1 Samuɛl 28 - Kazambale lé Sebe Sauunu 1979

Saul we laa blagié le lee

¹ ’Bɛ bléyi va Filisitinu wolé sunyanu palu kɛlɛ guli danle Izraɛl va we gi. Akis lé David lɛ léé: Bé gi dɔɔ léé, i dan go lɛ an va guli dan lɛ, bii valé ilé munu nya.

² David a zi pa Akis lɛ léé: We lé i wuozan é dan a kɛlɛ lɛ, i dan a ye lɛ é zima. Yé Akis lé David lɛ léé: É ziin, i dan kɛlɛ lɛ an takuunzan nya yifaama.

³ Samuɛl ga turu; Izraɛl faa a wuvɔ yé wa pa élé fla, Rama. Saul blagiézannu valé ’monédɔzannu si turu élé tɛrɛ la.

⁴ Filisitinu zén ékeva yé wo da ’wolé sɔkɔnnu dɔ lɛ Sunɛm. Saul Izraɛl faa zén ékeva yé wo sɔkɔnnu dɔ Gilboa.

⁵ Saul Filisitinu lé sɔkɔndɔna ye aan wo, kana zén a gi yé a zuru va nyɛ blɛn kini.

⁶ Saul we laa Gakelebale lee; yé dé é a nyɛ fla nyaoo, dé é a urim nyaoo, dé é a balelayezannu nyaoo, Gakelebale ’ka a zi pa lɛ ’bɛ do nya lo.

⁷ Yé Saul lé é wuozannu lɛ léé: ’Ka blagié le gini an lɛ, yé an dan go lɛ we laa lɛ a lee. A wuomunu lé a lɛ léé: Bé ye, le do ana An‐Dɔɔ, blagié le lé.

⁸ Saul ’é ma nɔla yé é sɔ bɛnu zén é ta yé é go mi fié nya é va. Wo bɔ lezan lé kɔn ’léé é béli. Saul lé a lɛ léé: We lé é dan bɔ lɛ tɛlɛ tɛlama, bé fe an lɛ migale léli do laale nya, yé mi lé maa dan a fe lɛ i lɛ, bé laa.

⁹ Lezan lé a lɛ léé: Bé ye, we lé Saul a kɛlɛ yé é blagiézannu valé ’monédɔzannu si élé tɛrɛ la, bé gi dɔɔ. Mɛmalé i séli vɔ an lee anlé tɛrɛla nyaale we maa?

¹⁰ Saul Gakelebale ’nyɔɔn a lɛ a fele nya léé: Gakelebale a é yuɛma. Wenaané do kpen ’ka dan kɛlɛ lɛ i lɛ ’bɛ we ma lo.

¹¹ Lezan léé: I a a va léé, maa mi kyɛn laa? Yé é léé: ’I Samuɛl laa an lɛ.

¹² Lezan Samuɛl ye aan wo, é siaa plɛplɛ yé é lé Saul lɛ léé: Mɛmalé i dabli kɛlɛ an lɛɛ? Bii a Saul nya.

¹³ Minwiinzan lé a lɛ léé: Té i kana lo; naa, mɛ lé bé yee? Lezan lé Saul lɛ léé: Maa bale do ye sina tɛrɛ gi.

¹⁴ É lé a lɛ léé: É a kaa? Yé é léé: Gɔné segele do a nwana, yé sɔ a é zénle a ta. Saul a gi dɔɔ léé, Samuɛl lé, yé é yara tua tɛrɛ va yé é yia tɛrɛ va.

¹⁵ Samuɛl lé Saul lɛ léé: Mɛmalé i an ma kyɛ dɔ an laale nyaa? Saul a zi pa léé: Maa a we tɔntɔn blɛn gi; Filisitinu a guli danna an va yé Gakelebale si an va; dé é a balelayemunu nyaoo, dé é a nyɛ fla nyaoo, Gakelebale ’ka we zi paan an lɛ ’bɛ do nya lo. We lé é a lé maa kɛlɛ, maa i laa léé, bé fe an lɛ.

¹⁶ Samuɛl léé: Dé Gakelebale si i va yé é kɛlɛ i nyanézan nya ’naan, mɛmalé i we laa maa ɛ lee?

¹⁷ Fɛan zo lé maa fe i lɛ Gakelebale dére nya, é dan kɛlɛ lɛ i lɛ a zo; Gakelebale i kɛlɛle minwiinzan nya se si i lee yé é a nɔ mi bɛ lɛ, David lɛ.

¹⁸ I ’ka Gakelebale dére lɛdɔ lɛ a ma lo, yé ilé we ma lé Amalɛk ’ka Gakelebale lé bliflile tɔntɔn gi dɔɔ lɛ lo; wean ma lé Gakelebale we kɛlɛ i lɛ kyɔ ’ko zo, yee lé ke bɛ.

¹⁹ Yé Gakelebale é dan bii valé Izraɛl pa lɛ Filisitinu lee. Tɛlɛ, bii valé i benu é dan kɛlɛ lɛ an va, yé Gakelebale é dan Izraɛl pa lɛ Filisitinu lee.

²⁰ Samuɛl dére kana saa zén Saul gi, amalé é soi tɛrɛ va sɔnɔnɔɔ; ’bɛ ta loru, é ’ka fɛ do kpen ble lɛ yiéyi bléyi faa valé béli bléyi faa va lo, amalé a fuu ’ka a ta lo.

²¹ Lezan bié Saul sɔnɔ yé é a ye léé, kana zén a gi é baba yé é lé a lɛ léé: Bé ye, i wuole é tɔné dɔ i lɛ; an bli si an ga lɛ, dérenu lé bé fe an lɛ, an tɔné dɔle nya wo lɛ.

²² Sin, bii é ziin, ’i tɔné dɔ i wuole dére lɛ, yé ’i zi nɔ an lɛ léé, maa buru nɔ i lɛ, yé bé ble, i fuu dɔle i ta we ma yé i zi sia.

²³ Naa, é léé: Gba, maa ’ka fɛblena lo. A wuozannu valé lezan a tunu yé é a nyi si yé é nwa tɛrɛ va yé é nyana yialafɛ ta.

²⁴ Diriné buale a lezan lee yé é go a gyɛ lɛ é kele; yé é burupun si yé é a yɔɔ dɔ yé buru lé lévɛn ’ka a va lo, é a dɔne.

²⁵ É wo dɔra Saul valé é wuomunu ma. Yé wa ble. ’Bɛ zuo wo nwa yee béli duo nya, yé wo zi sia.