1 Samuɛl 26 - Kazambale lé Sebe Sauunu 1979

David sɔn vɔ Saul gyɛle ma é ziin

¹ Zif munu go Saul va Gibéa yé wo léé: David ’ka é yɔɔle Aakila gɔ ma, bwi la zia loo?

² Saul nwa yé é go Zif bwi la Izraɛl mi kprakpranu baa do wuru soru nya é va, David ginile we gi Zif bwi la.

³ É sɔkɔn dɔ Aakila gɔ ma, bwi la zia, zi sɔnɔ. David a bwi gi; yé é a ye léé, Saul a dana é zuo bwi la

⁴ yé é mimavɔɔzannu pa zia yé é a ’ma wéiin léé, Saul bɔ.

⁵ Yé David nwa yé é go fɛana lé Saul sɔkɔn dɔ, ana, yé fɛana lé Saul valé élé sunyanwiinzan Nɛɛ bi Abinɛɛ yia, é ana ye. Saul yia sɔkɔn dɔna méléna yé munu sɔkɔn dɔ a zi.

⁶ David we fe Éti mi Asimélɛk valé Joab zuan Séruja be Abisai lɛ, yé é léé: É sɔ mi kyɛn lɛ léé, é go an va tɛrɛ zia Saul lé sɔkɔn dɔnaa? Yé Abisai léé: Maa lé, maa dan go lɛ i va.

⁷ David valé Abisai go é béli munu vazia. Yé bé ye, Saul a é yiale, ’té éé yi gya sɔkɔn dɔna méléna ’té alé din a é surule tɛrɛ gi a ’wuoplalafɛ sɔnɔ. Abinɛɛ valé munu a é yiale a zi.

⁸ Abisai lé David lɛ léé: Bale i nyanézan pa i lee kyɔ; ilé zanté, ’i zi nɔ an lɛ yé maa a gyɛ anlé din nya yé maa a blin tɛrɛ gi gɔnɔ do kpen, té an vɔ a ta fié lo.

⁹ Naa, David lé Abisai lɛ léé: Té bé gyɛ lo. Mi kyɛn ɛ bɔa é bɛ manele lɛ Gakelebale lé nyɔnɔzénnwiinzan ma yé ’bɛzan é vo é plaa?

¹⁰ Yé David léé: Gakelebale a é yuɛma. A gyɛle a Gakelebale do kpen ɛ lee, dé azé yi ɛ bɔ yé é gaoo, dé é go guli dan lɛ yé é zamaga wooo, ’té yee lé.

¹¹ Gakelebale tɔ nya, an bɛ nwale Gakelebale lé nyɔnɔzénnwiinzan ma, ’bɛ a an ma baa. Din lé ke a ’wuoplalafɛ sɔnɔ, é valé ’yi kuo, ’i ’bɛ sia ’wo go.

¹² Amalé din valé ’yikuo lé ke Saul lé ’wuoplalafɛ sɔnɔ, David a sia, yé wo go. Mi do kpen ’ka wo ye lɛ lo, yé wo ’ka we do kpen gi dɔɔ lɛ lo, yé mi do kpen ’ka vuo lɛ lo, naa, wo yi gyɛ ’té Gakelebale yigyɛle baa pa wo ta, azama.

¹³ David gié a san koɛ ta yé é dɔ gɔ nwiin, sɔkɔn dɔna ma baa.

¹⁴ Yé é siaa munu valé Nɛɛ be Abinɛɛ lɛ léé: Abinɛɛ, i ’ka wé loo? Abinɛɛ léé: Bii lé i siaan minwiinzan lɛ, de lé i nyaa?

¹⁵ Yé David lé Abinɛɛ lɛ léé: Gɔné ’ka i nya loo? I zoɛzan ana Izraɛlnu vaa? Mɛmalé i ’ka izan minwiinzan tabin lɛ loo? Naa, mi do da izan gyɛle we gi.

¹⁶ We lé bé kɛlɛ, é ’ka é zima lo. Gakelebale a é yuɛma. I ’ka izan Gakelebale lé nyɔnɔzénnwiinzan tabin lɛ lo, amalé i ga yara lé. ’Bé gini sin, minwiinzan lé din valé ’yikuo lé ke a ’wuoplalafɛ sɔnɔ bɛ, wa kyɛɛn?

¹⁷ Saul David dére dɔɔ yé é léé: An be David, i dére lé, webozen nyaa? Yé David a zi pa a lɛ léé: Oo minwiinzan, anzan, an dére lé.

¹⁸ Yé é lé é ziin léé: An mɛ we ɛ kɛlɛ turu anzan lɛ yé anzan é wuozan zuo bin‐éé? Mɛ we ɛ ke an nwiin?

¹⁹ Naa sin, minwiinzan, anzan, ’i tɔné dɔ i wuozan dére lɛ ma; dé Gakelebale ɛ i nwa an ma, ’é é banfɛ gin si ma; naa, dé we ’ko si munu ɛ va, ’wo bale pa wo ma Gakelebale yara ma; wa an binna kyɔ an sile Gakelebale lé zarafɛ va we ma yé wo léé, ’an go bale bɛnu bɔ, azama.

²⁰ Yiba! Té an nyɛ é zana tɛrɛ bɛ la Gakelebale yara ma baa lo! Izraɛl nwiinzan zi sia gɔa ginile we gi, woo doo ginian gɔnu nwiin fɛanzo, a zo.

²¹ Saul léé: An wenyané kɛlɛ. An be David, ’i da é ziin, naa, maa ’ka dan wenyané kɛlɛ lɛ i lɛ é dɛrɛ lo, anlé tɛrɛla a fɛwezan nya i yuɛ gi kyɔ, azama. An we kɛlɛ bélé gwegyɛzan zo, yé an saan blɛn.

²² David lé a lɛ léé: Minwiinzan lé din lo; ilé mi do ’é da a si ma.

²³ Gakelebale é dan mi faa do do banwo lɛ a kɛlɛwe tegele valé a yarapale we la yɛrama; naa, Gakelebale i pa kyɔ an lee, yé maa ’ka a va léé, an bɛ nwa Gakelebale lé nyɔnɔzénnwiinzan ma lo.

²⁴ Yé ilé tɛrɛla kɛlɛ an yuɛ gi blɛn kyɔ fɛan zo, a zo duo lé anlé tɛrɛla é dan kɛlɛ lɛ blɛn Gakelebale yuɛ gi, yé é dan an si lɛ nyanéblele faa gi.

²⁵ Saul lé David lɛ léé: An bi David, i drɔɔ ’é vo ma. We faa lé bé kɛlɛle péli sia, wo lɛ é dan sɔɔ lɛ i lɛ. David go, yé Saul nɔla ’é va.