1 Samuɛl 6 - Kazambale lé Sebe Sauunu 1979

Wo da Bale lé kɛsu nya é pai

¹ Gakelebale lé kɛsu moné sɔrafié gyɛ Filisitinu lé tɛrɛ la.

² Yé Filisiti munu yobanzannu valé’monédɔmunu laa yé wo léé: Ko dan a kɛlɛ lɛ kaa Gakelebale lé kɛsu nyaa? É a lé ko kɛlɛ fɛan zo yé ko a pa zia alé fɛna, ’ka fe ko lɛ.

³ ’Monédɔmunu lé wo lɛ léé: Dé ka a Izraɛl lé Bale lé kɛsu pana zia, té ka a pa zia é pla lo. Naa, ’ka kalé wenyané ma saraka bo Bale lɛ, yé ka dan béli lɛ, yé wean ma lé é ’ka é bɛ nyané sié ka ta lo, ka dan a gi dɔɔ lɛ.

⁴ Filisitinu léé: Saraka kaa lé ko a bo a lɛɛ? Wa zi pa léé: Kyanflanbɔra gyɛ foto soru valé kyan’moné foto soru lé, Filisiti nwiinzannu ’léé yɛrama, naa, gyɛ nyané duo ɛ ke ka faa valé ka nwiinmunu ma.

⁵ ’Ka kyan gyɛ flanbɔragyɛ foto valé ’monénu lé ke tɛrɛ sɛrɛna, wo foto nya, yé ’ka Izraɛl lé Bale tɔ bɔ, ɛɛ, dé é dan é bɛ nyané si lɛ ka koo, kalé balenu koo, kalé tɛrɛ koo, wo taa?

⁶ Mɛmalé ka bli kɛlɛ plɛplɛ bélé fɛan zo lé Éjipitinu valé Faraɔn ’wo bli kɛlɛ plɛplɛ, a zoo? Dé Gakelebale ’é lɛdɔ wo gi faa wo ’ka daan lɛ Izraɛl lé nénu ma yé ’bɛnu go loo?

⁷ Sin, ’ka goro dɛrɛ kɛlɛ, yé dirida fié lé wolé né ke nyɔ ma, ’té wo ’ka tan bɔrɔmayiri vɔ lɛ wo bɔrɔ ma lo, ’ka wo si; ’ka wo dɔ goro ma yé ka da wolé nénu nya kɔn gi.

⁸ ’Ka Gakelebale lé kɛsu si yé ’ka a dɔra goro gi; kyanfɛnu lé ka dan wo nɔ lɛ Gakelebale lɛ bɛ, kalé wenyané ma saraka nya, ’ka wo pa gboné gi yé ’ka a dɔra kɛsu bɛ do la; ’bɛ zuo ka dan a pa lɛ zia yé é dan go lɛ.

⁹ ’Ka yuɛ vo a zuo; dé é gié élé tɛrɛ glɛ zi ta Bɛt‐Sémɛs vazia, ’té Gakelebale ɛ we tɔntɔn blɛn ’ko kɛlɛ ko lɛ; dé ’bɛ kaan lo, ko dan a gi dɔɔ lɛ léé, yeean é ko gyɛ lo, ’té we ’ko bɔ ko ma é pla.

¹⁰ Munu ’ko a kɛlɛ a zo. Dirida fié lé wolé né ke nyɔ ma, wo wo si yé wo wo dɔ goro ma yé wo kɔn lɛ tan wolé nénu ta.

¹¹ Wo Gakelebale lé kɛsu dɔra goro gi, é valé gboné lé kyan’monénu foto valé kyanflanbɔra gyɛ foto ke a gi, a nya.

¹² Diridanu Bɛt‐Sémɛs zi sia tegele; wo vo gona yee zi duo ta fɔɔ, ’té woo wé, yé wo ’ka nɔla lɛ bɛ do kpen ta lo. Filisitinu go wo zuo fɔɔ yé wo bɔ Bɛt‐Sémɛs glɛ la.

¹³ Bɛt‐Sémɛs munu a buruwɔlɛ gyɛna gɔ worona; wo yuɛ nwa yé wo kɛsu ye yé wo gi nana.

¹⁴ Goro bɔ Bɛt‐Sémɛs mi Jozué lé féi yé é dɔ ’bɛna. Gɔlɛ blɛn do ana mi. Wo goroyili fén gyɛ yé wo diridanu kyɛ ble Gakelebale lɛ, balebanwi lé wa kyɛ blé, a nya.

¹⁵ Gakelebale lé kɛsu koo, gboné lé ke a bɛ do la, ’té kyanfɛnu ke a gi bɛ, ’bɛ koo, Lévinu wo zun; yé wa faa dɔra gɔlɛ blɛn ta. Balebanwi lé wa kyɛ blé, é valé sarakanu, Bɛt‐Sémɛs munu wo bo Gakelebale lɛ yi ’ko la.

¹⁶ Filisitinu nwiinmunu soru ’bɛ ye aan wo, wo nɔla Ékrɔn a yi duo nya.

¹⁷ Kyanflanbɔra gyɛ foto lé Filisitinu a nɔ Gakelebale lɛ wenyané ma ban nya, wo lo: Azdɔd zé a do, Gaza zé a do, Azkalɔn zé a do, Gat zé a do, Ékrɔn zé a do.

¹⁸ Kyan’moné fotonu ana é ziin Filisitinu lé flanu faa lé wo ke é plale ’wo nwiinmunu soru wuo, wo ’léé yɛrama; flagɔrɔ plɛplɛzannu valé flanénu lé wo zi gɔrɔ ’ka lo, wo ’léé yɛrama. Gɔlɛ blɛn lé, wo Gakelebale lé kɛsu dɔra a ta, é ana tan kyɔ Bɛt‐Sémɛs mi Jozué lé féi; yee ɛ ke we ’ko seledɔmigifɛ nya.

Bale lé Kɛsu go Kiijat‐Jéarim

¹⁹ Bɛt‐Sémɛs munu Gakelebale lé kɛsu gi gini yé Gakelebale mi gyɛ wo va mi yɔ yaa wɔlɛ vu. Gakelebale wo gyɛ gyɛ nyané nya amalé munu bli kyɛ dɔ é baba.

²⁰ Bɛt‐Sémɛs munu léé: De ɛ bɔa dɔle lɛ Gakelebale, Bale sauun ’ko ’lɛɛ? Yé dé kɛsu si ko va é a lé é go de ɛ vaa?

²¹ Wo munu nwunvɔ Kiijat‐Jéarim munu va a fele wo lɛ we gi léé: Filisitinu da Gakelebale lé kɛsu nya; ’ka da, ’ka a sia yé ’ka go a nya ka va.