1 Samuɛl 24 - Kazambale lé Sebe Sauunu 1979

David ’ka Saul gyɛ lɛ lo

¹ David si bɛ yé é go loru An‐Gédi lé fɛna nyané na, yé é nyana ana.

² Saul si Filisitinu zuo binna aan wo, wo da a fe lɛ a lɛ léé: David a An‐Gédi bwi la.

³ Saul Izraɛl faa va mi kprakpra si mi baa do wuru soru, yé wo go David valé élé munu gini lɛ fɔɔ yé wo bɔ balonu lé gɔlɛnu ta.

⁴ Wo bɔ ’blagɔrɔ lé é ke zi sɔnɔ, ana; yé é gɔmaguru ye ’bɛna yé é wɔra sɔ zénle é gane ta we gi. David valé élé munu a gɔmaguru wɔlɛ ma mi.

⁵ David lé munu lé é lɛ léé: Yian nya lé Gakelebale a fe i lɛ léé, ’é i nyanézan pa i lee, dé é sɔ i lɛ fɛan zo, bé kɛlɛ a lɛ, a yi lé kyɔ. David nwa yé é Saul lé sɔ lɔlu bɔi drɔɔɔ.

⁶ ’Bɛ zuo a gibɔrɔle we dɔ a nwiin Saul lé sɔ lɔlu bɔile we ma.

⁷ Yé é lé élé munu lɛ léé: Té Gakelebale a nyi si léé, maa an bɛ mané anzan, Gakelebale lé nyɔnɔzénnwiinzan ma lo; é a Gakelebale lé nyɔnɔzénnwiinzan nya, azama.

⁸ Dére ’konu nya lé David élé munu dɔ yé é wo baale Saul ta yi ga. ’Bɛ zuo Saul nwa yé é bɔra gɔmaguru gi, yé élé zi sia é ziin.

⁹ ’Bɛ zuo, David nwa yé é bɔra gɔmaguru gi. É kun siaale ma Saul zuo: Oo minwiinzan, anzan! Saul ’é zuo gini yé David ’é ’wuo tua yé ébo yia tɛrɛ va.

¹⁰ David lé Saul lɛ léé: Munu lé wa fe léé, David a kwa kulina wenyané kɛlɛle i lɛ we ma, mɛmalé i tɔné dɔa wo lɛɛ?

¹¹ Bé ye ibo yuɛ nya sin léé, Gakelebale i pa an lee kyɔ gɔmaguru gi. Wo an tunu léé, maa i gyɛ; naa, maa i vo yé maa léé, anzan a Gakelebale lé nyɔnɔzénnwiinzan nya, amalé an ’ka dan an bɛ mané lɛ a ma lo.

¹² An ti, bé nagini, ilé sɔ lɔlu lé ke an lee ’ko, bé ye. Maa ilé sɔ lɔlu bɔi, yé maa ’ka i gyɛ lɛ fɛan zo lo bɛ, bé ye yé bé gi dɔɔ léé, weple valé nwale mi ma ’ka an giébɛ nya lo, yé an ’ka wenyané kɛlɛ lɛ i lɛ lo. Yé bii, i an ma we ble, anlé tɛrɛla nyaale we ma.

¹³ Gakelebale é dan maa valé bii lé we ble lɛ, yé Gakelebale é dan anlé we lɛgi pa lɛ i ma; naa, an ’ka dan an bɛ nwa lɛ i ma lo.

¹⁴ Mi vininnu gɔné vɔ léé, wenaané éé sié mi naanénu va, yé an ’ka dan an bɛ nwa lɛ i ma lo.

¹⁵ Mi kyɛn ma lé Izraɛl minwiinzan zi siaa? Mi kyɛn lé bé zuo bin‐éé? Blén gale lé, gɔa lé.

¹⁶ Gakelebale é dan kɛlɛ lɛ kolé weblezan nya, é dan maa valé bii lé we ble lɛ; é dan an nagini lɛ yé é dan anlé we fe lɛ, yé é dan we tegele kɛlɛ lɛ an lɛ an sile i lee nya.

¹⁷ David nya dére ’konu fele nya Saul lɛ aan wo, Saul léé: An be David, i dére lé weboen nyaa? Yé Saul sia wu nya.

¹⁸ Yé é lé David lɛ léé: Bii a tegele é mini maa ta; naa, i we zin kɛlɛ an lɛ yé maa wenaané kɛlɛ i lɛ.

¹⁹ Bé nagɔɔn kyɔ léé, i wi zin kɛla an vazia, Gakelebale an pa i lee, yé i ’ka an gyɛ lɛ lo, azama.

²⁰ Dé mi valé é nyanézan kee ’naan, é a vo tawona drɔɔ élé zi taa? We lé bé kɛlɛ an lɛ kyɔ, Gakelebale ’é i banwo a we ma ma.

²¹ Sin, bé ye, maa a gi dɔɔ léé, i dan pla lɛ Izraɛl nwiin, yé plale Izraɛl nwiin se é dan kɛlɛ lɛ i lɛ.

²² ’I Gakelebale ’nyɔɔn an lɛ léé, i ’ka dan an kulu ga lɛ an pa gi lo, yé i ’ka dan an tɔ fwi lɛ an ti gɔnɔ la lo.

²³ David bale ’nyɔɔn Saul lɛ. ’Bɛ zuo Saul go élé kɔn ’léé, yé David valé élé munu go loru fɛna nyané na.