1 Samuɛl 8 - Kazambale lé Sebe Sauunu 1979

Izraɛlnu minwiinzan blɛn ma laa

¹ Dé Samuɛl kɛlɛ kwa, é é benu dɔ weblezannu nya Izraɛl tɛrɛ la.

² Wa be vininzan laama Joɛl, yé wa fiézan laama Abija; wa weblezannu nya Bɛɛ‐Sééba.

³ Samuɛl benu ’ka tawo lɛ wo ti gane pa gi lo; wo bli a blɛn, yé woo blɛfɛ sié yé wo ’ka we blé é boen ma lo.

⁴ Izraɛl lé mi segelenu faa zén ékeva yé wo da Samuɛl va Rama.

⁵ Wo lé a lɛ léé: Bé ye, bii kɛlɛ é kwa yé i benu ’ka tawona i gane pa gi lo; sin, ’i mi do dɔ ko nwiinzan nya kolé weblele we gi, bélé fɛan zo lé é ke bɛnnu faa va, a zo.

⁶ We lé wa fena léé, ’i mi do dɔ ’wo nwiinzan blɛn nya yé ’é ’wolé we ble, é ’ka sɔ lɛ Samuɛl lɛ lo, yé Samuɛl bazoro Gakelebale lɛ.

⁷ Gakelebale lé Samuɛl lɛ léé: We faa lé munu a fena i lɛ, ’i tɔné dɔ wo lɛ; naa, wo ’ka sɔn vɔna i ma lo, an ma lé wo ke sɔn vɔna, té ’an pla wo nwiin lo we ma.

⁸ Wa we kɛlɛna i vazia bélé fɛan zo lé woo we kɛla yifaama, a zo, é sia anlé wo sile Éjipiti tɛrɛ la ma, fɔɔ yi ’ko nya, wo an vo, yé wo bale bɛnu bɔ.

⁹ Amalé ’i tɔné dɔ wo lɛ; naa, ’i we pla wo lɛ yé mi lé é dan dɔ lɛ wo nwiin, é dan we kɛlɛ lɛ wo lɛ fɛan zo, bé gi fe wo lɛ.

¹⁰ Munu lé wo ke ’wo nwiinzan blɛn ma laana Samuɛl lee, Samuɛl Gakelebale dére faa fe wo lɛ.

¹¹ É léé: Mi lé é dan pla lɛ ka nwiin é dan we kɛlɛ lɛ ka lɛ ’ko zo: É dan ka benu si lɛ, yé é dan wo pla lɛ élé goronu gi valé élé wisootamunu va, wolé vlan burule alé goro ’lɛ we ma;

¹² é dan mi wuru soru palu valé mi yɔ fié wɔlɛ vu palu nwiinzannu kɛlɛ lɛ, yé é dan wo kɛlɛ lɛ élé féipazannu koo, élé ’sagyɛzannu koo, élé gulidanfɛnu kɛlɛzannu koo, élé goro gi fɛnu kɛlɛzannu koo, wo nya.

¹³ É dan ka lunu si lɛ yé é wo kɛlɛ lasikɔrɔ kɛlɛzannu koo, bɔdɔnezannu koo, buru kɛlɛzannu koo, wo nya.

¹⁴ Kalé féinu koo, kalé dɔrɔyilinu koo, kalé ɔliviyilinu koo, é dan wo zimazannu si lɛ a va, yé ’é a nɔ ’é wuomunu lɛ.

¹⁵ Fɛ lé ka vɔa koo, kalé dɔrɔporo koo, é dan a vuzan si lɛ yé ’é a nɔ ’é wuomunu lɛ.

¹⁶ Ka wuogɔnénu koo, ka wuolomu koo, kalé dirigɔné zimanu valé kalé sokofalenu koo, é dan wo si lɛ yé ’élé nyanama pa wo nya.

¹⁷ É dan kalé trubɛnu vuzan si lɛ yé kabozen é dan kɛlɛ lɛ alé luunu nya.

¹⁸ Ka nwiinzan blɛn lé ka si a va kazé nya bɛ, ka dan siaa lɛ a lee, naa, Gakelebale ’ka dan é tɔné dɔ lɛ ka lɛ lo.

¹⁹ Munu ’ka a nyi si lɛ léé, wo tɔné dɔ Samuɛl dére lɛ lo. Wo léé: Gba! Naa, ko a ko nwiinzan blɛn va kpɔ!

²⁰ Yé ko é ziin ko kɛlɛ bélé bɛnnu faa zo; ko nwiinzan blɛn é dan kolé we ble lɛ yé é dan tawo lɛ ko ’lɛ yé é dan kɛlɛ lɛ kolé guli zilɛzan nya.

²¹ Dé Samuɛl munu dére faa ’ma faa, é a zuo fe Gakelebale lɛ.

²² Gakelebale lé Samuɛl lɛ léé: ’I tɔné dɔ wo lɛ, ’i wo nwiinzan blɛn dɔ. Yé Samuɛl lé Izraɛl munu lɛ léé: ’Ka go kalé flanu ta.