1 Samuɛl 5 - Kazambale lé Sebe Sauunu 1979

Bale lé kɛsu a Filisitinu lee

¹ Filisitinu Bale lé kɛsu si Éban‐Ézɛɛ yé wo go a nya Azdɔd.

² Wolé Bale lé kɛsu siale zuo wo go a nya Dagɔn lé kɔn gi yé wa dɔra Dagɔn bɛ do la.

³ ’Bɛ é tu kini Azdɔd munu nwa bladi tutu yé wo Dagɔn ye é diale é yara tɛrɛ va, Gakelebale lé kɛsu ’lɛ. Wo Dagɔn sia yé wa dɔ é dɔna é ziin.

⁴ ’Bɛ é tu kini é ziin wo nwa bladi tutu yé wo Dagɔn ye é diale é yara tɛrɛ va Gakelebale lé kɛsu ’lɛ; Dagɔn ’wuo valé a bɛnu yéli kɔnpa ta, yé a bolu saa ɛ vo.

⁵ ’Bɛ lé we ma lé, fɔɔ yi ’ko nya Dagɔn banmunu valé munu faa lé woo wɔraan Dagɔn lé kɔn gi Azdɔd wo ’ka ’wo gane dɔraan kɔnpa ta lo.

⁶ Gakelebale bɛ nyané dɔra Azdɔd munu ta yé é wo gyɛ gyɛ nyané nya; é wo gyɛ flanbɔragyɛ nya Azdɔd valé é zi tɛrɛ faa la.

⁷ Wa ye aan wo ’bɛ zo, Azdɔd munu léé: Izraɛl lé Bale bɛ nyané a é dɔrale ko valé kolé bale Dagɔn ta amalé alé kɛsu ’ka dan vo lɛ ko va é dɛrɛ lo.

⁸ Wo munu nwunvɔ Filisitinu lé mi blɛnnu faa laana yé wo zén ékeva yé wo léé: Ko dan kɛlɛ lɛ kaa Izraɛl lé Bale lé kɛsu nyaa? Mi blɛnnu a zi pa léé: ’Wo go Izraɛl lé Bale lé kɛsu nya Gat ma. Yé wo go ’bɛna Izraɛl lé Bale lé kɛsu nya.

⁹ Naa, wo go a nya ’bɛna aan wo, Gakelebale é bɛ nyané dɔra fla ’ko lamunu ta, yé di kini wo gi; é flamunu gyɛ flanbɔragyɛ nya, nénu valé mi segelenu nya.

¹⁰ Yé wo Bale lé kɛsu pa zia Ékrɔn. Bale lé kɛsu bɔra Ékrɔn tɔɔn, Ékrɔn munu siaa léé: Wo da Izraɛl lé Bale lé kɛsu nya ko va, ko valé kolé munu gyɛle we gi.

¹¹ Wo munu pa zia Filisitinu lé mi blɛnnu faa laana yé wo zén ékeva yé wo léé: ’Ka Izraɛl lé Bale lé kɛsu pa zia; ’é go é pa gi ma; té ’é ko valé kolé munu gyɛ lo ma. Flamunu faa gi nyɛ blɛn kini; Bale bɛ nyané a wo ta plɛplɛ.

¹² Munu lé wo ’ka ga lɛ lo, flanbɔragyɛ vɔ wo ma yé flamunu siaalenu bɔ fɔɔ la gi.