ka ko tɔbɔsɛbɛ pa mi bɛnu lɛ ziaa? bélé fɛan zo lé mi kenu mawe ke a gi, a zoo?

² ’Kaanu ɛ ke kolé sɛbɛ nya, sɛbɛ lé é ke é gyɛle ko bli gi, a nya; sɛbɛ lé munu faa a dɔɔ, ’té wa ta fé, a nya.

³ ’Kaanu ɛ ke Krist lé sɛbɛ wéiin lé, ko panyanama a gyɛ, a nya; wo ’ka a gyɛ lɛ nankréyi nya lo; naa, wa gyɛ Bale yuɛmale Léli nya. Wo ’ka a gyɛ lɛ gɔlɛfén ta lo; naa, wa gyɛ mi nɛfén ɛ ta, ka blinu gi.

⁴ Krist lé we ma lé ko bli a Kazambale lɛ, amalé ko we fé ’bɛ zo.

⁵ Maa ’ka a fena léé, kobozen é bɔa ko ’wuogibɔrɔmawe do kɛlɛle lɛ, bélé fɛan zo lé éé sié kobozen va, a zo lo; naa, ko bɔle we kɛlɛle lɛ éé sié Kazambale ɛ va.

⁶ Yé é bɔ ko va é ziin yé ko bɔ kɛlɛle lɛ gipawe dɛrɛ gi nyanamapazannu nya léli yɛrama, naa, sɛbɛ yɛrama kaan lo; sɛbɛ éé fɛ gya, yé Léli éé fɛ bélié.

⁷ Bale va nyanama lé ke bélidɔwe nya, ’té é ke é gyɛle sɛbɛwɔlɛnu nya gɔlɛ ta bɛ, alé we pélisia fuasan nya, dɔlé ’té éé mi gya. Fuasan ’ko é Moizi yara bi fɔɔ yé Izraɛl munu ’ka bɔa a yara naginile lɛ lo, dɔlé ’té fuasan ’ko ’ka mɔnfɛ nya lo.

⁸ Dé ’bɛ a ’bɛ zo, Bale va nyanama lé éé Léli Sauun no nii? ’Bɛlé fuasan ’ka mini lɛ koɛ ta loo?

⁹ Bale va nyanama lé éé we dɔa mi nwiin, dé ’bɛlé fuasan ana, ’té Bale va nyanama lé éé mi kɛla tegele, ’té ’bɛlé fuasan mini.

¹⁰ Weboen nya, fɛ lé alé fuasan ke é vinin, ’bɛ ’ka fuasan nya é dɛrɛ lo, fuasan do mini a ta, azama.

¹¹ Dé giéfɛ lé fuasan ana ’naan, ’té fɛ lé é dan vo lɛ ana, ’té ’bɛlé fuasan ’ka dan mini lɛ a ta loo?

¹² Ko bli a ’bɛ zo we lɛ, amalé ko we fé ko fuu nya ko ta,

¹³ yé ko ’ka sɔné buaan ko yara bélé Moizi a kɛlɛ fɛan zo, a zo lo. É sɔné bua é yara, léé, té Izraɛl munu yuɛ é vɔ fuasan lé ke giéfɛ nya, a ta lo.

¹⁴ Naa, wo tɔné gi kɛlɛ é yuyu fɔɔ yi ’ko nya, ’té sɔné duo ana, bléyian va lé wo ke Gipawe Kwa ta fena, a bléyi va, ’té é ’ka é sile lo, naa, dé mi a Krist gi, ’té é a é sile ’bɛzan ta.

¹⁵ Fɔɔ yi ’ko nya, dé wa Moizi lé sɛbɛ ta fena, é a bélé fɛan zo lé sɔné a é zénle wo bli ta, a zo,

¹⁶ naa, dé mi nɔla Mizan va, sɔné éé sié a ta.

¹⁷ Mizan lé wa fe bɛ, Bale Léli lé, yé fɛana lé Mizan Léli ke, ana lé mi a éboma.

¹⁸ Yé sɔné ’ka ko yara lo amalé ko Mizan lé fuasan yé tegele bélé fɛan zo lé mi é ’é yara yé vlinvlin gi, a zo. ’Bɛ zo lé, Mizan Léli éé goo ko dɔbɛ nɔlale nya, ’té éé kolé fuasan taa paan, fɔɔ yé kolé fuasan é kɛlɛ bélé Mizan zé zo.