2 Korɛnt Munu 11 - Kazambale lé Sebe Sauunu 1979

Pɔl valé nwunvɔzan dɛnnu

¹ Dé ka bɔalɛ léé, ka ’wuo dɔ anlé tavole wuo sɛ! Kalé zanté, ’ka ’wuo dɔ a wuo ma.

² Maa ka pu dɔ lesizan do kpen ɛ lɛ, yé maa ka nɔ Krist lɛ, blɛn lé é ’ka tan gɔné dɔɔa lo, a nya, bɛwemalé maa a ka ta maawona bélé Kazambale lé maawole zo.

³ Naa, fɛan zo lé méné Eve saan élé dabli kɛlɛle nya, an kana léé, dé ka ’wuo é da sɛrɛ yé ka ’ka Krist kunwo ka bɛ fié nya yé ka vo a va loo?

⁴ Naa, dé mi do da Jézu lé, ko alé we fe ka lɛ bɛ, a bɛ lé we fe lɛ ka lɛ, yé Kazambale Léli lé ka a ye, dé ka a bɛ lé we ’ma, yé wenéné lé ka a nyi si, dé ka a bɛ ’ma tɔɔn, ’té ka a ka ’wuo dɔna bɛ wuo tegeleee.

⁵ Naa, é dɔ an gi léé, nwunvɔzan dɛnnu zima zima ’ko, wo ’ka gié lɛ an ta we do kpen kɛlɛle gi lo.

⁶ Dé maa ’ka we fé an zua lo, maa we dɔɔ duowo, yé ko bɛ nagɔɔn ka lɛ bɛ faa tere ma, we faa tere gi.

⁷ Maa anbozen kɛlɛ aan wo kiéné, ka kɛlɛle blɛn we gi, Kazambale lé Wenéné fele nya ka lɛ é pla, ’bɛ a wenyané nyaa?

⁸ An léglizi bɛnu ta ble, wolé gɔɔli sile nya, bɔle ka va we gi. Yé dé maa a ka va, dé an mawe a fɛ do gi, maa ’ka é dɔle mi do nwiin kɔné nya a we ma lo;

⁹ naa, bwenu lé wo si Masédɔane, fɛnu lé an mawe ke wo gi, wa nɔ an lɛ. Maa ’ka a nyi si lɛ léé, an kɛlɛ kɔné nya mi do kpen nwiin lo, yé maa ’ka dan a nyi si lɛ monomono lo.

¹⁰ Krist lé webozen lé é ke an gi, a nya lé maa a fé, wo ’ka dan an tɔzinfémawe ’ko si lɛ an lee Akai tɛrɛ faa la monomono lo. Mɛmaléé?

¹¹ Ka ’ka sɔ lɛ an lɛ lo, ’bɛ we maa? Kazambale ɛ ’bɛ gi dɔɔ.

¹² Naa, wean maa a kɛlɛ, yé maa dan a kɛlɛ lɛ é ziin, yee lé é ke ’ko: munu lé wa kwa kulina léé, wobo gɔɔn nwunvɔzannu nya bélé ko zo, yé maa wo gi bɔra.

¹³ Munu ’konu a nwunvɔzannu dɛn nya, wa dabli nyanama pazannu nya, wobo ma nɔla Krist lé nwunvɔzannu zo.

¹⁴ Yé ’bɛ ’ka givuruwe nya lo; Satan bozen é ébo ma nɔlaan Bale lé lanje zo.

¹⁵ Bɛwemalé dé alé nyanamapazannu wobo ma nɔla we tegele gi nyanamapazannu zo, ’bɛ ’ka givuruwe nya lo. Naa, wozé ’wuoplana é dan kɛlɛ lɛ wozé nyanama yɛrama.

Pɔl lé nyanéblelenu

¹⁶ Maa lé é ziin léé, té mi do kpen an ye tavozan nya lo. Eɛ, dé ka an ye tavozan nya, ’ka ’wuo dɔ an wuo bélé tavozan zo yé maa é ziin maa anbo ze vɔ sɛ.

