2 Korɛnt Munu 12 - Kazambale lé Sebe Sauunu 1979

Pɔl lé yuɛziwe valé wegɔɔnle a lɛ

¹ É a lé mi ébo ze vɔ. Dé ’bɛ tɔnɔ ’ka looo, yuɛzigiwe do lé maa a ye Mizambale va, é valé we lé é a gɔɔn an lɛ, maa dan ’bɛ fe lɛ.

² Maa Krist gi mi do dɔɔ; a lɛɛ vu ta ziɛn lo wa sia yé wo goan fɔɔ la yaazan gi. Dé é a é kɔlɛ gii? Dé é si é kɔlɛ gii? Maa ’ka ’bɛ gi dɔɔa lo, Kazambale ɛ ’bɛ dɔɔ.

^3-4 Yé maa gi dɔɔ léé, wo mi ’ko sia yé wo goan Paradi. Dé é a é kɔlɛ gii? Dé é si é kɔlɛ gii? Maa ’ka ’bɛ gi dɔɔa lo, Kazambale ɛ ’bɛ dɔɔ. Yé ’bɛna mi, dére lé mi ’ka bɔa a vɔle lɛ lo yé wo ’ka a se kɛla mi lɛ léé, ’é a vɔ lo, mi ’ko a ’ma.

⁵ Maa dan anbo ze vɔ lɛ mi ’ko zoɛ tɔ gi, naa, dé é ’ka an tɔɔtɔɔ we ma lo, maa ’ka dan anbozen ze vɔ lɛ lo.

⁶ Dé é sɔ an lɛ léé, maa anbozen ze vɔ, ’té maa kanɔ kɛla tavozan nya lo, ’té maa wezen fé. Naa, maa ’ka a kɛla lo, léé, té anlé we é dɔ mi do gi blɛn yé é mini an kɛlɛwe lé é a ye, é valé an kɛlɛwe lé é a ’ma, wo ta lo.

⁷ Té an blii boblɛn nya lo we gi wegɔɔnle zinnu ’ko lé we ma, Kazambale Satan lé nwunvɔzan do wɔra an kɔlɛ gi, é a an ma bélé léli zo, yé é an tua yé ’bɛ an bliile boblɛn nya yi ga.

⁸ Maa bazoro gɔnɔ yaa nya Mizambale lɛ léé, ’é a si an ma,

⁹ yé é lé an lɛ léé: Anlé plɛplɛ lɛ éé sɔɔan fɛ tɔɔtɔɔ nya, amalé anlé zin izé bɔ. Amalé maa dan anbo ze taa vɔ lɛ gi nanale nya an tɔɔtɔɔnu we ma, Krist lé plɛplɛ zénle an gi we ma.

¹⁰ Bɛwemalé an tɔɔtɔɔnu koo, an sɔnɔle koo, diri kinile an lɛ koo, nyanéblele koo, kleblele koo, an dɔle wo wuo Krist lé we ma é a an ginanawe nya; naa, dé maa a tɔɔtɔɔ, ’té maa a plɛplɛ.

Korɛnt Krétiɛnnu lé gibɔrɔ a Pɔl ma

¹¹ Dé maa a tavozan nya, ’té ka ɛ an kɛlɛ a nya, dɔlé ’té é a lé ka ɛ an ma we zin fe; nwunvɔzan dɛn zima zimanu ’ko, wo ’ka mini lɛ an ta we do kpen gi lo, dɔlé ’té maa ’ka fɛ do kpen nya lo.

¹² An kɛlɛle nwunvɔzan nya tɔmase nwɛɛn ka méléna, an bli tiéé gidanle faa gi koo, tɔmasenu koo, we blɛnblɛnnu koo, gyɛzorowenu koo, wo nya.

¹³ Maa ’ka kɛlɛ lɛ ka nwiin kɔné nya lo, dé ’bɛ kaan lo, mɛ we zin lé maa a kɛlɛ léglizi bɛnu lɛ yé maa ’ka ’bɛ kɛlɛ lɛ ka lɛ loo? Kalé zanté wenyané ’ko ma.

¹⁴ Ka ye, maa anlé kɔné bɛ pa ékema gole ka va we gi a gɔnɔ yaazan nya, yé an ’ka dan kɛlɛ lɛ ka nwiin kɔné nya lo; naa, maa ’ka ka leefɛ naginina lo, kabozennu lé maa ke a naginina. É ’ka lé nénu é fɛ zun dɔ wo yaazannu lɛ lo, wo yaazannu ɛ fɛ zun dɔa wolé nénu zé nya.

¹⁵ Dé é a maa nya, maa dan fɛ nɔ lɛ ka lɛ an bli zin nya, yé maa dan anbozen nɔ lɛ kaboen lé we ma. Dé ka sɔ an lɛ kaii, ’té maa ’ka sɔa ka lɛ loo?

¹⁶ Dé é a ’bɛ zooo, an ’ka ka nwiin kɔné nya lo; naa, maa a gikinizan nya, yé gikini ’ko nya lé maa ka kun.

¹⁷ Munu lé maa wo pa ka lɛ zia, maa tɔnɔ ye wo va mi do kpen ma ka vaa?

¹⁸ Maa zanté vɔ Tite lɛ léé, ’é go ka va yé maa bwe do pa zia a va; Tite tɔnɔ si ka lee gla nyaa? Ko ’ka tawo lɛ yee bli duo nya loo? Ko giégane ’ka do loo?

¹⁹ A pélisiana mɔn, é dɔ ka gi léé, ko a kobo drɔna ka yuɛ va. Gba, ko we fé Krist gi Kazambale ’lɛ, yé an sɔlɛzannu, ko ’bɛ faa fé ka tinle Bale lé we gi we ma.

²⁰ Naa, an kana léé, dé maa bɔ ka va, maa ’ka dan ka ye lɛ bélé fɛan zo lé é sɔ an lɛ, a zo lo, yé ka dan maa ye lɛ fɛan zo lé é ’ka sɔ lɛ ka lɛ lo, a zo. An kana léé, wesiale koo, maawole koo, zapale koo, zakɛlɛle koo, mi tɔ sɛrɛle koo, mi tɔ naané bɔle koo, boblɛn koo, we bilibili koo, maa dan wo ye lɛ.

²¹ An kana léé, dé an bɔ, yara dɛrɛ é dan an gyɛ lɛ anzé Bale yara kalé we ma, yé an dan wuvɔ lɛ mi kiɛre lé wo wenyané kɛlɛ turu yé wo ’ka ’wo bli nɔla lɛ we tiridɔle koo, pɛnpɛnnégyɛle koo, we vɔnle koo, wo ma lo, wolé we ma.