1 Samuɛl 21 - Kazambale lé Sebe Sauunu 1979

David vɔ fli gi

¹ David go Nɔb Balebanzan Asimélɛk va, yé ’bɛ vlan buru a sina zia yé ’bɛ lé a lɛ léé: Mɛmalé i a i doo? Mɛmalé mi do kpen ’ka i va loo?

² David a zi pa Balebanzan Asimélɛk lɛ léé: Minwiinzan an béli dɔ yé é lé an lɛ léé, we lé ’é i pa zia a gi, é valé we lé ’é i béli dɔ a nya, té mi do kpen a dɔɔ lo. Naa, maa fe ’élé munu lɛ léé, ’wo kee wo nya.

³ Sin, mɛ fɛ a i lee? ’I buru soru nɔ an lɛ, dé ’bɛ kaan lo, fɛ lé ke ana, bé nɔ an lɛ.

⁴ Balebanzan a zi pa David lɛ léé: Buru pla ’ka an lee lo, naa, buru lé wa nɔ Bale lɛ, é ana; ’té dé ilé munu ’ka tan go lɛ lomu va lo.

⁵ David a zi pa Balebanzan lɛ léé: É sia anlé zi sia bléyi va a yi yaa lo, ko ’ka tan go lɛ lomu va lo, yé anlé munu faa a tegele. Yé dé kolé tawogiwe a we pla nya, é ’ka kɛla tegele kyɔ a lɛsɔɔzan lé we ma loo?

⁶ Yé Balebanzan Bale lé buru nɔ a lɛ, naa, Bale ’lɛburu lé wa si Gakelebale ’lɛ, ’té wo buru kyɛzan pa a pa gi é nya do, ’bɛ saa ɛ ke ana, buru bɛ ’ka lo.

⁷ Yi ’ko duo nya, Saul wuomunu va mi do ana bɛ, Bale ɛ a mɔn ana; Édom mi do lé, wa laama Doɛg, é a Saul lé ’blatabinmunu nwiinzan nya.

⁸ David lé Asimélɛk lɛ léé: Din a i lee? taa, gwɔun ɛ ke anaa? Minwiinzan lé bélidɔwe a we tunule nya amalé an ’ka da lɛ gwɔun valé gulidanfɛnu nya an lee lo.

⁹ Balebanzan a zi pa léé: Filisiti mi Goliat lé bé gyɛ térébɛnt?-?yilinu lé gɔ worona, alé gwɔun lo; sɔ a é vurule a ma éfɔdi zuo; dé ’bɛ sɔ i lɛ, ’i ’bɛ si, naa, a bɛ ’ka ana ’ko lo. Yé David léé: A tɛn ma gwɔun ’ka lo; bé nɔ an lɛ.

¹⁰ David nwa, yé yee yi duo nya é vlan buru Saul lee baa. É bɔ Gat munu nwiinzan Akis va.

¹¹ Akis wuomunu lé é lɛ léé: Tɛrɛ mun la minwiinzan David an ke bɛ loo? Mi lé walé lɛrɛ vɔ, ’té woo nɛnɛ boo, Saul élé mi wurunu gyɛ Yé David élé mi baanu gyɛ, yeean ke bɛ loo?

¹² David é gi bɔrɔ dére ’konu ma aan wo, Gat minwiinzan Akis lee kana zén a gi é baba.

¹³ Ébo nagɔɔn gwegyɛzan nya wo lɛ, yé ébo kɛlɛ bélé ’wuosɛrɛzan zo wo yuɛ va; é vo fɛ giéna duoli ma vian vian, ’té a ’léli’yi éé yoroan a puomagun ma.

¹⁴ Akis lé é wuomunu lɛ léé: Ka ye é zima léé, mi ’ko ’wuo sɛrɛ; mɛmalé ka da a nya an lɛɛ?

¹⁵ Ba a gwegyɛzannu ma an va, laa, yé ka da mi ’ko nya an va élé ’wuosɛrɛwe kɛlɛle we gi an yuɛ vaa? É a lé mi ’ko é wɔra anlé kɔn gii?