1 Timoté 2 - Kazambale lé Sebe Sauunu 1979

Bazorole

¹ Bɛwemalé an we plaan ka lɛ we bɛnu faa ’lɛ, ’ka fɛnu ma laa, ’ka bazoro, ’ka muun pa, ’ka Bale bɔ vɔ. ’Ka we ’konu kɛlɛ munu faa tɔ ma,

² minwiinzan blɛnnu koo, minwiinmunu koo, wo tɔ ma, ko nyanale duaa koboma we gi, ’té Kazambale lé zi éé sɔa ko lɛ, ’té ko we drɔle kɛla.

³ ’Bɛ ɛ ke é zima, ’bɛ ɛ ke é sɔke kaa Siéwegizan Bale yuɛ gi;

⁴ naa, é sɔ Bale lɛ léé, mi faa é si we gi, yé wo webozen dɔɔ.

⁵ Naa, Kazambale a do kpen, yé Kazambale valé munu pa ékemazan a é ziin do kpen, Jézu Krist lé é ke blami nya,

⁶ ’té ébozen nɔ mi faa tabozan nya bɛ, yee lé. Yee we lé wa gɔɔn alé we nya bléyi lé Bale a dɔ, a nya.

⁷ Aléwemalé Bale an kɛlɛ yee we fezan valé nwunvɔzan nya, blipale lé we valé webozen paale bɛn bɛnu gi we ma. Maa a webozen fena, maa ’ka viéwona lo.

⁸ Bɛwemalé é sɔ an lɛ léé, munu ’é bazoro fɛfaana, wo bɛ sauun nwale nya, ’té bliflile valé zavɔbli ’ka wo gi lo.

⁹ É sɔ an lɛ é ziin léé, lomu ’é sɔ zén wo ta é zima, yaragyɛle nya, té ’wo ’wo ma bɔra lo; té wo ’lɛrɛ nwin tanle koo, kyan koo, wɛɛwɔlɛnu koo, sɔvlɛzannu koo, wo nya lo;

¹⁰ naa, ’wo ’lɛrɛ kɛlɛwe zinnu nya, lomu lé wo léé, Kazambale lé zi sɔ ’wo lɛ, é a é zima wozé nya fɛan zo, a zo.

¹¹ É a lé lomu ’wo tɔné dɔ wepaamigizan dére lɛ ’wo tadɔle nya, plale mi wuo bozen nya.

¹² Maa ’ka zi no lomu lɛ léé, wo we paa gɔnénu gi yé wo pla wo nwiin lo, naa, ’wo vo é tadɔle.

¹³ Kazambale Adam kɛlɛ é vinin, a zuo yé é Eve kɛlɛ, azama.

¹⁴ Yé wo ’ka dabli kɛlɛ lɛ Adam lɛ lo; le lɛ lé wo dabli kɛlɛ, yé a pagi kɛlɛ bélidɔwe sɛrɛle nya,

¹⁵ naa, lomu é dan si lɛ we gi né yaale ma duowo, ’té dé wo yara pa blipale koo, sɔlɛle koo, kɛlɛle sauun koo, wo ta yaragyɛle nya.