1 Timoté 3 - Kazambale lé Sebe Sauunu 1979

Léglizi tabinzannu lé we

¹ Dére ’ko a sɔbɛladére nya; dé mi bli bɔ léglizi tabinle ma, ’té we zin ma lé a bli bɔ.

² É a lé léglizi tabinzan é kɛlɛ mi wéiin nya, ’té a na a do kpen, yuɛgidozan nya, bokunzan nya, mi zin nya é giébɛ gi, bɛn sɔlɛzan nya, wepaamigizan zin nya.

³ Té é kɛlɛ nwɛminizan nya lo, té é kɛlɛ ’wiiéwelazan nya lo; ’é kɛlɛ bli zimazan nya; ’é kɛlɛ bli drɔɔzan nya; té é kɛlɛ gɔɔli sɔlɛzan nya lo.

⁴ É a lé é élé kɔngimunu lé wenu yuɛ gi bo é zima; té élé nénu yuɛ vɔ é zi lo, té é tavowe kɛlɛ wo va lo.

⁵ Naa, dé mi ’ka ébozen lé kɔngimunu lé we yuɛ gi boo é zua lo, éé kɛla kaa yé é Kazambale lé léglizi lé wenu yuɛ gi boo?

⁶ Té é kɛlɛ mi lé é bli nɔla é dɛrɛ, a nya lo, dé é da fan boblɛn nya yé ban lé wa dɔ yonufaatagɔné nwiin, dé wo da yee ban duo dɔ a nwiin.

⁷ É a lé flamunu a ma we zin fe, té é yaragyɛwe kɛlɛ yé é vɔ yonufaatagɔné lé sannu ’léé lo we gi.

Léglizi wuozannu lé we

⁸ Léglizi wuozannu é ziin, é a lé wo kɛlɛ mi tegelenu nya. ’Wo si dabliwenu koo, nwɛ minile baba koo, bli bɔle gɔɔli ma koo, wo ma baa;

⁹ naa, ’wo Bale lé we wɔlɛma kun wo bɛ fié nya, ’té wolé wevasibli gi a sauun.

¹⁰ ’Wo wo gi dan é vinin; dé wo ’ka gun ye lɛ wo ma lo, yé wo zi nɔ wo lɛ léé, wolé nyanama pa.

¹¹ A zo duo lé é a lé wo nanu é ziin, ’wo kɛlɛ tegele; té wo kɛlɛ wenaané fezannu nya munu ma lo, naa, ’wo kɛlɛ wobo kun?-?zannu valé yarapawelazannu nya we faa gi.

¹² É a lé léglizi wuozannu é kɛlɛ na do kpen zan nya, ’té woo ’wolé nénu valé ’wolé kɔngimunu lé wenu yuɛ gi boo é zima.

¹³ Léglizi wuozannu lé woo dɔa wolé nyanama ’ko ta tegele, wo dan kɛlɛ lɛ lɛamamunu nya, ’té a se a wo lɛ léé, wo blivole Jézu lɛ lé we fe ’woboma.

Kazambale bɔzi wɔlɛmawe a blɛn

^14-15 An bli a a lɛ léé, an dan go lɛ i va é kele, naa, dé an mɔn, é a lé Kazambale lé kɔngimunu lé we é kɛlɛ fɛan zo, é a lé i ’bɛ gi dɔɔ, amalé an sɛbɛ ’ko gyɛ i lɛ é nya do. Kazambale lé kɔn a Bale yuɛmale lé léglizi nya, yee lé ke webozen dɔgliglifɛ valé a dɔ?-?plɛplɛfɛ nya.

¹⁶ Kazambale bɔzi wɔlɛmawe a blɛn, webozen nya. Kazambale ébo nagɔɔn mi kɔlɛ gi, yé a Léli a tegele nagɔɔn, yé lanjenu a ye, yé munu alé we fe bɛnnu lɛ, yé munu bli vo a lɛ tɛrɛ la, yé wo goan la gi.