1 Samuɛl 3 - Kazambale lé Sebe Sauunu 1979

Gakelebale bɔra Samuɛl va

¹ Samuɛl kiéné a Gakelebale lé nyanama pana Éli va. ’Bɛ bléyi va ’té Gakelebale ’ka we fé mi lɛ fiéfié lo, ’té woo yuɛzi we yé do do.

² Bléyi ’ko duo nya Éli a é yiale é yiana. A yuɛ fuu ’ka é ta é dɛrɛ lo yé é ’ka fɛna yé é dɛrɛ lo.

³ Wo ’ka tan Bale lé kyɛbɔ diri lɛ lo, ’té Samuɛl a é yiale Gakelebale lé kɔn gi, fɛana lé Bale lé kɛsu ke, ana.

⁴ Yé Gakelebale Samuɛl laa.

⁵ É a zi pa léé: Maa lo. Yé é go Éli va vlan nya yé é léé: An da, naa, i an laa. Éli léé: Maa ’ka i laa lɛ lo; ’i go yia. Yé é go yia lɛ.

⁶ Gakelebale Samuɛl laa é ziin. Samuɛl nwa yé é go Éli va yé é léé: An da, naa, i an laa. Éli léé: An be, maa ’ka i laa lɛ lo. ’I go yia.

⁷ Samuɛl ’ka Gakelebale dɔɔ lɛ tan lo, yé é ’ka tan Gakelebale dére ma kunna ye lɛ lo.

⁸ Gakelebale Samuɛl laa é ziin a gɔnɔ yaazan nya. Yé Samuɛl nwa yé é go Éli va yé é léé: An da, naa, i an laa. Éli a gi dɔɔ sin léé, Gakelebale ɛ ke né laana yé é lé Samuɛl lɛ léé:

⁹ ’I go, ’i yia; yé dé wo i laa, bé fe léé, Gakelebale, bé fe, naa, i wuozan tɔné a i lɛ. Yé Samuɛl go yia lɛ é yiana.

¹⁰ Gakelebale da a va yé é a laa bélé é vinin zo: Samuɛl! Samuɛl! Yé Samuɛl a zi pa léé: Bé fe, naa, i wuozan tɔné a i lɛ.

¹¹ Yé Gakelebale lé Samuɛl lɛ léé: Bé ye, maa dan we do kɛlɛ lɛ Izraɛl, yé dé miomian é a ’ma, a tɔné gi é dan we lɛ.

¹² Yi ’ko nya we faa lé maa a fe Éli lé kɔngimunu ma, maa dan a lɛ sɔɔ lɛ; maa dan a péli sia lɛ yé maa dan a ’wuo pla lɛ.

¹³ Maa a fe a lɛ léé, maa dan an lɛdɔ lɛ alé munu gi lɛɛfaama, a glɛ ’ka lo, wenyané lé a benu a kɛlɛ, ’té wo ’wobo vɔn a nya bɛ, é a gi dɔɔ yé é ’ka we pla lɛ wo lɛ lo, a we ma.

¹⁴ Bɛwemalé maa bale pa Éli lé kɔn ’léé munu ma, léé, wo ’ka dan Éli lé kɔngimunu lé wenyané fwi lɛ monomono lo, dé saraka bole léé, dé Bale blan léé, wo nya lo.

¹⁵ Samuɛl vo é yiale fɔɔ bladi, a zuo é Gakelebale lé kɔn lɛnu so. Samuɛl kana yuɛziwe gi fele ma Éli lɛ.

¹⁶ Naa, Éli Samuɛl laa yé é léé: An be Samuɛl, yé é léé: Maa lo.

¹⁷ Yé Éli léé: Mɛ we lé Gakelebale a fe i lɛɛ? té i we do kpen yɔɔ an ma lo. We faa lé é a fe i lɛ, dé bé ke yɔɔ an ma, Gakelebale ’é we kɛlɛ i lɛ élé plɛplɛ faa nya ma.

¹⁸ Samuɛl a zuo faa fe a lɛ, yé é ’ka we do kpen yɔɔ lɛ a ma lo. Yé Éli léé: Gakelebale lé; dé wean dɔ a gi wezin nya, ’é a kɛlɛ ma.

¹⁹ Samuɛl tin. Gakelebale a a va yé ’bɛ dére do kpen ’ka vo lɛ a yuɛ zuo lo.

²⁰ É sia Dan fɔɔ yé é bɔ Bɛɛ‐Sééba, Izraɛl faa a gi dɔɔ léé, Samuɛl a é dɔle Gakelebale lé balelayezan nya.

²¹ Gakelebale vo dana Silo; naa, Gakelebale ébo nagɔɔn Samuɛl lɛ Silo, Gakelebale dére nya.