1 Samuɛl 23 - Kazambale lé Sebe Sauunu 1979

David Kéila munu si we gi

¹ Wo da a fe lɛ David lɛ léé: Bé ye, Filisitinu guli dan Kéila munu va, yé wo ’wii ’sa sunwonanu ta.

² David we laa Gakelebale lee léé: ’An go yé an guli dan Filisitinu ’konu vaa? Yé Gakelebale lé a lɛ léé: ’I go, i dan Filisitinu gyɛ lɛ yé i dan Kéila munu si lɛ we gi.

³ Naa, David lé munu lé é lɛ léé: Bé ye, ko kana Juda tɛrɛ la ’ko; dé ko go Kéila Filisitinu lé sunyanu ma nii?

⁴ David we laa Gakelebale lee é ziin. Gakelebale a zi pa a lɛ léé: ’I nwa, ’i go Kéila, naa, maa Filisitinu paan i lee.

⁵ Amalé David valé élé munu go Kéila yé wo guli dan Filisitinu va. Wo wolé trubɛnu si yé wolé guli bɛ mini wo lɛ é baba. ’Bɛ zo lé David Kéila munu si we gi.

⁶ Asimélɛk be Abiataa da vlan nya David va bléyian va, é da éfɔdi nya é lee.

⁷ Wa fe Saul lɛ léé, David da Kéila, yé é léé: É da sin fla lé a gɔrɔ ’léé duolinu valé é lɛtanyili ke, ana, amalé Bale a pa an lee.

⁸ Yé Saul gulidanmunu faa laa léé, ’wo go Kéila yé ’wo David valé élé munu mabɛn.

⁹ David Saul’wuogibɔrɔmawe naané dɔɔ, yé é lé Balebanzan Abiataa lɛ léé: ’I da éfɔdi nya.

¹⁰ Yé David léé: Gakelebale, Izraɛl lé Bale, i wuozan a ’ma léé, Saul a a va léé, ’é da Kéila yé é fla guru zana a gi anlé we ma.

¹¹ Kéila munu é dan an pa lɛ a lee? Saul é dan da lɛ, bɛan zo lé i wuozan a ’ma, a zoo? Gakelebale, Izraɛl lé Bale, ilé zanté, bé gɔɔn i wuozan lɛ. Yé Gakelebale léé: É dan da lɛ.

¹² David lé é ziin léé: Kéilamunu é dan maa valé anlé munu pa lɛ Saul lee? Yé Gakelebale a zi pa léé: Wo dan i pa lɛ a lee.

David go yɔɔ lɛ bwi gi Zif valé Maɔn

¹³ Yé David valé élé munu nwa, ’té woo mi wuru yaa bɔa; wo si Kéila yé wo go fɛana lé wo bɔalɛ léé wo go, ana. Saul a ’ma léé, David fwi Kéila yé é diéra.

¹⁴ David nyana bwi gi fɛna plɛplɛna, yé é mɔn gɔ lé ke Zif bwi la, a nwiin. Saul a a ginina yifaama, naa, Bale ’ka a pa lɛ ’bɛ lee lo.

¹⁵ David a ye aan wo léé, Saul zi sia alé tɛrɛla nyaale we gi, é vo Zif bwi gi pɔrɔ gi.

¹⁶ Saul be Jonatan nwa yé é go David va pɔrɔ gi. É ’bɛlé bli pale Bale gi taa gi gyɛ,

¹⁷ yé é lé ’bɛ lɛ léé: Té i kana we do kpen lee lo, naa, an ti Saul bɛ ’ka dan sɔ lɛ i nya lo. I dan pla lɛ Izraɛl nwiin, yé maa dan kɛlɛ lɛ i bɛgizan nya; an ti Saul a gi dɔɔ é zima é ziin.

¹⁸ Wo fiénu gi pa do Gakelebale yuɛ va, yé David vo pɔrɔ gi yé Jonatan go ’é va.

¹⁹ Zif munu go loru zia Saul va Gibéa yé wo léé: David ’ka é yɔɔle ko méléna, fɛna plɛplɛ na pɔrɔ gi Aakila gɔ lé ke bwi la yirinwana bɛyilazia, a nwiin loo?

²⁰ Amalé, minwiinzan, ’i da tɛrɛ zia, naa, é a ilé blibɔmawe nya; David pale minwiinzan lee é dan kɛlɛ lɛ kozé nya.

²¹ Saul léé: Ka nyanai zén an ta fɛan zo, Gakelebale ’é ka drɔɔ vo ma.

²² Kalé zanté, ’ka a ta we laa é ziin léé, dé a gane zun kyɛɛn? dé mi kyɛɛn ɛ a ye anaa? naa, wo lé an lɛ léé, a gi kini é baba.

²³ ’Ka nagini, yé fɛ faa lé éé yɔɔan ana, ’ka wona dɔɔ, ’bɛ zuo dé ka da an va é ziin, dé ka sɔbɛlawe fe an lɛ, maa dan go lɛ ka va. Dé é a tɛrɛ ’ko la, maa dan a gini lɛ Juda lé mi baanu méléna.

²⁴ Amalé wo nwa yé wo go Saul ’lɛ Zif. David valé élé munu a Maɔn bwi la, fɛna dégélé na, bwi la yirinwana bɛyilazia.

²⁵ Saul valé élé munu go David gini lɛ. Yé wa zuo fe David lɛ yé é zun gɔlɛgɔ nwiin yé é vo Maɔn bwi la. Saul a ’ma aan wo, é go David zuo Maɔn bwi la.

²⁶ Dé Saul a giéna gɔ san do la, ’té David valé élé munu éé giéan gɔ san koɛ la. David vlan buru fiéfié sole Saul lee we gi. Naa, Saul valé élé munu nyaa David valé élé munu zi lɛ sɔɔle nya wo kunle we gi tɔɔn,

²⁷ nwunvɔzan do da a fe lɛ Saul lɛ léé: ’I da fiéfié, naa, Filisitinu da kolé tɛrɛ la.

²⁸ Saul daan David zuo binle ma, yé é go guli dan lɛ Filisitinu va. Bɛwemalé wo fɛkona laama Séla‐Amaklékɔt.