¹⁷ We lé maa ke a fena, maa ’ka a fena bélé Krétiɛn zo lo, maa a fena tavole nya anbo ze vɔle we gi an bli tadɔle plɛplɛ nya.

¹⁸ Mi kiɛre wobo ze vɔa tɛrɛlawe gi; amalé maa é ziin, maa dan anbo ze vɔ lɛ.

¹⁹ Naa, ka wedɔɔmunu babané, ka ’wuo dɔa tavozannu wuo é zima.

²⁰ Dé mi ka kɛlɛ ’é wuomunu nya, dé mi ka table, dé mi kalé fɛ kyeenwo, dé mi ébo kɛlɛ blɛn ka ma, dé mi ka blin gyɛ, ’té ka ’wuo a é dɔle ’bɛzan wuo ’kyɛ. Ka bɔ!

²¹ Yé ka léé, ko a sɔsɔ. Eɛ, weboen lé. Yara a an gyɛna. Naa, dé é dɔ mi bɛnu gi léé, woo bli ta dɔa plɛplɛ yé wo ’wobo ze vɔ wean ma, ’té maa é ziin, an bli ta dɔa plɛplɛ. Maa a wefena tavozan zo.

²² Wo léé, ’wa Ébrunu nyaa? Yé maa nii? Wo léé, ’wa Izraɛlnu nyaa? Yé maa nii? Wo léé, ’wa Abraam kulunu nyaa? Yé maa nii?

²³ Wo léé, ’wa Krist gi nyanamapazannu nyaa? Maa a we fena bélé tavozan zo. Yé maa nii? Maa ’ka ’bɛ nya loo? Anzé gié wozé ta. An nyanama pa é baba é mini wo ta; wo an bla é baba é mini wo ta, wo an vɔ bokɔn gi, ’bɛ gié wozé ta baa, yé maa anbo bɔra ga lɛ gɔnɔ kiɛre.

²⁴ Gɔnɔ soru Juifinu an bla gɔnɔ yɔ do wɔlɛ vu ta sɔraziɛn.

²⁵ Gɔnɔ yaa wo an bla wɛsɛné nya; gɔnɔ do wo an gyɛ gɔlɛ nya; gɔnɔ yaa ’yitagoro zana ko nya; an yiéyi do valé béli do kɛlɛ wɛyi va.

²⁶ Gɔnɔ kiɛre ’té maa a ta la; maa anbo bɔra ga lɛ yuunu va; maa anbo bɔra ga lɛ kyeenmunu lɛ; maa anbo bɔra ga lɛ an bɛnnu lɛ; maa anbozen bɔra ga lɛ bɛn bɛnu lɛ; maa anbozen bɔra ga lɛ fla; maa anbozen bɔra ga lɛ bwi gi; maa anbozen bɔra ga lɛ wɛyi va; maa anbozen bɔra ga lɛ dabli bwenu va.

²⁷ Maa nyanama pa, yé maa nyané ble; an vo é yuɛma é béli gɔnɔ kiɛre; lɔrɔ valé ’yiminilɔrɔ an gyɛ; an lɔrɔ sɔn gɔnɔ kiɛre; dunu an gyɛ; an vo é porole.

²⁸ ’Bɛ ta loru, yi faa do do ma, léglizinu faa tabinle a an nwiin kɔné zo, ’té maa a é tunule ’bɛ nya.

²⁹ Mi kyɛn ɛ ke tɔɔtɔɔ yé maa ’ka tɔɔtɔɔ loo? De ɛ saan yé an bli ’ka nwa lɛ loo?

³⁰ Dé é a lé maa anbo ze vɔ, ’té an tɔɔtɔɔ we ma lé maa dan anbo ze vɔ lɛ.

³¹ Kazambale lé ke Mizan Jézu Ti nya, ’té wa drɔɔ voo lɛɛfaama a glɛ ’ka lo, é a gi dɔɔ léé, an ’ka viéwona lo.

³² Dé maa a Damas, minwiinzan Aréta lé gbɔrɔnama sunyanu dɔ Damas munu lé fla zi an kunle we ma;

³³ naa, wo an bɔra fɛnɛti do ta kyɛɛ gi, kɔnguru ta, yé an so wo lee.