2 Minwiinmunu lé Wezuofe Sɛbɛ 9 - Kazambale lé Sebe Sauunu 1979

Séba munu nwiin le da Jérusalɛm

¹ Tɔ lé Salomɔn a ye, Séba munu nwiin le a tawe ’ma aan wo, é da Jérusalɛm Salomɔn gi dan lɛ tɔraléé gyɛle nya. A zuomunu a kiɛre; alé nyɔgɔménu nwiin kɔnénu lé ke zianblan ginzannu valé kyan kiɛre valé gɔlɛwezannu nya. É go Salomɔn va, yé we faa lé é ke a bli gi, é a fe ’bɛ lɛ.

² Salomɔn alé welaalenu faa zi pa, yé we lé Salomɔn ’ka bɔ lɛ a gi fele lɛ lo, ’bɛ we ’ka lo.

³ Salomɔn lé wedɔɔle faa koo, kɔn lé é a dɔ koo,

⁴ wolé fɛblelenu koo, a leezannu lé kɔnnu koo, wolé nyanama valé wolé nyanamapasɔnu koo, alé nwɛminikana sizannu valé wolé nyanamapasɔnu koo, sikaliénu lé woo giéan wo ta gole Gakelebale lé kɔn gi we ma, wo koo, Séba munu nwiin le a faa ye.

⁵ A gi faa vuru a ma, yé é lé minwiinzan blɛn lɛ léé: We lé maa ’ma anlé tɛrɛ la i mawe valé ilé wedɔɔle nya, weboen lé turu.

⁶ Wo wean fe, dé maa ’ka da lɛ kɔɔn yé maa a ye anbo yuɛ nya lo, ’té maa ’ka paan a ta lo. Yé bé ye, fɛan zo lé ilé wedɔɔle a blɛɛn, wo ’ka a lɛ do fe lɛ an lɛ boenwo lo. I tawe lé maa a ’ma bɛ, i gié ’bɛ faa ta.

⁷ Ilé munu zé a néné; i wuomunu lé wo ke i ’lɛ yifaama, ’té woo ilé wedɔɔle maan, wozé a néné.

⁸ Gakelebale ilé Bale lé é zin kɛlɛ i lɛ léé, i nyana élé webleblin ta, léé, i pla munu nwiin Gakelebale, ilé Bale tɔ gi, ’wa drɔɔ vo ma. Izraɛl sɔ ilé Bale lɛ, yé é sɔ a lɛ léé, Izraɛl ’é vo ana lɛɛfaama, amalé é i dɔ wo nwiinzan blɛn nya we drɔle valé we tegele kɛlɛle we gi.

⁹ Kyan talan yɔ suiɛdo koo, zianbla ginzan kiɛre koo, gɔlɛwezannu koo, é wo nɔ minwiinzan blɛn lɛ. Zianbla ginzannu lé Séba munu nwiin le a nɔ minwiinzan blɛn Salomɔn lɛ, wo ’ka ’bɛ zoɛ zianbla ginzannu yé é dɛrɛ lo.

¹⁰ Uram valé Salomɔn leezannu lé wo kyan si Ofii yé wo da a nya, wo da sandalayili valé gɔlɛwezannu nya é ziin.

¹¹ Minwiinzan blɛn sikaliénu kɛlɛ sandalayili nya Gakelebale lé kɔn valé minwiinzan blɛn lé kɔn zé nya, yé é lɛrɛvɔmunu lé kɔnɔnu valé gitaanu kɛlɛ a nya é ziin. É vinin wo ’ka ’bɛ zoɛ sandalayili ye lɛ Juda tɛrɛ la lo.

¹² Fɛ faa lé é sɔ Séba munu nwiin le lɛ, é valé fɛ faa lé é a ma laa, minwiinzan blɛn Salomɔn a nɔ a lɛ, yé é kɛlɛ kiɛre é mini fɛ faa lé é a nɔ Salomɔn lɛ, a ta. ’Bɛ zuo é nɔla é ziin yé é go élé tɛrɛ la, yee valé é leemunu nya.

Salomɔn lé fua

¹³ Kyan lé Salomɔn a yé lɛɛ do do gi, é a kyan talan wuru yaa yɔ yaa wɔlɛ suiɛdo.

