2 Tɛsalɔnik munu 2 - Kazambale lé Sebe Sauunu 1979

Mi ple lé we

¹ Bwenu, é sɔ an lɛ léé, maa we pla ka lɛ Kaazan Jézu Krist dale valé kaa zénle ékeva a va lé we ma.

² Dé ka a ’ma léé, Mizan dayi bɔ tɛkɛ, kalé zanté, té di é kini ka gi lo, té gligli é zén ka gi lo. Dé léli ɛ feoo, dé mi ɛ feoo, dé é kɛlɛ sɛbɛ lé wo léé, ko ɛ gyɛ, a nyaoo, té ka pa ’bɛ ta lo.

³ Dé mian é dabli gɔnɔ faa kɛlɛoo, té ka dɔ ’bɛzan lɛ lo. É a lé midiérabléyi é bɔ é vinin, yé mi ple lé é ke é sanle bɛ, é a lé wa ye bɔrana.

⁴ É a mi nyanézan nya. É léé, fɛ faa lé wa laama Bale, é valé fɛ faa lé munu a bɔa, ’é a wo nwiin, fɔɔ yé é nyana Balebangikɔn gi, ’té é ébozen laama Bale.

⁵ Dé maa a ka va é vinin, maa we ’konu fe ka lɛ. A sele saan ka gii?

⁶ Yé sin, mi lé ’bɛ a bɔrale yi ga fɔɔ yé a bléyi é bɔ, ka ’bɛzan dɔɔ.

⁷ Yé mi ple a élé nyanama pana tɛkɛ, naa, é a pana kyeen gi fɔɔ yé mi lé ’bɛ a bɔrale yi ga, yé ’bɛ é si ana.

⁸ ’Bɛ zuo, yee Bale lé zi ma wenyané fezan é dan bɔra lɛ, mian Mizan Jézu é dan a sɛrɛ lɛ é ’léé fu nya, yé é dan a kulu ga lɛ é dale lé san nya bɛ, yee lé.

⁹ Bale lé zi ma wenyané fezan ’ko bɔrale a Satan lé nyanama nya, yé gyɛzorowenu gɔnɔ faa koo, tɔmasenu koo, viéwe blɛnblɛnnu koo,

¹⁰ dabliwe ple faa koo, é dan wo kɛlɛ lɛ. Webozen lɔrɔ lé éé mi sié we gi, é ’ka munu ma lo, amalé we ’konu é dan bɔ lɛ woo munu lé wo ke zamaga wona, wo ma.

¹¹ Amalé Kazambale é dan wo ta pɔné vo lɛ brɔkɔɔ, wo bli vole viéwe lɛ we ma,

¹² yé munu faa lé wo ’ka ’wo bli vo lɛ wezen lɛ lo, ’té wo gi nana weple ma bɛ, yé Bale ’é ga dɔ wo nwiin.

Kazambale ko si a va léé, ko si we gi

¹³ Ko bwenu, ka sɔ Mizambale lɛ é baba, amalé é a lé ko Kazambale bɔ vɔ yifaama kalé we ma. Naa, a péli sia bléyi va Kazambale ka si a va ka sile we gi we ma. Kazambale Léli lé ka kɛlɛle sauun valé ka bli vole webozen lɛ, ’bɛ ka si we gi.

¹⁴ Ka sile we gi ma lé é ka laa, Wenéné lé ko a fe ka lɛ, a nya, kalé fua blele Kaazan Jézu Krist va we gi.

¹⁵ Bɛwemalé, bwenu, ’ka dɔ gligli, yé wenu lé ko a paa ka gi, dé é a ko fedére nyaoo, dé é a ko gyɛsɛbɛ nyaoo, ’ka kun wo ma.

¹⁶ Kaazan Jézu Krist bozen valé kaa Ti Bale lé kaa sɔ a lɛ bɛ, ’té é zin kɛlɛ kaa lɛ kaa tɔrɔpaale nya yifaama, a glɛ ’ka lo, é valé bli kɛlɛle wezin lɛ nya bɛ,

¹⁷ ’wo ka tɔrɔ paa yé ’wo plɛplɛ nɔ ka lɛ nyanama zin faa pale valé dére zin faa fele we ma.