2 Korɛnt Munu 13 - Kazambale lé Sebe Sauunu 1979

We plale voéla valé weale

¹ Maa a gona ka va a gɔnɔ yaazan nya. Wo dan we faa yuɛ gi bo lɛ, dé wenayezan fié léé, dé wenayezan yaa léé, wo dére ta.

² Maa a ka va a gɔnɔ fiézan nya aan wo, maa fe é kyɛn, yé maa ’ka ka va kyɔ lo, maa a fé é ziin an gole ’lɛ, munu lé wo wenyané kɛlɛ é vinin valé mi pɔnénu faa lɛ léé, dé an go é ziin ka va, maa ’ka dan yara gyɛ lɛ mi do kpen ma lo.

³ Ka a tɔmase do naginina, dé Krist éé we fé an lɔlu nyaa? ’Bɛ é dan kɛlɛ lɛ a tɔmase nya, naa, Krist ’ka tɔɔtɔɔ ka vazia lo, é a plɛplɛ ka méléna.

⁴ Wezen lé, é kɛlɛ tɔɔtɔɔ yé wa gyɛ yiliblan ta, naa, é a é yuɛma Kazambale lé plɛplɛ nya; ko é ziin, ko a tɔɔtɔɔ a gi, naa, ko dan vo lɛ é yuɛma wo nya kalé we ma, Kazambale lé plɛplɛ nya.

⁵ ’Ka kabozen nagini, dé ka a blipale gii? ’Ka kabo gi dan. Ka ’ka a gi dɔɔa léé, Jézu Krist a ka gi loo? Taa, ka a munu lé wo sɔn vɔ wo ma, wo nyaa?

⁶ Naa, an bli a a lɛ léé, ka dan a gi dɔɔ lɛ léé, ko ’ka munu lé wo sɔn vɔ wo ma, wo nya lo.

⁷ Naa, ko a bazorona Kazambale lɛ léé, té ka wenyané do kpen kɛlɛ lo; kobo drɔle tegele we gi kaan lo, naa, kalé wezin kɛlɛle we gi, yé ko kɛlɛ bélé yaragyɛmunu zo.

⁸ Plɛplɛ lé ke ko lee, ’bɛ ’ka dɔle wezen ma lé plɛplɛ nya lo, naa, ko dɔa wezen zuo a nya.

⁹ Dé ko a tɔɔtɔɔ, ’bɛ éé ko gi nanaan, ’té dé ka a plɛplɛ, yé we lé ko laan kolé bazorole nya, yee lé ke léé, gun faa ’é si ka ma.

¹⁰ Amalé bléyian va lé maa ’ka ana lo, maa we ’konu gyɛ sɛbɛ ta léé, dé maa go, té an yara tɔntɔn gyɛ ka ta, se lé Mizan a kɛlɛ an lɛ, a nya lo. É se ’ko kɛlɛ an lɛ mi dɔle gligli we gi, é ’ka mi kulugawe nya lo.

¹¹ An bwenu, we voéla lé é ke ’ko: ka gi ’é nana ma; ’ka gun faa si ka ma ma; ’ka ka ke tɔrɔ paa; ka gibɔrɔle ’é kɛlɛ do ma; ’ka vo drɔɔ ma yé sɔlɛle valé mi vo drɔɔ Bale é dan kɛlɛ lɛ ka va.

¹² ’Ka we ka ke va ka bɔn gi fu nya. Kazambale lé munu faa we ka va.

^13-14 Mizan Jézu Krist lé zin koo, Kazambale lé sɔlɛle koo, Léli Sauun lé nanale koo, ’é vo ka va ma.