2 Minwiinmunu lé Wezuofe Sɛbɛ 2 - Kazambale lé Sebe Sauunu 1979

Salomɔn Bale lé kɔn dɔfɛnu ma’lɛrɛ

¹ Salomɔn léé: ’Wo kɔn do dɔ Gakelebale zé nya, yé ’wo minwiinzan lé kɔn do dɔ ’ézé nya.

² Salomɔn kɔnésizannu baa yɔ do wɔlɛ vu ta soru si yé é gɔlɛ manyaa?-?zannu baa vu ta fié si, léé, ’wo gɔlɛnu ma nyaa gɔ nwiin, yé é nyanama tabinzannu si baa do wuru sɔraa.

³ Salomɔn munu nwunvɔ Tii munu nwiinzan blɛn Uram va, a fele a lɛ we gi léé: I sɛdrɛyilinu pa an ti David lɛ zia léé, ’é nyanaagikɔn dɔ a nya fɛan zo bɛ, ’i anzé kɛlɛ a zo ma.

⁴ Bé ye, maa a kɔn dɔna Gakelebale, anlé Bale tɔbɔle we ma. Maa dan a pa lɛ é yɛrama azé nya, yé maa dan lasikɔrɔ ginzan kyɛ ble lɛ a gi a ’lɛ. Yé Bale ’lɛburu é dan kɛlɛ lɛ ana bléyi faa ma. Yé bladi valé nyanadi koo, flinyinu koo, moné dɛrɛnu koo, Gakelebale kozé Bale lé fɛtinu koo, balebanwinu lé wa kyɛ blé, maa dan wo nɔ lɛ ana ’bɛ bléyinu va, Izraɛlnu lé bélidɔwe lé, é ’ka nyaan lo, a yɛrama.

⁵ Naa, kozé Bale blɛn mini balenu faa ta, amalé kɔn lé maa dan a dɔ lɛ bɛ, é a lé é kɛlɛ blɛɛn.

⁶ Naa, Bale ’ka sɔa la valé é zi lanu gi lo ’naan, mi kyɛn ɛ bɔalɛ yé é kɔn dɔ azé nyaa? Yé dé é ’ka lasikɔrɔ kyɛbléikɔn nya lo ’naan, maa a de ɛ nya yé an kɔn dɔa azé nyaa?

⁷ Amalé, mi lé éé blaboo kyan koo, gɔɔlifu koo, zéné koo, foliɛwɔlɛ koo, galunaa sɔ valé sɔ sɔɔn valé glayivayou sɔ koo, wolé nyanama pale gi, ’té éé yili nyaan é zua bɛ, ’i ’bɛzan pa an lɛ zia léé, ’é nyanama pa blabozannu lé an ti David wo si a va, ’té wo ke an va Juda tɛrɛ la valé Jérusalɛm, wo va.

⁸ É ziin, sɛdrɛyilinu koo, siprɛyilinu koo, sandalayilinu koo, ’i wo si Liban tɛrɛ la yé ’i wo pa an lɛ zia. Naa, maa a gi dɔɔ léé, i wuomunu éé Liban yilinu vɔa wo zua. Yé bé ye, an wuomunu wo dan pa lɛ izé va.

⁹ ’Wo yili ma’lɛrɛ an lɛ di, naa, kɔn lé maa dan a dɔ lɛ bɛ, é dan kɛlɛ lɛ blɛn, yé munu a ze vɔ.

¹⁰ I wuozannu lé wo dan yilinu vɔ lɛ, ’té wa bɔié bɛ, maa dan fɛblele nɔ lɛ wo lɛ ’ko zo: buruwɔlɛ vlekyɛɛ baa yɔ soru koo, sɔnmlén vlekyɛɛ baa yɔ soru koo, dɔrɔ ’bali baa fié koo, nyɔnɔ ’bali baa fié koo, a nya.

¹¹ Tii munu nwiinzan blɛn Uram a zi pa lɛtrɛ nya yé é a pa zia Salomɔn lɛ. É lé a lɛ léé: Gakelebale lé munu sɔ é lɛ, amalé é i dɔ wo nwiinzan nya.

¹² Yé é a gyɛ é ziin léé: Gakelebale, Izraɛl lé Bale lé é la valé tɛrɛ kɛlɛ, ’wa drɔɔ vo ma; négɔné lé é we dɔɔ, ’té a ’wuo ke a ta, ’té a gi kini, é a nɔ minwiinzan blɛn David lɛ, yé é dan kɔn dɔ lɛ Gakelebale zé nya, yé é dan fuakɔn dɔ lɛ ézé nya.

¹³ Bɛwemalé maa blabozan, gikinizan Uram‐Abi pa i lɛ zia.

¹⁴ A bu a Dan le nya, yé a ti a Tii mi nya. Kyan koo, zéné valé foliɛwɔlɛ koo, gɔlɛ koo, yili koo, galunaa sɔ valé glayivayou sɔ koo, lɛnsɔ valé sɔ sɔɔn koo, yili nyaale gɔnɔ faa valé fɛ nɔnɔminu lé walé nyanama bɛ pa a lee koo, é wo nyanama dɔɔ. É dan nyanama pa lɛ ilé blabozannu valé anzan i ti David lé blabozannu va.

¹⁵ Sin, anzan, buruwɔlɛ koo, sɔnmlén koo, nyɔnɔ valé dɔrɔ koo, fɛnu lé bé fe léé, ’é dan wo nɔ lɛ, ’i wo pa i wuozannu lɛ zia.

¹⁶ Yé ko, ko dan Liban yilinu vɔ lɛ, i mawe ke wo gi fɛan zo, a yɛrama. Ko dan wo polu dɔ lɛ ékema yé ko wo pa i lɛ zia wɛyi ta fɔɔ yé wo bɔ Jafo, a zuo yé i go wo nya Jérusalɛm.

¹⁷ Bɛn bɛ gi munu faa lé wo ke Izraɛl tɛrɛ la, Salomɔn wo nɔnɔ, fɛan zo lé a ti David a kɛlɛ, a zo. Wo ’léé kɛlɛ mi baa yɔ yaa wɔlɛ vu ta suiɛdo, é ta lé mi wuru sɔraa.

¹⁸ É wo va mi baa yɔ do wɔlɛ vu ta soru si kɔnésizannu nya, yé é wo va mi baa yɔ fié si gɔlɛnyaazannu nya gɔ nwiin, yé é wo va mi baa do wuru sɔraa si wo va dɔle nyanamapazannu zuo valé wo ma kyɛ dɔle we ma.