2 Korɛnt Munu 2 - Kazambale lé Sebe Sauunu 1979

¹ Anbozen lé we ma é ziin, maa ’ka go lɛ ka va lo. Maa ’ka blikyɛdɔwe fiézan va lo.

² Naa, dé an ka bli gi kyɛ dɔa, de ɛ bɔa an gi nanale lɛɛ? ’Té dé é ’ka mi lé maa a gi kyɛ dɔa, ’bɛzan nya lo.

³ Wean ma lé maa sɛbɛ gyɛ ’bɛ zo, yee lé ke léé, dé an da, munu lé é a lé wo an gi nana, té wo an bli gi kyɛ dɔ lo. Yé an bli a ka lɛ léé, dé an gi nana ’té ka faa gi nana.

⁴ An ’bɛ sɛbɛ gyɛ ka lɛ kleblele blɛn koo, bli kyɛ dɔle baba koo, yuɛyi yorole kiɛre koo, wo nya. Maa ’ka a gyɛ lɛ ka gi kyɛ dɔle we ma lo; naa, ka sɔ an lɛ é baba fɛan zo bɛ, kalé a gi dɔɔle we ma lé maa a gyɛ.

’Ka wenyanékɛlɛzan ma we vo sin

⁵ Dé mi do mi blikyɛdɔwe kɛlɛ, ’té maa doan é an bli kyɛ dɔ lo, ’té ka faa lé; gba, viéwole ’ka é zima lo, ka va mi kenu lé.

⁶ We lé ka va mi kiɛre a lɛdɔ mi ’ko gi, ’bɛ a é yi.

⁷ Sin, é a lé ka a ma we vo, yé ka bɔ a va, dé a bli kyɛ é da dɔ yé we ’ko a kele.

⁸ Amalé maa we plaan ka lɛ léé, ’ka gɔɔn a lɛ sin léé, é sɔ ka lɛ.

⁹ Maa ’bɛ sɛbɛ gyɛ ka lɛ we do ma é ziin. Dé ka dan an lɛdɔ lɛ a ma we faa gii? yé maa a gi dɔɔ.

¹⁰ Naa, mian ka a ma we voo, maa é ziin, maa a ma we voo. Yé dé an mi ma we vo, maa kɛlɛ Krist pa gi, kalé we ma,

¹¹ té Satan é ko kele lo we ma. Naa, ko ’ka ko tanyila wenu lé é sɔ a lɛ léé, ’é a kɛlɛ, wo gi lo.

Pɔl bli kyɛ dɔ Troas

¹² We pɔné lé é ke ’ko: an bɔ aan wo Troas Krist lé Wenéné fele we ma, Mizan zi nɔ aan wo an lɛ, maa ’ka aan wo an bwe Tite ye lɛ lo, amalé an gi ’ka ma lɛ an ma lo.

¹³ Bɛwemalé maa wo yai vɔ yé maa go Masédɔane.

Ko a we faa wuovolɛzan nya Krist gi

¹⁴ Kazambale lé éé ko kɛla we faa ’wuovolɛzannu nya Krist gi, yé é ’é dɔɔle gi gyɛ ko nya bélé fɛan zo lé lasikɔrɔ gin néné éé nwɛɛn‐an, a zo, ’wa bɔ vɔ ma.

¹⁵ Naa, ko a Kazambale lé fɛ gin nya Krist gi, munu lé wo si we gi, é valé munu lé wo ke zamaga wona, wo méléna.

¹⁶ Mi kenu vazia, ko a ga gin lé éé dan ga nya, ’bɛ nya, yé mi kenu vazia ko a bélile gin lé éé dan bélile nya, ’bɛ nya. Yé de ɛ bɔa we ’konu lɛɛ?

¹⁷ Naa, ko ’ka Kazambale dére vɔɔan vié nya lo, bélé fɛan zo lé mi kiɛre a kɛla, a zo lo. Ko a Krist lé munu nya yé ko a fé tegele, Kazambale dére nya, Kazambale yuɛ va.