2 Minwiinmunu lé Wezuofe Sɛbɛ 4 - Kazambale lé Sebe Sauunu 1979

Balebangikɔn gifɛ tɛtɛnénu

¹ É balebanna kɛlɛ zéné nya; a sangi kɛlɛ mɛtrɛ vu yé a ’wuola kɛlɛ mɛtrɛ vu, yé a wuo nwale kɛlɛ mɛtrɛ soru.

² É zéné ’wolikana sere. A ’léé blɛn a mɛtrɛ soru, yé é a é dirile é ke ’léé, yé a nwale loru a mɛtrɛ fié é buu, yé mɛtrɛ vu ta soru bale éé sɔa a zi ’kyɛ.

³ Dirigɔné bale fié fotonu a é dirile a lɔlu wuo, mɛtrɛ buu do dirigɔné vu, mɛtrɛ buu do dirigɔné vu, yé wa zi lɛ sɔɔ a zo. Wo wo sere yee kana nya do.

⁴ Wo yee kana dɔra dirigɔné vu ta fié punu, ’té a yaa yara a é dɔle yirinwana bɛbolazia, yé a yaa yara a é dɔle yirivɔnazia, yé a yaa yara a é dɔle yirinwana bɛyilazia, yé a yaa yara a é dɔle yirinwanazia; zéné ’wolikana a wo punu ’té wo sowɔlɛla faa a a wuo.

⁵ Yee kana boro a bɛlaa nya do. A lɔlu a bélé ’yiminikana lɔlu zo, é kɛlɛle bolu lé goo vwi fotonu nya. ’Bali wuru fié yɔ sɔrafié gi ’yi éé sɔa a gi.

⁶ É kana vu kɛlɛ, yé é wo va kana soru dɔra a bɛyilazia yé é a soru dɔra a bɛbolazia, léé, ’wo kɛlɛ fɛnu ma zuru kananu nya. Balebanwinu lé wa kyɛ blé, woo wo mɛnnu faa ma zuruwo wo gi. Wo zéné ’wolikana kɛlɛ, léé, Balebanmunu é zuru a gi’yi nya.

⁷ É kyan fintran vu kɛlɛ wo kɛlɛbɛ lé wa fe, a yɛrama, yé é wo dɔra Balebangikɔn gi; a soru a bɛyilazia yé a soru a bɛbolazia.

⁸ É tablé kɛlɛ vu, yé é a soru dɔra a bɛyilazia, yé é a soru dɔra a bɛbolazia Balebangikɔn gi. É kyan ’yiminikana kɛlɛ yɔ soru.

⁹ É Balebanzannu lé gɔrɔ bo, yé é gɔrɔ blɛn bo yé é ’bɛ ’léénu pa. É ’bɛlé duolinu ma sɔɔla zéné nya.

¹⁰ É zéné ’wolikana dɔra a bɛyilazia; é a é sialale kɔn ’léé ma sɛ bɛyilazia.

¹¹ Kyɛyeezéngifɛnu koo, diadianu koo, ’yiminikananu koo, Uram wo kɛlɛ. ’Bɛ zo lé nyanama lé minwiinzan blɛn Salomɔn Uram laa a pale we ma Bale lé kɔn blɛn zé nya, é a lɛ sɔɔ.

¹² Kɔn wɛyili fié koo, ’é valé wɛyili ’wuo dirile fié lé ke wɛyilinu ta loru koo, zénésééné fié lé wo wo vɔ wɛyili fié ’wuo ma koo,

¹³ zénésééné fié ma grénadéyili poro foto wuru fié, ’té grénadéyili poro foto bale fié a zénésééné do do ma bɛ, ’té wo wo vɔ wɛyili fié ’wuo ma, wo koo,

¹⁴ kana vu valé wo dɔralafɛ vu koo,

¹⁵ zéné ’wolikana koo, dirigɔné vu ta fié lé wo ke yee kana wuo koo,

¹⁶ kyɛyeezéngifɛnu koo, diadianu koo, wiblegaannénu koo, woo lé. Nyanamapafɛnu ’konu faa lé Uram‐Abi a kɛlɛ minwiinzan blɛn Salomɔn dére ta Gakelebale lé kɔn zé nya, é wo kɛlɛ zéné ma gɔrɔlale nya.

¹⁷ Minwiinzan blɛn dére ta lé wo wo sere Juudɛn yuu lé fɛna pɛblɛɛna bɔtɛrɛ gi Sukɔt valé Séréda méléna.

¹⁸ Salomɔn nyanamapafɛnu ’konu kɛlɛ kiɛre fɛan zo, wo ’ka a kɛlɛzéné dan lɛ kilo la lo.

¹⁹ Salomɔn Bale lé kɔngifɛ bɛnu faa kɛlɛ é ziin: balebanna lé wa kɛlɛ kyan nya koo, tablénu lé woo Bale ’lɛburu plaan wo ta koo,

²⁰ fintrannu valé ’wolé kyɛbɔnénu lé wa kɛlɛ kyan tegele nya, ’té é a lé wa bi, wo dɔnama lé wa fe, a yɛrama bɛ, wo koo,

²¹ flɛrinu valé kyɛbɔnu valé kyɛ dirifɛnu lé wa kɛlɛ kyan tegele nya, wo koo,

²² sɛnnénu koo, kananu koo, ’yiminikananu koo, kyɛnyɛsifɛnu lé wa kɛlɛ kyan tegele nya koo, yee valé kɔn gi kyan duolinu lé wo ke fɛna sauun tinle valé fɛna sauun ’léé, wo koo, é ’bɛnu faa kɛlɛ.