1 Samuɛl 9 - Kazambale lé Sebe Sauunu 1979

Samuɛl valé Saul kee

¹ Bɛnjamɛn mi do ana, wa laama Abiél be Kis; Abiél a Sérɔɔ be nya, Sérɔɔ a Békorat be nya, Békorat a Afiak be nya, Afiak a Bɛnjamɛn mi do be nya. Gɔné plɛplɛ valé nyanazan lé.

² A be do ana, wa laama Saul; é a mi boroné nɔnɔmi nya, é a é nɔnɔmi é mini Izraɛl lé nénu faa ta yé wo va mi torolenu éé bɔa a puo wuo.

³ Saul ti Kis lé sokofaledanu san; yé Kis lé é be Saul lɛ léé: ’I nwa, ’i wuozan do si yé ’i go sokofaledanu gini.

⁴ É gié Éfraim gɔ nwiin yé é Salisa tɛrɛ kini, yé é ’ka wo ye lɛ lo; wo Saalim tɛrɛ kini, ’té wo ’ka ’bɛna lo; wo gié Bɛnjamɛn tɛrɛ faa la, yé wo ’ka wo ye lɛ lo.

⁵ Wo bɔ Suf tɛrɛ la aan wo, Saul lé é wuozan lé ke a va, a lɛ lee: ’I da, ko diéra, dé an ti gi é da san sokofaledanu ma yé é kolé gi bɔrɔ pa.

⁶ A wuozan lé a lɛ léé: Bé ye, Bale lé mi do a fla ’ko ta, lɛamazan lé; we faa lé éé a fé é ’ka vuruan bɔle ma lo, amalé ’ko go mi, zi lé é a lé ko sia, dé é dan a gɔɔn lɛ ko lɛɛ?

⁷ Saul lé é wuozan lɛ léé: Dé ko go ana, mɛ fɛ lé ko dan a nɔ lɛ yee Bale lé mi ’ko lɛɛ? Naa, fɛ do kpen ’ka vo lɛ kolé bala gi lo, yé fɛ bɛ ’ka ko lee yé ko a nɔ Bale lé mi ’ko lɛ blɛ nya lo. Mɛ fɛ ɛ ke ko lee?

⁸ A wuozan léé: Bé ye, gɔɔlifu sikla ziɛnzan a an lee; maa dan ’bɛ nɔ lɛ Bale lé mi lɛ yé é dan kolé zi gɔɔn lɛ ko lɛ.

⁹ É vinin, Izraɛlnu va, dé mi go we laa lɛ Bale lee, é léé, ’i da, ’ko go fɛnayezan va. Naa, mi lé wa laama kyɔ balelayezan, é vinin wa laama fɛnayezan.

¹⁰ Saul lé é wuozan lɛ léé: Izé a néné; ’i da ’wo go. Yé wo go fla lé Bale lé mi ke ana, a ta.

¹¹ Wa gona loru fla zia bléyian va, wo kee blɛnnu lé wa gona ’yi tɔ lɛ, wo nya, yé wo lé wo lɛ léé: Fɛnayezan a ’koo?

¹² Wa zi pa wo lɛ léé: Iin, é a i ’lɛ miɛ, ’ka go fiéfié, naa, munu a saraka bona balebanna loru na, amalé é da kyɔ.

¹³ Dé ka bɔ fla, ka dan a ye lɛ faa yé é go balebanna loru fɛblele we gi; é a lé é saraka drɔɔ vo, amalé dé é ’ka tan da lɛ lo, munu ’ka dan fɛ ble lɛ lo; dé é a drɔɔ vo faa, ’bɛ zuo yé munu lé wo wo laa, wo dan fɛ ble lɛ. Amalé ’ka go, ka dan a ye lɛ laoɛ.

¹⁴ Yé wo go fla. Wo bɔ fla worona tɔɔn wo kee Samuɛl nya, ’té é bɔra, ’té é a gona balebanna loru na zia.

¹⁵ Naa, Saul dale ’lɛ yi do Gakelebale we fe Samuɛl lɛ yé é léé:

¹⁶ Tɛlɛ, yiri ’ko nya, maa dan Bɛnjamɛn mi do pa lɛ i lɛ zia, yé i dan nyɔnɔ zén lɛ a nwiin anlé munu Izraɛl nwiinzan nya. É dan anlé munu si lɛ Filisitinu lee; naa, anlé munu lé siaale bɔ an va, amalé an yuɛ vɔ wo ta.

¹⁷ Samuɛl Saul ye tɔɔn, Gakelebale lé a lɛ léé: Mi lé maa alé we fe i lɛ, yee lo; yee ɛ dan pla lɛ anlé munu nwiin.

¹⁸ Saul bié Samuɛl va flagɔrɔ ’léé, yé é léé: Ilé zanté, ’i fɛnayezan lé kɔn gɔɔn an lɛ.

¹⁹ Samuɛl a zi pa Saul lɛ léé: Maa ɛ ke fɛnayezan nya. ’I gié an ’lɛ balebanna loru na, yé ka dan fɛ ble lɛ an va kyɔ. Maa dan zi nɔ lɛ i lɛ tɛlɛ, yé we faa lé ke i bli gi, maa dan a fe lɛ i lɛ.

²⁰ Sokofaledanu lé wo san a yi yaa lo, té i wo gi bɔrɔ pa lo, naa, wo wo ye. Yé fɛ faa lé ke fɛwezan nya Izraɛl tɛrɛ la, wa tadɔ de ɛzé nyaa? Bii valé i ti lé kɔngimunu faa zé kaan loo?

²¹ Saul a zi pa léé: Bɛnjamɛn lé ke kiéné é mini Izraɛl bɛnnu faa ta, alé mi ’ka an nya loo? Yé an nyanamunu a kiéné Bɛnjamɛn gɔnɔ gi, ’naan, yé i ’bɛ zo we fe an lɛɛ?

²² Samuɛl Saul valé a wuozan si yé é wo wɔra kɔn gi yé é wo nyana munu lé é wo laa, wo ’lɛ. ’Bɛnu éé mi yɔ do wɔlɛ vu bɔa.

²³ Samuɛl we fe bɔdɔnezan lɛ yé é léé: Wi lé maa a nɔ i lɛ a fele nya léé, bé pla é yɛrama, ’i da a nya sin.

²⁴ Yé bɔdɔnezan wibɛ valé é vafɛnu si, yé é a dɔra Saul ma. Yé Samuɛl léé: Fɛ lé wa tadɔ izé nya, yee lé ke i ’lɛ bɛ. Bé ble, naa, bléyian va lé maa munu laa, maa a tadɔ izé nya. ’Bɛ zo lé Saul fɛ ble Samuɛl va yi ’ko nya.

Samuɛl nyɔnɔ zén Saul nwiin

²⁵ Wo si balebanna loru na yé wo go tɛrɛ zia fla, yé Samuɛl glewo Saul va kɔn gwa ta.

²⁶ ’Bɛ zuo wo nwa bladi tutu; tu kini tɔɔn Samuɛl Saul laa kɔn gwa ta yé é léé: ’I da yé maa zi nɔ i lɛ. Saul nwa yé wo fiénu bɔra, yee valé Samuɛl nya.

²⁷ Dé wo bɔ fla gini ma Samuɛl lé Saul lɛ léé: Bé fe i wuozan lɛ léé, ’é gié. Yé a wuozan gié. Samuɛl léé: ’I dɔ sin yé maa Bale dére fe i lɛ.