1 Timoté 6 - Kazambale lé Sebe Sauunu 1979

¹ Munu faa lé wo ke luubale gi, é a lé ’wo ’wozannu ye munu lé woo wo lɛdɔama, wo nya, té munu é Kazambale tɔ valé alé wepaale sɛrɛ lo we ma.

² Yé wo lé wozannu ke Krétiɛnnu nya, té wo yuɛ é kini ’wozannu nya, wo kɛlɛle wo bwenu nya we ma lo. Munu lé wo ke wolé nyanama pana bɛ, wa Krétiɛnnu nya; wa wo sɔlɛzannu nya; bɛwemalé é a lé ’wo wolé nyanama pa é zima.

Kozé bɔle

³ ’I we ’konu paa munu gi yé ’i we pla wo lɛ. Dé mian éé we bɛ paan munu gi, yé Kaazan Jézu Krist dére zinnu valé wepaale lé é ke Kazambale lé zi yɛrama, é ’ka wo ta tawoo lo,

⁴ ’té é a é fanle boblɛn nya; ’té é ’ka we do kpen dɔɔa lo; we planu laale valé zavɔdérenu fele ɛ ke a ’wuo gi gwe nya. Maawole koo, zɔdɔle koo, mi tɔ sɛrɛwenu koo, ’wuo gi nyané bɔrɔle mi ma koo, yee ɛ ’wuo gi lé woo sié;

⁵ yé munu lé wo ke é vɔnle we ’male gi, ’té wo ke é vurule webozen ma, ’té é a wo gi léé, wo dan tɔnɔ ye lɛ wolé tawole Kazambale lé zi ta we ma, ’bɛnu zé zavɔlenu lé wo ’ka nyaan lo, woo sié yee ’wuo duo gi é ziin.

⁶ Webozen nya, tawole Kazambale lé zi ta tɔnɔ a blɛn, ’té dé fɛ lé ke i lee, dé ’bɛ izé bɔa.

⁷ Naa, kaa ’ka bɔra lɛ tɛrɛ la fɛ do kpen nya kaa lee lo, yé é a wéiin léé, kaa ’ka bɔa gole lɛ fɛ do kpen nya kaa lee lo.

⁸ Bɛwemalé, dé fɛblele valé sɔ a kaa lee, ’té ’bɛ kaazé bɔ.

⁹ Munu lé wo bli éé bɔa fuablele ma, wo dan wo gi dan lɛ, yé wo dan vɔ lɛ mikunsan ’léé, yé wo bli é dan bɔ lɛ ’wuosɛrɛwe kiɛre kiɛre valé misɛrɛ?-?we kiɛre kiɛre lé woo mi sɛra tata ’té woo goo mi nya mi sanlenu gona, wo ma.

¹⁰ Naa, bli bɔle gɔɔli ma a wenyanénu gɔnɔ faa suni do nya, yé mi kenu si Kazambale lé we gi bli bɔle gɔɔli ma we ma, yé wo ’wobozen vɔ nyané plɛplɛnu gi.

Guli zin lé wa daan blipale nya

¹¹ Naa, bii Kazambale lé mi, ’i vlan buru we ’konu lee, yé we tegele koo, Kazambale lé zi sɔlɛle koo, blipale koo, sɔlɛle koo, bli tiéé koo, bli drɔɔ koo, ’i kwa kuli léé, wo vɔ i bli gi.

¹² ’I guli dan, guli zin lé wa daan blipale nya, a nya; vole é yuɛma lé a glɛ ’ka lo, ’bé kun kli. A yele we ma lé Bale i laa, ’té i dɔ a ta munu kiɛre yuɛ va bɛ, yee lé.

¹³ Kazambale lé éé flinle no fɛ faa lɛ, é valé Jézu Krist lé é blipale tɔbɔwe kɛlɛ Pɔns Pilat yara, ko a wo fiénu ’lɛ ’ko; maa lé i lɛ léé,

¹⁴ ’i tawo Bale lé bélidɔwe ta tegele, té a do kpen é vuru i ma lo, yé ’i kɛlɛ a gi wéiin fɔɔ yé Kaazan Jézu Krist é da.

¹⁵ Dé a bléyi bɔ, Kazambale é dan Jézu gɔɔn lɛ munu yuɛ va. Kazambale lé é ke minwiinzan blɛn do kpen nya, ’té a gi éé nanaan, ’té é ke minwiinzannu é nwiinzan nya, mizannu ézan nya,

¹⁶ ’té vole é yuɛma lé a glɛ ’ka lo é a yee do kpen ɛ lee bɛ, ’té é ke é nyanale san lé mi do kpen ’ka bɔa biéle lɛ a sɔnɔ lo, a gi bɛ, ’té mi do kpen ’ka tan é yuɛ vɔ lɛ a ta lo yé wo ’ka bɔa yuɛ vɔle lɛ a ta boenwo lo bɛ, yee ɛ dan Jézu gɔɔn lɛ. Tɔbɔle valé plɛplɛ a azé nya lɛɛfaama, a glɛ ’ka lo. Amɛɛn.

¹⁷ Munu lé tɛrɛ ’ko la fɛnu ke wo lee, ’i we pla wo lɛ léé, té wo kɛlɛ boblɛnzannu nya lo, yé fuafɛnu lé woo giéan, té wo bli é vo ’bɛnu lɛ lo, naa, Kazambale lé éé fɛnu faa no kaa lɛ di, ’té kaa gi éé nanaan ’bɛnu lé we ma bɛ, wo bli ’é vo ’bɛ ɛ lɛ.

¹⁸ ’I we pla wo lɛ léé, ’wo wezin kɛlɛ; wo kɛlɛwe zinnu ’é kɛlɛ kiɛre kiɛre; ’wo kɛlɛ drɔɔkɛlɛzannu valé bɛ ma wolowolozannu nya.

¹⁹ ’Bɛ zo we kɛlɛle nya lé wo dan fɛwezannu zun dɔ lɛ tɛlɛ tɛlama zé nya é ta nya drɔɔ é pla, yé ’bɛ ma lé wo dan bélile bozen ye lɛ.

²⁰ Bé maa? Timoté, we lé wa bɛ pa i lee, ’bé pa i ’wuo gi é zima. ’I paa tɛrɛla boawe fele ma, é valé dabli wedɔɔle lé zavɔlenu ma.

²¹ Mi kenu wobo kɛlɛ yee dabli wedɔɔzannu nya, naa, ’bɛ zo lé wo Kazambale lé we buu. Kazambale ’é ka drɔɔ vo ma.