1 Timoté 1 - Kazambale lé Sebe Sauunu 1979

Weale lé

^1-2 Bii Timoté lé i ke anbozen lé né nya Kazambale lé we gi, an we i va. Tibale valé Kaazan Jézu Krist ’wo zin kɛlɛ i lɛ ma, yé wo nyanai ’é zén i ta ma, yé ’wo i vo drɔɔ ma. Maa Pɔl ɛ ke sɛbɛ ’ko gyɛna i lɛ. Kaa Siéwegizan Bale valé Jézu Krist lé, ko bli ke a lɛ, wo dére ta lé an kɛlɛ Jézu Krist lé nwunvɔzan nya.

Té munu é we bɛ paa munu gi lo

³ Dé maa a gona bléyian va Masédɔane, maa lé i lɛ léé, ’i vo Éfɛz, mi kenu béli dɔle we ma léé, té wo we bɛnu paa munu gi lo;

⁴ té wobo pa fiinvɔle ma lo, té wobo pa ’wo tranu dɔgɔnɔ gɔɔnle lé é ’ka nyaan lo, ’té éé dan zavɔlenu nya bɛ, wo ma lo. Mi mawe lé Kazambale a bɛ pa ékema é kyɛn, we ’konu ’ka ’bɛ gɔɔn‐an mi lɛ lo; blipale nya lé mi éé ’bɛ gi maan.

⁵ Wean ma lé maa a fe, yee lé ke ’ko: é a lé sɔlɛle é kɛlɛ ka gi; sɔlɛle lé éé sié bli gibɔle koo, wevasibli zima koo, blipale bozen koo, wo va, yee lé.

⁶ Mi kenu yara si we ’konu ta, ’té woo ’wobo saan zavɔle planu nya.

⁷ É sɔ wo lɛ léé, ’wo kɛlɛ bélidɔwe dɔɔzannu nya, naa, dérenu lé wa fé, é valé we lé wa fé wo sɔbɛla nya bɛ, wo ’ka wo gi maan lo.

⁸ Kaa a gi dɔɔ léé, bélidɔwe a é zima, ’té dé mi a ye bélidɔwe nya tegele,

⁹ ’té dé mi a gi dɔɔ léé, wo ’ka a kɛlɛ lɛ mi tegele lé we ma lo, naa, wa kɛlɛ wenyanékɛlɛzannu lé we ma. Mi lɛrɛlɛrɛnu koo, mi lɛgamazannu koo, Kazambale lé zi ma wenyané fezannu koo, wenyanékɛlɛzannu koo, munu lé wo ’ka bazoroan lo koo, munu lé wo Kazambale lé we yé boawe nya koo, ti valé bu gyɛmunu koo, migyɛmunu koo,

¹⁰ pɛnpɛnnégyɛzannu koo, wizowe kɛlɛmunu koo, miyaawozannu koo, viéwozannu koo, munu lé woo bale ’nyɔɔn‐an vié nya koo, munu faa lé woo dɔa wepaale tegele ma koo, wo bélidɔwe kɛlɛ wo ɛ lé we ma.

¹¹ Yee wepaale tegele éé sié gi nana Bale lé Wenéné lé ke bélé fuasan zo yé wa bɛ pa an lee bɛ, a va.

Pɔl Kazambale bɔ vɔ

^12-13 Kaazan Jézu Krist lé é an dɔ plɛplɛ, maa a bɔ vɔa léé, é an ye yarapawelazan nya, yé maa lé an ke é vinin Bale sɔnɔzan koo, nyané pa mi tazan koo, ’wiiéwelazan koo, wo nya, é an kɛlɛ Bale va nyanama pazan nya. Naa, maa we ’konu kɛlɛ an tanyila, ’té an bli ’ka é pale lo, bɛwemalé é nyanai zén an ta.

¹⁴ Yé Kaazan élé zin kiɛre kɛlɛ an lɛ yé blipale valé sɔlɛle lé é ke Jézu Krist gi, é wo vɔ an bli gi blɛn.

¹⁵ Sɔbɛlawe lé é a lé mi faa a nyi si, yee lé ke ’ko: Jézu Krist da tɛrɛ la wenyanékɛlɛmunu sile we gi we ma, yé maa a wo va wenyanékɛlɛzan blɛɛn nya.

¹⁶ Naa, yee we ’ko ma lé Bale nyanai zén an ta, léé, Jézu Krist élé bli tiéé nagɔɔn an ta, léé, munu lé wo dan wo bli vo lɛ Jézu lɛ, ’wo vo é yuɛma lɛɛfaama a glɛ ’ka lo, yé ’an kɛlɛ wolé wekɛlɛmazan nya.

¹⁷ ’Mi lé é ke minwiinzan nya lɛɛfaama, ’té é ’ka gaan lilo, ’té wo ’ka a yé lo, ’té yee do kpen ɛ ke Kazambale nya, ’wa tɔ bɔ yé ’wo fua nɔ a lɛ lɛɛfaama, té a glɛ é dɔ lo. Amɛɛn.

¹⁸ Anlé né Timoté, maa we plaan i lɛ balelawe lé wa fe ilé we ma é kyɛn, a yɛrama; wo sele ’é dɔ i gi yé ’i guli zin dan ma.

¹⁹ I bli ’é vo é pale yé té ilé wevasibli é we dɔ i nwiin lo. Mi kenu ’ka wo tɔné dɔ lɛ wolé wevasibli lɛ lo, yé wobo vuru Kazambale lé we gi.

²⁰ Iméné valé Alézandre a wo va mi fié nya. Maa wo nɔ Satan lɛ, we paale wo gi we ma léé, té wo Bale sɔnɔ lo.