1 Samuɛl 22 - Kazambale lé Sebe Sauunu 1979

Saul Balebanmunu gyɛ

¹ David si ’bɛna yé é yɔɔ Adulam lé gɔmaguru gi. A bwenu valé a ti lé kɔngimunu faa a ’ma yé wo da a va.

² Munu lé wo ke we tɔntɔn gi koo, wonu lé vɛɛn ke wo ma koo, wonu lé wo gi ’ka é nanale lo koo, wo zén ékeva a va yé é kinin wo zilɛzan nya. ’Bɛ zo lé munu zén a va, dé mi wuru fié léé?

³ David si ’bɛna yé é go Misipé, Moab tɛrɛ la. É lé Moab nwiinzan lɛ léé: Ilé zanté, ’i zi nɔ an ti valé an bu lɛ léé, wo nyana i va, fɔɔ yé we lé Bale é dan a kɛlɛ lɛ an lɛ yé maa a gi dɔɔ.

⁴ Yé é da wo nya Moab minwiinzan va, yé wo nyana a va bléyi faa lé David a wo nya kɔn plɛplɛ gi, a bléyi va.

⁵ Balelayezan Gad lé David lɛ léé: Té i vo kɔn plɛplɛ gi lo, ’i go, ’i go Juda tɛrɛ la. Yé David go yé é bɔ Érɛt pɔrɔ gi.

⁶ Saul a ’ma léé, wo David valé é vamunu ta we ’ma, ’té Saul a é nyanale Gibéa gɔpané nwiin, tamarik yili wuo. Alé din a a lee, yé a wuomunu faa a é dɔle a sɔnɔ.

⁷ Yé Saul lé é wuomunu lé wo ke é dɔle é sɔnɔ, wo lɛ léé: Bɛnjamɛnnu, ’ka tɔné dɔ an lɛ! Izai be é dan féinu valé dɔrɔféinu nɔ lɛ ka lɛɛ? É dan ka kɛlɛ lɛ mi wuru soru soru valé mi yɔ soru soru nwiinzannu nyaa?

⁸ Yé dé ’bɛ kaan lo, mɛmalé ka faa é péli vɔ an ma, yé mi do kpen ’ka an be valé Izai be gi pale do lé we fe lɛ an lɛ loo? Mɛmalé ka va mi do kpen nyanai ’ka zén lɛ an ta, yé ka a fe an lɛ léé, an be an wuozan nwa an ma, ’bɛ lé an ma weblele we gi, fɛan zo lé ’bɛ a kɛlɛna kyɔ a zo, loo?

⁹ Édom mi Doɛg ana Saul wuomunu va é ziin, yé ’bɛ lé a lɛ léé: Maa Izai be ye dana Nɔb, Akitub be Asimélɛk va.

¹⁰ Asimélɛk we laa Gakelebale lee a lɛ yé é fɛblele nɔ a lɛ yé é Filisiti mi Goliat lé gwɔun nɔ a lɛ.

¹¹ Minwiinzan munu pa zia Balebanzan Akitub be Asimélɛk laana; yee valé é ti lé munu faa lé wo ke Balebanzannu nya Nɔb, wo faa da minwiinzan va.

¹² Saul léé: Akitub be, ’i tɔné dɔ an lɛ. É léé: Anzan, maa lo.

¹³ Saul lé a lɛ léé: Mɛmalé bii valé Izai be é péli vɔ an maa? Mɛmalé i buru valé gwɔun nɔ a lɛ, yé i we laa Gakelebale lee a lɛ, a nwale an ma we gi, yé é an ma we ble fɛan zo lé é ke a kɛlɛna kyɔ, a zoo?

¹⁴ Asimélɛk lé minwiinzan lɛ léé: Tɔnégidrɔɔzan David, minwiinzan lu zana, ’té éé tawoo ilé bélidɔwe ta, yé wa lɛdɔma ilé kɔn gi, i wuozannu va mi kyɛn ɛ ke a bɔmazan nyaa?

¹⁵ Kyɔ lé an kun we laale ma Bale lee a lɛɛ? ’Bɛ a an ma baa! Té minwiinzan é we dɔ maa valé an ti lé mi do kpen nwiin lo, naa, dé we kiéné léoo, dé we blɛn léoo, i wuozan ’ka we do kpen dɔɔa a gi lo.

¹⁶ Minwiinzan léé: Asimélɛk, bii valé i ti lé munu é dan ga lɛ.

¹⁷ Yé minwiinzan lé vlanburumunu lé wo ke é dɔle é sɔnɔ, wo lɛ léé: ’Ka nɔla, ’ka Gakelebale banzannu gyɛ; naa, wo nana David va, wa gi dɔɔ é zima léé, é vɔ fli gi, yé wo ’ka a fe lɛ an lɛ lo. Naa, minwiinzan wuozannu ’ka a va léé, ’wo bɛ nwa Gakelebale banzannu gyɛle we gi lo.

¹⁸ Yé minwiinzan lé Doɛg lɛ léé: ’I nɔla, ’i Balebanzannu gyɛ. Yé Édom mi Doɛg nɔla yé é Balebanzannu gyɛ; munu lé wo lɛnsɔ éfɔdi zén wo ta, é wo gyɛ mi yɔ ziɛn wɔlɛ soru.

¹⁹ Yé Saul Balebanzannu lé fla Nɔb gyɛ gwɔun nya: gɔnénu koo, lomu koo, nénu koo, nyɔmazannu koo, dirinu koo, sokofalenu koo, ’blanu koo, wo wo faa gyɛ gwɔun nya.

²⁰ Akitub be Asimélɛk be do si we gi. A tɔ lé Abiataa. É vlan buru David va

²¹ yé é a fe ’bɛ lɛ léé, Saul Gakelebale banzannu gyɛ.

²² David lé Abiataa lɛ léé: Maa gi dɔɔ é zima ’bɛ yi la léé, dé Édom mi Doɛg ana bɛ, é dan we fe lɛ Saul lɛ. Anlé we ma lé i ti lé munu faa ga.

²³ ’I vo an va, té i kana we do kpen lee lo, naa, mian é ke kwa kulina léé, ’é anlé tɛrɛla nyaa, yee duo ɛ ke kwa kulina léé, ’é izé nyaa; dé i a an va, ’té i ta béli a é dɔle.