¹⁴ Kyan lé é ’bɛ sié yaasimunu valé fɛdanmunu lee koo, kyan valé gɔɔlifu lé Arabunu nwiinzannu valé ana tɛrɛ la gbɔrɔnamanu da a nya Salomɔn lɛ koo, ’bɛ a é yɛrama.

¹⁵ Minwiinzan blɛn Salomɔn mibotakuunfɛ blɛnblɛnnu wuru do kɛlɛ kyan lé wa gyɛ, a nya; wo faa do do lé kyan a sikla wuru yaa yaa nya.

¹⁶ Yé é mibotakuunfɛ kɛlɛ é ziin wuru do yɔ soru, kyan lé wa gyɛ, a nya. Wo do do lé kyan a sikla wuru do yɔ soru soru. Minwiinzan blɛn wo pla Liban pɔrɔ lé kɔn gi.

¹⁷ Minwiinzan blɛn webleblin blɛn kɛlɛ vwii suiɛ nya, yé é a ma sɔɔla kyan tegele nya.

¹⁸ Webleblin ’ko lé sikalié a suiɛdo yé a gane dɔrala kyan a é kuale webleblin ma, yé a gɔyili a a bɛ fié la.

¹⁹ Golizra foto fié a a gɔyili sɔnɔ, yé golizra foto vu ta fié a sikalié suiɛdo bɛ fié la. Wo ’ka ’bɛ zo fɛ do kpen kɛlɛ lɛ tɛrɛ bɛ do kpen zé nya lo.

²⁰ Salomɔn lé fɛminiégikana faa a kyan nya, yé Liban pɔrɔ gi kɔn gi kananu faa a kyan tegele nya. Kana do kpen ’ka gɔɔlifu nya lo; ’bɛ ’ka we do kpen nya Salomɔn bléyi va lo.

²¹ Taasis lé ’yitagoronu a minwiinzan blɛn lee, ’wo valé Uram leezannu éé tawoo ékeva. ’Yitagoronu ’ko éé sié Taasis lɛɛ yaa gɔnɔ do, ’té woo dan kyan koo, gɔɔlifu koo, vwii suiɛnu koo, palenu koo, pan‐ɔnnu koo, wo nya.

²² Minwiinzan blɛn Salomɔn mini tɛrɛ la minwiinmunu faa ta alé fuablele valé alé wedɔɔle gi.

²³ Tɛrɛlamunu faa nwiinzan blɛnnu a kwa kulina léé, ’wo Salomɔn ye, wedɔɔle lé Bale a pa a bli gi, a ’male we gi.

²⁴ Yé wo faa do do éé dan a blan nya, gɔɔlifu valé kyanfɛnu koo, sɔnu koo, gulidanfɛnu koo, zianbla ginzannu koo, wisoonu valé sokofalenu koo, wo nya; wa kɛla ’bɛ zo lɛɛ faa do do ma.

²⁵ Salomɔn lé goro gana wisoonu a baa fié, ’té wo yiakɔn a, yé alé wisootasunyanu a mi baa suiɛdo. É wo nyana flanu lé goronu ke wona, wo ta, ’bɛ valé Jérusalɛm, minwiinzan blɛn sɔnɔ.

²⁶ Salomɔn pla minwiinmunu faa nwiin, é sia yuu ma fɔɔ yé é bɔ Filisiti tɛrɛ glɛ la yé é bɔ Éjipiti tɛrɛ glɛ la.

²⁷ Minwiinzan blɛn gɔɔlifu kɛlɛ fɛ pla nya Jérusalɛm bélé gɔlɛnu zo, yé é sɛdrɛyili kɛlɛ kiɛre bélé sikomɔyili lé éé tin‐é fɛna pɛblɛɛna, a zo.

²⁸ Éjipiti tɛrɛ valé tɛrɛ bɛnu faa la lé Salomɔn élé wisoonu ye.

Salomɔn gale

²⁹ Salomɔn kɛlɛwe pɔnénu, a vininzannu valé a voélazannu, wa é gyɛle balelayezan Natan lé sɛbɛ koo, Silozan Akija lé balelawefele koo, wenu lé wa gɔɔn balelayezan Jéédo lɛ Nébat be Jéroboam lé we nya koo, wona.

³⁰ Salomɔn pla Izraɛlnu faa nwiin lɛɛ yɔ fié Jérusalɛm.

³¹ ’Bɛ zuo Salomɔn yi gyɛ é tinu va, yé wa pa é ti David lé fla. Yé a be Roboam pla munu nwiin a pa gi.