1 Timoté 4 - Kazambale lé Sebe Sauunu 1979

Mi kiɛre é dan diéra lɛ

¹ Naa, Kazambale Léli lé wéiin léé, bléyi voélanu nya mi kenu é dan si lɛ Kazambale lé we gi yé wo dan ’wo péli vɔ lɛ misaanyonu valé yonu lé wepaale va.

² Yo ’konu é dan nyanama pa lɛ munu lé woo viéwe paan munu gi, ’té woo wobo drɔan, wo nya. Wolé wevasibli a wo gi bélé wi lé wa pla kyɛ ta, a gale zo kwa?-?koroo.

³ Munu ’ko, wa yi gaan munu lee léé, té wo le si lo; yé fɛblelenu lé Kazambale a kɛlɛ léé, munu lé wo ke Bale lé we gi ’té wo webozen dɔɔ, ’wa ble bɔvɔle nya bɛ, wo fɛ ’konu blele yi gaan ’bɛnu lee.

^4-5 Fɛ faa lé Kazambale a kɛlɛ, é a é zima, yé a gi a é bɔle Kazambale dére valé bazorole nya, amalé é ’ka lé wo sɔn vɔ fɛ do kpen ma lo, ’té dé wa blé bɔvɔle nya.

Jézu Krist va nyanama pazan zin

⁶ ’I we ’konu nagɔɔn bwenu lɛ, yé i dan kɛlɛ lɛ Jézu Krist va nyanamapazan zin nya, yé i dan a gɔɔn lɛ léé, Bale lé we gi dérenu valé wepaale zin lé i goo a zuo tegele bɛ, wa biibozen lé fɛblele nya.

⁷ Naa, fiinnu lé leblanénu a vɔa, ’té woo Kazambale lé we gi sɛra bɛ, ’i wo yi ga.

⁸ Kazambale lé zi ta tawole ’é i kun ma. Mi kɔlɛ lé we kɛlɛle yé é a kun, a tɔnɔ a sɛ, naa, Kazambale lé zi ta tawole ɛ tɔnɔ ke yifaama; a ma blivolɛdére lé ke léé, éé mi bélié tɛrɛ la ’ko, yé gale zuo éé mi bélié é ziin.

⁹ Dére ’ko a dére bozen nya, yé é a blivolɛdére nya.

¹⁰ Kaa bli a Bale yuɛmale lé é ke mi faa siéwegizan nya, ’té é ke munu lé wo bli vo a lɛ, wo siéwegizan bozen nya bɛ, a lɛ; bɛwemalé ko nyanama paan ’té ko guli daan.

¹¹ Dé i a we paana munu gi, dére ’konu lé bé fe kiɛre.

¹² Té mi do kpen i ye kiéné i boroné we ma lo, naa, ’i kɛlɛ blipamunu lé wekɛlɛmazan nya dére koo, giébɛ koo, sɔlɛle koo, blipale koo, kɛlɛle sauun koo, wo gi.

¹³ Sɛbɛtafele koo, we plale mi lɛ koo, we paale mi gi koo, ’i yara pa wo kɛlɛle ta fɔɔ yé an da.

¹⁴ Blɛ lé Bale a kɛlɛ i lɛ léglizigimi segelenu bɛnu plale i ta valé balelawefele nya, té i yara si a ta lo.

¹⁵ ’I we ’konu kɛlɛ; ibo faa nɔ a kɛlɛle lɛ, yé munu faa a ye léé, i a gona i ’lɛ zia Bale lé we gi.

¹⁶ ’I yuɛ pa ibozen valé ilé we paale va; ’i yara pa we ’konu ta. Naa, dé i wo kɛlɛ i dan ibozen si lɛ we gi, yé wo lé woo i dére maan, i dan wo si lɛ we gi é ziin.