1 Samuɛl 7 - Kazambale lé Sebe Sauunu 1979

¹ Kiijat‐Jéarim munu da yé wo Gakelebale lé kɛsu sia; wo go a nya Abinadab lé kɔn gi gɔ nwiin yé wo a be Éléazaa pa é yɛrama yuɛ pale Gakelebale lé kɛsu ta we gi.

Samuɛl kɛlɛ weblezan nya

² Yé kɛsu mɔn Kiijat‐Jéarim; lɛɛ yɔ do gié yé Izraɛl munu faa vo ’wo ma dunnu wona Gakelebale lɛ.

³ Samuɛl lé Izraɛl munu faa lɛ léé: Dé ka bli faa nya lé ka da Gakelebale va é ziin, ’ka bɛnnu lé balenu valé Asataténu si ka méléna, ’ka bli drɔ Gakelebale vazia tegele yé ’ka yee do kpen ɛ bɔ; yé é dan ka si lɛ Filisitinu lee.

⁴ Yé Izraɛl lé nénu Baalnu valé Asataténu si wo méléna yé wo Gakelebale do kpen ɛ bɔ.

⁵ Samuɛl léé: ’Ka Izraɛl faa zén ékeva Misipa yé maa dan bazoro lɛ Gakelebale lɛ kalé we ma. Yé wo zén ékeva Misipa.

⁶ Wo ’yi tɔ yé wa zana Gakelebale ’lɛ yé wo lɔrɔ sɔn yi ’ko nya a fele nya léé: Ko wenyané kɛlɛ Gakelebale ma. Samuɛl Izraɛl lé nénu lé wenu ble Misipa.

⁷ Filisitinu a ’ma léé, Izraɛl lé nénu zén ékeva Misipa, yé Filisiti mi segelenu nwa Izraɛl ma. Wo we ’ko ’ma aan wo Izraɛl lé nénu kana Filisitinu lee,

⁸ yé wo lé Samuɛl lɛ léé: Té i daan siaale ma Gakelebale, kolé Bale lɛ kolé we ma lo, alé ko sile Filisitinu lee we gi.

⁹ Samuɛl nyɔ ma ’blané si yé é a kyɛ ble Gakelebale lɛ é ta lé é kɔn‐an. É siaa Gakelebale lɛ Izraɛl lé we ma, yé Gakelebale a ’ma.

¹⁰ Samuɛl a wi kyɛ blena bléyian va, Filisitinu bié ’wiile Izraɛlnu ta we gi. Gakelebale élé zagele plɛplɛ ban Filisitinu ta yé é wo fwila. Izraɛlnu bɛ mini wo lɛ.

¹¹ Izraɛl munu si Misipa yé wo Filisitinu zuo bin yé wo go wo gyɛle nya fɔɔ yé wo bɔ Bɛt‐Kaa wuo.

¹² Samuɛl gɔlɛ do sia yé é a pla Misipa valé Saan méléna, yé é a tɔ pa Ébɛn‐Ézɛɛ, a fele nya léé: Gakelebale bɔ ko va fɔɔ ’ko.

¹³ ’Bɛ zo lé Filisitinu kɛlɛ fɛ pla nya yé wo ’ka da lɛ Izraɛl lé tɛrɛ la é dɛrɛ lo. Gakelebale bɛ vo é dɔrale Filisitinu ta Samuɛl lé tɛrɛla faa gi.

¹⁴ Flanu lé Filisitinu wo si Izraɛl lee turu, wo faa kɛlɛ Izraɛl zé nya é ziin, é sia Ékrɔn fɔɔ yé é bɔ Gat, ’wo valé ’wolé tɛrɛnu. Izraɛl wo si Filisitinu lee gla nya. ’Té we ’ka Izraɛlnu valé Amorénu méléna lo.

¹⁵ Samuɛl kɛlɛ weblezan nya Izraɛl tɛrɛ la alé tɛrɛla faa gi.

¹⁶ Lɛɛ do do gi, Bétɛl koo, Gilgal koo, Misipa koo, éé giéan Izraɛlnu lé weblele nya é bale nya.

¹⁷ ’Bɛ zuo é nɔla Rama, fɛana lé alé kɔn ke, ana; yé ’bɛna éé Izraɛlnu lé wenu blé, yé é Gakelebale banna kɛlɛ ’bɛna.