1 Samuɛl 20 - Kazambale lé Sebe Sauunu 1979

Jonatan bɔ David va

¹ David fwi Najɔt, Rama sɔnɔ. É go Jonatan va, yé é léé: Mɛ lé maa kɛlɛɛ? Anlé weple a kaa? Anlé wenyané a kaa i ti yuɛ gi, yé é a a va léé, é anlé tɛrɛla nyaa?

² Jonatan a zi pa a lɛ léé: Monomono lo! I ’ka dan ga lɛ lo. Dé é a we kiéné nyaoo, dé é a we blɛn nyaoo, dé an ti ’ka tan wean ga vɔ lɛ an ta lo, é ’ka a kɛla é pla lo; é kɛlɛ kaa yé an ti we ’ko yɔɔ an maa? É ’ka a zo lo.

³ David lé é ziin bale ’nyɔɔnle nya léé: I ti a gi dɔɔ é zima léé, maa a mi zin nya i yuɛ gi, yé é léé, té Jonatan a gi dɔɔ lo ma; ’bɛ é dan ’na lɛ a ma. Naa, Gakelebale a é yuɛma yé i léli a é yuɛma. Gane pa do kpen ɛ ke maa valé gale méléna.

⁴ Jonatan lé David lɛ léé: Dé wean sɔ i lɛ, maa dan a kɛlɛ lɛ i lɛ.

⁵ David a zi pa léé: Bé ye, moné dɛrɛ é bɔraan tɛlɛ, yé é a lé maa nyana minwiinzan va fɛblele we gi; ’i zi nɔ an lɛ ’an go, yé maa dan yɔɔ lɛ féi fɔɔ zuoma yiri vɔle nya.

⁶ Dé i ti a ye léé, maa ’ka ana lo, i dan a fe lɛ a lɛ léé: David zi laa an lee léé, ’é go élé fla Bɛtléɛm, saraka lé wa boo lɛɛ do do ma wo gɔnɔlamunu faa zé nya, ’é kɛlɛ ana.

⁷ Yé dé é a fe léé: ’Bɛ a é zima, i wuozan kanamawe bɛ ’ka lo; naa, dé a bli fli, bé gi dɔɔ é zima léé, é a a gi léé, ’é wenyané kɛla an lɛ kpɔ.

⁸ Ko gi pa do é kyɛn Gakelebale ’lɛ, amalé i an sɔle i lɛ nagɔɔn sin. Yé dé wenyané a an gi, ’i an gyɛ i boan; naa, mɛmalé é a lé i go an nya i ti vaa?

⁹ Jonatan lé a lɛ léé: Té é dɔ i gi a zo lo, naa, dé maa ’ma léé, an ti a kwa kulina léé, ’é i gyɛ weboen nya, ’té maa kɛla kaa yé maa ’bɛ yɔɔ i maa?

¹⁰ David lé Jonatan lɛ léé: Dé i ti we zi pa i lɛ é yara plɛplɛ nya, de ɛ dan a fe lɛ an lɛɛ?

¹¹ Yé Jonatan lé David lɛ léé: ’I da ’wo go féi. Yé wo fiénu go féi.

¹² Jonatan lé David lɛ léé: Gakelebale, Izraɛl lé Bale a anlé wenayezan nya. An dan an ti gi dan lɛ tɛlɛ. Dé ’bɛ kaan lo, tɛlama. Dé é kɛlɛ léé, a bli a é zima David vazia, dé maa ’ka mi pa lɛ zia a zuo fena i lɛ lo,

¹³ Gakelebale ’é we kɛlɛ Jonatan lɛ élé plɛplɛ faa nya ma! Dé é dɔ an ti gi léé, ’é wenyané kɛla i lɛ, maa dan ’bɛ zuo fe lɛ i lɛ é ziin, yé maa dan zi nɔ lɛ i lɛ yé i go drɔɔ; Gakelebale ’é kɛlɛ i va ma, fɛan zo lé é kɛlɛ an ti va, a zo.

¹⁴ Dé maa a é bléyi é yuɛma, ’i we zin kɛlɛ an lɛ Gakelebale lé zin yɛrama;

¹⁵ dé an ga, dé Gakelebale i nyanézannu faa do do si tɛrɛ laoo, té ilé we zin kɛlɛle yi é ga anlé munu lɛ lo.

¹⁶ ’Bɛ zo lé Jonatan é gi pa do David kulunu va. Gakelebale ’é David lé we lɛgi pa a nyanézannu ma ma.

¹⁷ Yé Jonatan bale ’nyɔɔn David lɛ léé, i sɔ an lɛ; é sɔ a lɛ bélé yeebozen zo, azama.

¹⁸ Jonatan lé a lɛ léé: Moné dɛrɛ é dan bɔra lɛ tɛlɛ; i nyanana é dan vo lɛ é pla, amalé wo dan a ye lɛ léé, i ’ka ana lo.

¹⁹ A yi yaazan nya, ’i zun, fɛana lé i yɔɔ é vinin, ana, yé ’i vo Ézɛl gɔlɛ sɔnɔ.

²⁰ Maa dan sawɔlɛ yaa vuli lɛ bélé fɛan zo lé maa a fɛ do gyɛna, a zo.

