1 Samuɛl 31 - Kazambale lé Sebe Sauunu 1979

Saul valé é benu gale

¹ Filisitinu da guli dan lɛ Izraɛlnu va yé Izraɛlnu vlan buru wo lee yé wo galenu vo é zanale Gilboa gɔ ma.

² Filisitinu Saul valé é benu zuo bin yé Saul benu Jonatan koo, Abinadab koo, Malkisua koo, wo wo gyɛ.

³ Guli Saul gyɛ yé sa vuli munu a gyɛ yé é tuo blɛn.

⁴ Yé Saul lé élé gulidanfɛnu kɔné sizan lɛ léé: ’Ilé gwɔun si é kɔlɛ gi yé ’i an fɔn a nya, dé ganedɔlomunu ’ko é da maa fɔn yé wo we nana an ma. Kana zén alé gulidanfɛnu kɔnésizan gi yé é ’ka a nyi si lɛ lo. Yé Saul élé gwɔun si yé ébo vɔ a ’léé.

⁵ Alé gulidanfɛnu kɔnésizan Saul ye aan wo é gale, ébo vɔ élé gwɔun ’léé yé wo fiénu ga ékeva.

⁶ ’Bɛ zo lé Saul valé é be yaanu koo, élé gulidanfɛnu kɔnésizan koo, élé munu faa koo, wo faa zamaga wo bléyi do kpen va, yi ’ko nya.

⁷ Izraɛl munu lé wo ke gɔ worona san koɛ la, é valé Juudɛn gɔ koɛ la, wa ye aan wo léé, Izraɛl munu vlan buru yé Saul valé é benu ga, wo fwi ’wolé flanu ta yé wo vlan buru. Yé Filisitinu da nyana lɛ ana.

⁸ ’Bɛ é tu kini, Filisitinu da gamunu tafɛnu si lɛ yé wo Saul valé é be yaanu ye é diale Gilboa gɔ ma.

⁹ Wo Saul ’wuo kini yé wo alé gulidanfɛnu si. ’Bɛ zuo wo we néné ’ko fe wolé miyilinu lé kɔnnu gi, é valé munu faa lɛ fɛfaana Filisitinu lé tɛrɛ la.

¹⁰ Wo Saul lé gulidanfɛnu pla Asataténu lé kɔn gi yé wo a gale pa kɔn guru ma Bɛt‐San.

¹¹ We lé Filisitinu a kɛlɛ Saul lɛ, Galaad tɛrɛ la Jabɛs munu a ’ma aan wo,

¹² nyanazannu faa nwa yé wo tu kini tawole nya yé wo Saul valé é benu galenu si Bɛt‐San lé kɔn guru ma. Wo da Jabɛs yé wo wo kyɛ ble ’bɛna;

¹³ wo wo wɔlɛnu si yé wo wo pa Tamarik yili wuo Jabɛs, yé wo lɔrɔ sɔn yi sɔrafié.