1 Timoté 5 - Kazambale lé Sebe Sauunu 1979

Munu ma we kɛlɛle

¹ Té i mi segele saanna gɔɔn é lɛ dére plɛplɛ nya lo, naa, ’i we pla a lɛ bélé i ti zo; ’i pɛniɛnu zé we pla bélé i bwenu zo;

² ’i we pla le segelenu lɛ bélé i bunu zo; lomu lé wo yara ’ka tan kini lɛ lo, ’i we pla wo lɛ bélé i burunu zo, yé ’i vo sauun.

³ Gyɛzaralomu lé wolé mi ’ka lo, ’i wo lɛdɔma ma.

⁴ Dé gyɛzarale lé nénu a, ɛɛ, dé a nénénu a, é a lé wo bɔ wezin kɛlɛle lɛ wobozen lé kɔngimunu lɛ, yé fɛan zo lé wo ti valé wo bu wo pa ’té wa kiéné, é a lé wo yee duo kɛlɛ wo ti valé wo bu lɛ é ziin; naa, we ’ko sɔ Kazambale lɛ.

⁵ Le lé é ke gyɛzarale nya, ’té alé mi ’ka lo, ’té é ke é vole é do, a bli a Kazambale lɛ, yé éé yara paan fɛnu ma laale valé bazorole ta tu valé é kinile ma.

⁶ Naa, gyɛzarale lé éé ébozen lé sɔlɛwe kɛla, é ke aan wo é yuɛma bɛ, é a é gale.

⁷ ’I dɔ dére ’konu ta, lomu ’ko kɛlɛle tegele we ma.

⁸ Dé mian é ’ka é gɔnɔlamunu mawe kɛla lo, dé é ’ka élé kɔngimunu zé kɛla yé é mini mi bɛnu zé ta lo, ’té éé sɔn vɔa Bale lé we ma, ’té alé we naané mini yolémunu zé ta.

⁹ Dé gyɛzaralean lɛɛ yɔ yaa ’ka tan bɔ lɛ lo, té wa tɔ gyɛ lo; naa, dé é ’ka tan bo fié si lɛ lo,

¹⁰ dé wa ma we zin fé alé wezin kɛlɛle ma, dé éé nénu paan, dé é a bɛn sɔlɛzan nya, dé éé Kazambale lé munu gane ma folié, dé éé bɔa nyanéblemunu va, dé éé wezin gɔnɔ faa kɛla, ’wo ’bɛzan tɔ gyɛ ma.

¹¹ Naa, gyɛzaralomu lé wo yara ’ka tan kini lɛ lo, té i wo tɔ gyɛ lo. Dé wobozen lé sɔlɛwe wo si Krist zuo, é dan sɔ lɛ wo lɛ léé, wo bo si,

¹² yé wo dan si lɛ Kazambale lé we lé é sɔ wo lɛ é vinin bɛ, a zuo, ’té wo we dɔ wobo nwiin.

¹³ Yé é ziin, dé wa é pla tɔɔn, ’té wo kun gole ma kɔnnu gi nuu. ’Bɛ ta loru, woo we faa ’wuo kunwo kwɛkwɛ ’té wa sɔɔlaan, ’té woo goo vɔle nya mi bɛnu lé we gi, yé we lé é ’ka lé wa fe lo, ’té wa fé.

¹⁴ Bɛwemalé é sɔ an lɛ léé, gyɛzaralomu lé wo yara ’ka tan kini lɛ lo, ’wo bo si, ’wo né yaa, ’wo ’wolé kɔngiwenu yuɛ gi bo, té wo dɔna nɔ mi nyanézan yo lɛ yé é mi tɔ sɛrɛ lo.

¹⁵ Naa, gyɛzaralomu kenu zi saan é kwakwa yé wo go Satan zuo.

¹⁶ Krétiɛn lé, gyɛzaralomu ke alé kɔn gi, ’é bɔ wo va ma. Té ’bɛ é kɛlɛ kɔné nya léglizi nwiin lo, yé gyɛzaralomu lé wolé mi ’ka lo, léglizi ’é bɔ ’bɛnu va ma.

¹⁷ Léglizigimi segelenu lé woo we yuɛ gi boo é zima, é a lé ka wo lɛdɔma, wo bɛn ’é vo ka gi ma; wo lé woo Bale dére fé yé woo we paan munu gi wo zua, é a lé ’bɛnu lɛdɔmale é mini wo faa ta.

¹⁸ Kazambale lé sɛbɛ léé: Dé diri a ’sa sunwona, té wa lɔlu lɛ tan lo, yé é lé é ziin léé: Nyanamapazan banwo yara lé.

¹⁹ Dé mi da léglizigimi segle tɔ pla lɛ i lɛ, dé anayezannu ’ka kɛlɛ lɛ mi fié valé mi yaa nya lo, té bé nyi si léé, é a fe i lɛ lo.

²⁰ Munu lé woo wenyané kɛla, ’i wo saanna gɔɔn wo lɛ mi faa yuɛ va, kana zénle mi pɔnénu gi we ma.

²¹ Kazambale koo, Jézu Krist koo, lanjenu lé Bale wo si a va koo, ko a wo faa ’lɛ; maa lé i lɛ léé, ’i tawo dére ’ko ta; té i we do kpen ble é voro va lo; té i we do kpen kɛlɛ lele valé béé ma lo.

²² Té i bɛnu pla mi do ta é kele a dɔle mi zilɛzan nya we gi lo, dé alé wenyanénu é da dɔ i nwiin. Biibozen, ’i vo sauun.

²³ Té i vo ’yi saa minina lo, naa, i bɔn‐in koo, i ma lé é ’ka bɔa lo koo, wolé we ma lé ’i dɔrɔ sɛnésɛné mini.

²⁴ Mi kenu lé wenyané a é bɔrale wolé weblebléyi ’lɛ, naa, mi bɛnu zé é dan bɔra lɛ é voéla.

²⁵ A zo duo lé nyanama zin a é bɔrale, yé wo lé wo ’ka tan é bɔrale lo, wo ’ka bɔa vole lɛ é yɔɔle lo.