²¹ Yé bé ye, maa dan pɛniɛ do nwunvɔ lɛ, yé maa dan a fe lɛ a lɛ léé: ’I go sawɔlɛnu gini. Dé maa fe a lɛ léé: Bé ye, sawɔlɛ a i vazia ’ko, ’i da, ’i wo sia, ’té ’bɛ gi léé, ’i da, naa, i dan vo lɛ drɔɔ, té i kana é dɛrɛ lo, Gakelebale a é yuɛma.

²² Naa, dé maa fe pɛniɛ lɛ léé: Bé ye, sawɔlɛnu a i ’lɛ baa, ’bɛ gi léé, ’i go, Gakelebale i pa zia.

²³ Dére lé ko a nɔ ko ke lɛ, Gakelebale ’é kɛlɛ anayezan nya lɛɛfaama ma.

²⁴ David vo é yɔɔle féi. Moné dɛrɛ bɔra yé minwiinzan blɛn nyana fɛ zi.

²⁵ Minwiinzan blɛn nyana é nyanana kɔnguru ma; Jonatan nwa yé Abinɛɛ nyana Saul bɛ do la; naa, David nyanana a é pla.

²⁶ Saul ’ka we do fe lɛ ’bɛ yi la lo; é dɔ a gi léé, we do bɔ yé David ’ka tegele lo; weboen lé, é ’ka tegele lo.

²⁷ ’Bɛ é tu kini, moné dɛrɛ yi fiézan nya, David nyanana vo é pla é ziin. Yé Saul lé é be Jonatan lɛ léé: Mɛmalé Izai be ’ka da lɛ fɛ ble lɛ yese valé kyɔ loo?

²⁸ Jonatan lé Saul lɛ léé: David zi laa an lee léé, ’é go Bɛtléɛm.

²⁹ É léé: Ilé zanté, ’i zi nɔ an lɛ. Wa ko gɔnɔla saraka bona fla yé an bwe we pa an lɛ zia, amalé dé maa i yuɛi bɔ, ’i zi nɔ an lɛ léé, ’an go an bwenu va é kele. Bɛwemalé é ’ka da lɛ minwiinzan lé tablé zi lo.

³⁰ Yé Saul bli fli Jonatan ma, yé é lé a lɛ léé: Tɔné gi plɛplɛ be sɛrɛle, i ’ka Izai be kɛlɛ lɛ i béé nya, i bu valé ibo gyɛle yara nya we ma loo?

³¹ Dé Izai be vo é yuɛma, bii valé ilé kɛlɛle minwiinzan nya se ’ka dan dɔ lɛ gligli lo. Yé sin, ’i mi pa zia a ginina, yé ’i da a nya an lɛ ’ko, naa, a ga yara lé.

³² Jonatan a zi pa é ti Saul lɛ léé: Mɛmalé wa gyaa? Mɛ lé é a kɛlɛɛ?

³³ Yé Saul élé din vuli Jonatan va, a gyɛle we gi. Jonatan a gi dɔɔ léé, é a é ti gi léé, ’é David gya.

³⁴ Jonatan nwa tablé zi é bliflile baba nya yé é ’ka fɛ ble lɛ wo va moné dɛrɛ yi fiézan nya lo. Naa, a ti yaragyɛwe kɛlɛ David vazia yé a bli kyɛ dɔ a we ma, azama.

³⁵ ’Bɛ é tu kini Jonatan go féi, fɛana lé wo dére pa do léé, ’wo kee David nya, ana, ’té gɔnéné do a a va.

³⁶ É lé ’bɛ lɛ léé: ’I vlan buru, sawɔlɛ lé maa dan a vuli lɛ, ’i go wo sia. Gɔnéné vlan buru, yé Jonatan sawɔlɛ do vuli a ’lɛ zia.

³⁷ Sawɔlɛ lé Jonatan a vuli bɛ, é dia fɛana, gɔnéné bɔ ana aan wo, Jonatan siaa a zuo: Sawɔlɛ ’ka i ’lɛ baa loo?

³⁸ Yé é lé a lɛ é ziin léé: ’I go fiéfié, té i dɔ lo. Yé Jonatan lé gɔnéné sawɔlɛnu sia yé é da wo nya ’ézan va.

³⁹ Gɔnéné ’ka we do kpen dɔɔ lɛ a gi lo; Jonatan valé David ɛ ’bɛ gi dɔɔ.

⁴⁰ Jonatan élé gulidanfɛnu nɔ élé gɔnéné lɛ yé é lé a lɛ léé: ’I go wo nya fla.

⁴¹ Gɔnéné go aan wo, David nwa yirinwana bɛyilazia, ’bɛ zuo é dia é yara tɛrɛ va gɔnɔ yaa. Woo béé fiénu wo ’wo ke tuu gyɛ yé wo wuvɔ ékeva yé David zé mini.

⁴² Yé Jonatan lé David lɛ léé: ’I go drɔɔ, naa, ko Gakelebale ’nyɔɔn ko ke lɛ a fele nya léé: Gakelebale ’é vo maa valé bii va ma, ’é vo an kulu valé i kulu va ma.

⁴³ David nwa yé é go, a zuo Jonatan go fla.