1 Samuɛl 30 - Kazambale lé Sebe Sauunu 1979

Davidnu guli dan Amalɛknu va

^1-2 A yi yaazan nya, dé David valé élé munu bɔ Siklag, ’té Amalɛknu da guli dan lɛ yirinwana bɛyilazia munu valé Siklag va. Lomu koo, gɔnénu faa lé ke ana koo, nunukénénénu valé mi segelenu koo, wo wo si luu nya yé wo Siklag guru zana a gi yé wa kyɛ ble. Wo ’ka mi do kpen gyɛ lɛ lo, naa, wo wo faa si yé wo go.

³ David valé élé munu bɔra fla, yé bé ye, ’té fla kyɛ a é blele; yé wo nanu koo, wo benu koo, wo lunu koo, wo wo si luu nya.

⁴ Yé David valé é vamunu siaa wu nya plɛplɛ yé wo wuvɔ fɔɔ wuvɔ plɛplɛ nyaa wo lee.

⁵ David na fiénu, Jizréɛl le Akinoam valé Nabal na Kaamɛl le Abigail, wo wo kun.

⁶ Munu faa do do bli kyɛ dɔ wo benu valé wo lunu lé we ma, yé wa fena léé, wo dan gɔlɛ vuli lɛ David va, amalé David bli kyɛ dɔ é baba. Naa, David élé plɛplɛ yé Gakelebale, élé Bale gi.

⁷ É lé Balebanzan Asimélɛk be Abiataa lɛ léé: ’I da éfɔdi nya an lɛ. Abiataa da a nya a lɛ.

⁸ Yé David we laa Gakelebale lee léé: ’An go sunyanu palu ’ko zuoo? Maa dan a dɔ lɛ wo maa? Gakelebale lé a lɛ léé: ’I go wo zuo, naa, i dan a dɔ lɛ wo ma, yé i dan munu si lɛ wo lee.

⁹ Yé David zi sia, yee valé é vami wuru yaa nya. Wo bɔ Bézɔɔ yuu ma; ’bɛna lé wo mi kenu vo zi zuo.

¹⁰ David vo wo zuo binna mi wuru fié nya; mi wuru do wɔlɛ gi nyaa wo ma yé wo ’ka yuu kini lɛ lo, yé wo dɔ bɛ.

¹¹ Wo Éjipiti gɔné do ye féi yé wo da a nya David va. Wo buru nɔ a lɛ yé wo ’yi minile nɔ a lɛ,

¹² yé wo bɔrɔyili poro gale povɔle do nɔ a lɛ, yé wo dɔrɔporo gale povɔle fié nɔ a lɛ. Alé fɛblele zuo a fuu dɔ a ta é ziin, naa, yi yaa, é yiéyi koo, é béli koo, é ’ka fɛ ble lɛ lo yé é ’ka ’yi mini lɛ lo.

¹³ David lé a lɛ léé: Mi kyɛn lé mi lé i nyaa? I si kyɛɛn? É a zi pa léé: Maa a Éjipiti gɔné nya yé an nyanama paan Amalɛk mi do va yé a yi yaa lo anzan sɔn vɔ an ma anlé gyɛ kɛlɛle we ma.

¹⁴ Ko wɔra Kéréti munu lé yirinwana bɛyilazia Juda tɛrɛ la, ’bɛ valé Kalɛb lé yirinwana bɛyilazia tɛrɛ la, yé ko Siklag kyɛ ble.

¹⁵ David lé a lɛ léé: I bɔalɛ léé, i go an nya mi palu ’ko vaa? Yé é a zi pa léé: ’I bale ’nyɔɔn léé, ’é ’ka dan an gyɛ lɛ lo, yé i ’ka dan an nɔ lɛ anzan lɛ lo, yé an dan go lɛ i nya mi palu ’konu zuo.

¹⁶ Yé é kɛlɛ zigɔɔnzan nya David lɛ. Yé bé ye, Amalɛk munu a é nwɛɛnle fɛfaana, ’té woo fɛ blé, ’té woo fɛ minian, ’té woo nɛnɛ boo, zarafɛ lé wa si Filisitinu valé Juda lé tɛrɛ la, alé gi nanale we ma.

¹⁷ David wo gyɛle sia tu kini bléyi va fɔɔ ’bɛ é tu kini yiri vɔle nya, yé wo va mi do kpen ’ka si lɛ we gi lo, ’té dé é ’ka pɛniɛ wuru fié lé wo vɔ nyɔgɔménu punu yé wo vlan buru, wo nya lo.

¹⁸ Fɛ faa lé Amalɛknu a si, David a ye é ziin, yé é na fiénu ye é ziin.

¹⁹ Wo ’ka vuru lɛ mi do kpen ma lo, dé é a né nyaoo, dé é a mi segele nyaoo, dé é a mi be nyaoo, dé é a mi lu nyaoo, dé é a zarafɛ nyaoo, dé é a fɛofɛan wa si, a nyaoo, David a faa si é ziin.

²⁰ Wi kiéné valé wi blɛnnu, Davidi a faa si é ziin, yé alé munu lé wo ke gona trubɛ ’ko nya, wa fé léé: David lé gulizarafɛnu looo lo.

²¹ Mi wuru do lé wo wɔlɛi nyaa tawole nya David zuo, ’té wo wo vo Bézɔɔ yuu ma bɛ, David bɔ wo ma. Wo da David valé é vamunu si lɛ zia. David bɔ wo va yé é we wo va.

²² Mi plenu valé gi nyanézannu lé wo go David zuo, wo faa kun wefele ma léé: Munu ’ko ’ka go lɛ ko zuo lo, amalé gulizarafɛnu lé ko a si bɛ, ko ’ka dan a do kpen nɔ lɛ wo lɛ lo, ’té dé é ’ka wo nanu valé wolé nénu nya lo; ’wo wo si yé ’wo goan.

²³ Naa, David léé: An bwenu, fɛ lé Gakelebale a nɔ ko lɛ, té ka kɛlɛ ’bɛ zo a nya lo; naa, é ko tabin, yé mi palu lé wo da ko ma, é wo pa ko lee.

²⁴ Mi kyɛn ɛ dan é tɔné dɔ lɛ ka lɛ we ’ko gii? Munu lé wo go guli dan lɛ, é valé munu lé wo nyana kɔné zi, wo faa zé é dan kɛlɛ lɛ do; wo dan a guli lɛ wo faa ma.

²⁵ Yé é kɛlɛ a zo ’bɛ yi nya, yé ’bɛ zuo é kɛlɛ a zo é ziin yé we ’ko kɛlɛ bélidɔwe valé gɔnɔlawe nya Izraɛlnu va fɔɔ kyɔ yi nya.

²⁶ David da Siklag aan wo é gulizarafɛ ke nɔ é béénu, Juda lé mi segelenu lɛ a fele nya wo lɛ léé: Kazé blɛ lé wa si Gakelebale nyanézannu lee gulizarafɛ nya, yee lo.

²⁷ Yé é yee we duo kɛlɛ Bétɛl munu koo, yirinwana bɛyilazia Ramɔt munu koo, Jatii munu koo,

²⁸ Aroɛɛ munu koo, Sifimɔt munu koo, Esitémoa munu koo,

²⁹ Rakal munu koo, Jérasméɛl munu lé flanu koo, Kéni munu lé flanu koo,

³⁰ Ooma munu koo, Kɔɔ‐Asan munu koo, Atak munu koo,

³¹ Ébrɔn munu koo, fɛana lé David valé élé munu gié koo, wo lɛ.