2 Minwiinmunu lé Wezuofe Sɛbɛ 3 - Kazambale lé Sebe Sauunu 1979

Balebangikɔn dɔle

¹ Salomɔn kun Gakelebale lé kɔn dɔle ma Morija gɔ nwiin Jérusalɛm, fɛ lé Gakelebale ana gɔɔn Salomɔn ti David lɛ, fɛ lé David ana ma’lɛrɛ Jébusi mi Oonan lé ’sa sunwona, ana.

² A plale mi nwiin lɛɛ ziɛnzan nya, alé moné fiézan lé yi fiézan nya, é kun a dɔle ma.

³ Kazambale lé kɔn lé Salomɔn a dɔna bɛ, é a nini kini ’ko zo: a sangi a mɛtrɛ yɔ do wɔlɛ vu, yé a ’wuola a mɛtrɛ vu, fɛdanfɛ kyɛn yɛrama.

⁴ A lɛɛ gi lé é a kɛlɛ kɔn ’lɛzia, é a mɛtrɛ vu, ’té yee valé kɔn ’wuola bɔ ékema, yé a wuo nwale kɛlɛ mɛtrɛ yɔ yaa. Salomɔn a gi sɔɔla kyan tegele nya.

⁵ É kɔn blɛn gi kɛlɛ siprɛyili nya, yé é a ma faa sɔɔla kyan tegele nya, yé wo yɔyili fotonu valé gɔgɔbale fotonu dɔ a ma.

⁶ É kɔn ma sɔɔla gɔlɛ wezannu nya a nyɛɛfɛ nya; kyan ’ko, é si Paavaim.

⁷ É kɔn ma sɔɔla kyan nya; yilifeenu koo, kɔn panu koo, a gurunu koo, a duolinu koo, woo lé, yé wo sérubɛn fotonu dɔ kɔngurunu ma.

⁸ É fɛna sauun tinle dɔ; a sangi kɛlɛ mɛtrɛ vu, bélé kɔn ’wuola zo, yé a ’wuola kɛlɛ mɛtrɛ vu. É a ma sɔɔla kyan tegele nya kyan talan wuru yaa,

⁹ yé kyan lé wo pɔnténu kɛlɛ a nya, éé kilo sian sikla yɔ fié wɔlɛ vu. Kɔn nwiin kɔnnénu é ziin, é wo ma sɔɔla kyan nya.

¹⁰ Fɛna sauun tinle na, wo sérubɛn fié foto nyaa, yé wo wo ma sɔɔla kyan nya.

¹¹ Sérubɛn bɛanu torole a mɛtrɛ vu. A vininzan bɛa do a mɛtrɛ fié é buu, yé éé manean kɔnguru ma; a bɛa koɛzan a mɛtrɛ fié é buu, yé éé manean sérubɛn fiézan bɛa ma.

¹² Sérubɛn fiézan bɛa do torole a mɛtrɛ fié é buu, yé éé manean kɔnguru ma, yé a bɛa koɛzan a mɛtrɛ fié é buu, yé éé manean sérubɛn vininzan bɛa ma.

¹³ Sérubɛn ’konu bɛanu, dé wa é soile, wo torole kɛlɛ mɛtrɛ vu. Wa é dɔle loru wo gane ta, ’té wo yara a kɔn‐in zia.

¹⁴ É kɔnmikɛlɛsɔ kɛlɛ lɛnsɔ zima nya, ’té a yuɛɛ a glayivayou koo, galunaa koo, sɔɔn koo, a nya, yé wo sérubɛnnu dɔ a ta pɛɛ gyɛle nya.

¹⁵ É kɔn wɛyili fié kɛlɛ kɔn ’lɛ. Wo torole kɛlɛ mɛtrɛ vu ta sɔrafié é buu, ’té kɔn wɛyilinu ’wuo a mɛtrɛ fié é buu.

¹⁶ É gɔgɔbale kénénénu kɛlɛ bélé gɔgɔbale kénénénu lé é ke fɛna sauun tinle na, a zo, yé é wo pla wɛyilinu nwiin, yé é grénadéyili poro foto kɛlɛ yɔ soru yé é wo dun gɔgɔbale kénénénu ma.

¹⁷ É wɛyilinu dɔ Bale lé kɔn blɛn ’lɛ, a do a bɛyilazia yé a do a bɛbolazia. É bɛyilazan tɔ pa Jakɛn, yé é bɛbolazan tɔ pa Boaz.