1 Samuɛl 27 - Kazambale lé Sebe Sauunu 1979

David nyana Siklag

¹ David lé é bli gi léé: Yi do nya maa dan zamaga wo lɛ Saul lee; dé an go an ta yɔɔ lɛ Filisitinu lé tɛrɛ la yé Saul é daan an ginile ma Izraɛl tɛrɛ faa la, ’bɛ fila vɔ; ’bɛ zo lé an dan so lɛ a lee.

² Yé David nwa, yee valé é vami wuru yaa nya, yé wo go Gat nwiinzan Maɔk be Akis va.

³ David valé élé munu vo Akis va Gat; wo faa lé munu a wo va do do, yé David nanu fié a é va, Jizréɛl le Akinoam valé Nabal na Kaamɛl le Abigail nya.

⁴ Wa fe Saul lɛ léé, David vɔ fli gi yé é go Gat yé é daan a ginile ma.

⁵ David lé Akis lɛ léé: Dé maa i yuɛi bɔ, ’i fɛna do nɔ an lɛ kalé fla do ta ma, yé maa nyana ana ma, naa, mɛmalé i wuozan éé nyanaan bii va minwiinzan lé flaa?

⁶ Yé ’bɛ yi duo nya Akis Siklag nɔ a lɛ. ’Bɛ lé we ma lé Siklag a Juda nwiinzannu lé fla nya fɔɔ kyɔ yi nya.

⁷ David nyana Filisitinu lé tɛrɛ la lɛɛ do moné ziɛn.

⁸ David valé élé munu nwa yé wo go guli wɛɛ lɛ Gésuunu koo, Giizinu koo, Amalɛknu koo, wo va; naa bɛnnu ’ko a turu é kyɛn tɛrɛ ’ko la, é sia Sure bɛ do la fɔɔ yé é bɔ Éjipiti tɛrɛ la.

⁹ David ’wii tɛrɛ ’ko ta; dé é a gɔné nyaoo, dé é a le nyaoo, é ’ka wo vo lɛ é yuɛma lo; ’blanu koo, dirinu koo, sokofalenu koo, nyɔgɔménu koo, sɔnu koo, é wo sia, ’bɛ zuo é po yéli yé é da Akis va.

¹⁰ Akis léé: I tawo kyɛn kyɔɔ? Yé David lé a lɛ léé: Juda yirinwana bɛyilazia koo, Jérasméɛlnu lé yirinwana bɛyilazia koo, Kéninu lé yirinwana bɛyilazia koo, wona lé.

¹¹ Dé é a gɔné nyaoo, dé é a le nyaoo, David ’ka a do vo lɛ é yuɛma yé é da wo nya Gat lo; é a é gi bɔrɔna léé, dé wo da ’é ma we fe léé, ’ko zo lé David a kɛlɛ. ’Bɛ zo lé éé we kɛla bléyi faa lé é ke é nyanale Filisitinu lé tɛrɛ la, a bléyi va.

¹² Akis bli vo David lɛ, yé é a fena léé: Ébo gin dɔ élé munu Izraɛl nyé gi, yé é dan kɛlɛ lɛ an wuozan nya lɛɛfaama.