2 Korɛnt Munu 1 - Kazambale lé Sebe Sauunu 1979

Weale lé

¹ Maa Pɔl lé an ke Jézu Krist lé nwunvɔzan nya Kazambale lé blibɔmale nya, maa valé bwe Timoté, ko ɛ ke sɛbɛ ’ko gyɛna ’kaa Korɛnt munu lɛ. ’Kaa Kazambale lé léglizigimunu lé ka ke Korɛnt, ko we ka va. ’Kaa Kazambale lé munu faa lé ka ke Akai tɛrɛ faa la, ko we ka va. Sɛbɛ ’ko a kazé nya é ziin.

² Kaa Ti Bale valé Mizan Jézu Krist ’wo zin kɛlɛ ka lɛ yé ’wo ka vo drɔɔ ma.

Pɔl Kazambale bɔ vɔ

³ Kaazan Jézu Krist Ti lé é ke é ziin alé Bale nya, a drɔɔ ’é vo ma. É a ko Ti lé a nyanai éé zén‐é ko ta, yé é a Bale lé éé ko tɔrɔ paan, a nya.

⁴ We tɔntɔn faa lé woo bɔa ko ma, éé ko tɔrɔ paan wo ma, léé, dé we tɔntɔn bɔ mi bɛnu ma, yé ko bɔalɛ léé, ko wo tɔrɔ paa, bélé Kazambale ko tɔrɔ paa fɛan zo, a zo.

⁵ Naa, dé ko nyané kiɛre ble Krist lé we ma, ’té Krist éé ko tɔrɔ paan kiɛre é ziin.

⁶ Dé ko kle ble, ’té ’bɛ a ka tɔrɔpaale valé ka sile we gi zé nya; dé Bale ko tɔrɔ paa, ka tɔrɔ paale we ma lé éé a kɛla, yé dé ka kle ble bélé fɛan zo lé ko ke kle blena, a zo, ’té éé bɔa ka va.

⁷ Ko bli a ka lɛ boenwo; ko gi dɔɔ léé, kazé a kleblele va fɛan zo, a zo duo lé kazé a tɔrɔpaale va é ziin.

⁸ Ko bwenu, é sɔ ko lɛ léé, ko ka bɔn‐in kini, kle lé é bɔ ko ma Azi tɛrɛ la, a ma. É a blɛn yé é kɛlɛ ko ma tɔntɔn fɔɔ yé ko bli si ko vole é yuɛma lɛ.

⁹ É dɔ ko gi boenwo léé, ko dan ga lɛ. We ’ko bɔ ko ma we paale ko gi we ma, léé, té ko bli é vo kobo lɛ lo, naa, ko bli ’é vo Kazambale lé éé mi galenu bélié, a lɛ.

¹⁰ Kazambale ko si ga ’ko lee, yé ko bli a a lɛ léé, é dan ko si lɛ a lee é ziin; iin, é dan ko si lɛ a lee yifaama,

¹¹ dé ka bɔ ko va bazorole nya. Yé dé mi kiɛre bazoro kolé we ma, munu kiɛre é dan Kazambale bɔ vɔ lɛ é ziin, wezin lé Kazambale é dan a kɛlɛ lɛ ko lɛ, alé we ma.

Wean ma lé é ’ka go lɛ wo va lo

¹² Ko tɔzinfemawe lé ke ’ko: kolé wevasibli a kolé wenayezan nya léé, ka valé tɛrɛlamunu va, ko giébɛ a sauun valé wéiin Kazambale yuɛ gi. Ko ’ka gié lɛ ka méléna tɛrɛ la wedɔɔle nya lo; Kazambale lé zin nya lé ko gié.

¹³ We lé ko a gyɛna sɛbɛ gi, ka a ta fe yé ka a gi ’ma. A gi bɛ ’ka lo.

¹⁴ Bléyi ’ko va ka ko dɔɔ sɛ, naa, an bli a a lɛ léé, ka dan a gi dɔɔ lɛ tegele léé, Kaazan Jézu Krist lé yi la, ka dan kɛlɛ lɛ ko tɔzinfémazannu nya fɛan zo, a zo duo lé ko dan kɛlɛ lɛ ka tɔzinfémazannu nya.

¹⁵ We ’ko a an gi a zo, amalé é vinin é sɔ an lɛ léé, an go ka va kalé zin fiézan yele we ma;

¹⁶ é sɔ an lɛ léé, maa gié ka vazia, yé maa go Masédɔane, ’bɛ zuo dé an si Masédɔane yé maa go ka va, yé ka an dɔ zia Judé tɛrɛ la.

¹⁷ É a an gi léé, maa kɛlɛ ’bɛ zo ’naan, maa a we pla fenaa? É dɔ ka gi léé, maa we fé kelekele, dé an we iin tɔɔn yé maa léé, gbaa?

¹⁸ Kazambale a yarapawelazan nya, é ’ka ’bɛ zo lo. We lé ko a fe ka lɛ, é ’ka é vɔɔle iin valé gba nya lo.

¹⁹ Naa, Kazambale Be Jézu Krist lé, maa koo, Silvɛn koo, Timoté koo, ko alé we fe ka méléna bɛ, é ’ka kɛlɛ lɛ iin valé gba nya lo; naa, yee ɛ ke iin nya.

²⁰ Naa, wenu lé ’bɛ ke Kazambale lé blivolɛdére faa lé we nya bɛ, yee ɛ ke iin nya Kazambale gi. Bɛwemalé, ko amɛɛn fé Kazambale tɔ bɔle nya alé we ma.

²¹ Yé mian é ko dɔ gligli ka va Krist gi, yé é nyɔnɔ zén ko nwiin, Kazambale lé,

²² yee ɛ fɛ dɔ ko ma é ziin, yee ɛ fɛ pla ko ta é Léli nya.

²³ Naa, maa Kazambale si anbozen lé wenayezan nya léé, maa ’ka a va léé, ka bli kyɛ é dɔ lo, amalé maa ’ka go lɛ Korɛnt lo.

²⁴ Ko ’ka kalé blipale zavɔna lo, ka bli a we lɛ tegele, naa, é sɔ ko lɛ léé, ko bɔ ka va yé kalé gi nanale ’é kɛlɛ blɛn.