1 Samuɛl 29 - Kazambale lé Sebe Sauunu 1979

Filisitinu sɔn vɔ David ma

¹ Filisitinu wolé sunyanu zén ékeva Afɛk yé Izraɛl nyana Jizréɛl ’yibɔna sɔnɔ.

² Filisitinu lé gulizilɛzannu zi sia é vinin mi yɔ soru soru valé mi wuru soru soru nya, yé David valé é vamunu tawo zi zuo Akis va.

³ Filisitinu lé gulizilɛzannu léé: Ébrunu ’ko a mɛ kɛlɛna ’koo? Yé Akis a zi pa Filisitinu lé gulizilɛzannu lɛ léé: Izraɛl nwiinzan Saul wuozan David kaan loo? É mɔn an va yé é sia a dayi ma ko va fɔɔ kyɔ, maa ’ka we do kpen ye lɛ a ma lo.

⁴ Naa, Filisitinu lé gulizilɛzannu bli fli Akis ma yé wo lé a lɛ léé: ’I mi ’ko pa zia léé, fɛ lé béna nɔ a lɛ, ’é go ana; té é go ko zuo guli danna lo, dé é da kɛlɛ ko nyanézan nya guli gi. Dé é ’ka kolé munu ’wuonu nya lo, mɛ fɛ nya lé mi ’ko valé ézan é dan nana lɛ é ziin?

⁵ Mi lé wo alé lɛrɛ vɔ nɛnɛ bole nya léé: Saul é mi wurunu gyɛ ézé nya Yé David é mi baanu gyɛ ézé nya, yeean ke David ’ko nya loo?

⁶ Akis David laa yé é lé a lɛ léé: Gakelebale a é yuɛma! Bii a mi drɔle nya yé é sia i dayi nya an va fɔɔ kyɔ, maa ’ka wenyané do kpen ye lɛ i gi lo, amalé dé ko go i nya, ’té ko dan sɔkɔn dɔna, é sɔ an lɛ; naa, i ’ka sɔ lɛ gulizilɛzannu lɛ lo.

⁷ Amalé ’i nɔla yé ’i go drɔɔ, té ko Filisitinu lé gulizilɛzannu ’namawe kɛlɛ lo we gi.

⁸ David lé Akis lɛ léé: Naa, mɛ lé maa kɛlɛɛ? É sia an dayi nya fɔɔ kyɔ, mɛ lé bé ye an ma yé i léé, té ’an go guli dan anzan minwiinzan nyanézannu va loo?

⁹ Akis a zi pa David lɛ léé: Maa gi dɔɔ, yé i a é sɔe an yuɛ gi bélé Bale lé lanje do zo; naa, Filisitinu lé gulizilɛzannu léé, té i go ’wo va guli danna lo.

¹⁰ Amalé ’i nwa bladi tutu, bii valé izan wuozannu lé wo da i va, wo nya; ’i nwa bladi tutu, dé fɛna a kinina tɔɔn, ’ka go.

¹¹ David valé élé munu nwa tu kini gunu nyanyané nya, zi siale tu kini bléyi va we gi yé wo da ’wo pa gi Filisitinu tɛrɛ la. Yé Filisitinu go loru Jizréɛl.